Jeremi 7 - Sră Goh 2018

Jeremi yal tơlik bơta cahrña Yàng Tom Trồ dê hơđang lơgar

¹ Bơh di Yàng Jehôwa gơs jơnau đơs mơ Jeremi lah:

² “Ntào tĕ di đap mpồng hìu Yàng Jehôwa, mơ tềng hơ̆ yal tơlik tĕ jơnau do mơ đơs lah: ‘Iat tĕ jơnau Yàng Jehôwa dê, ơ jơh tơl nă bol mê la cau Juda, la ală cau mut bơh mpồng do nàng duh khoai Yàng Jehôwa.

³ Yàng Jehôwa Gơnap Gơnoar, Yàng Tom Trồ Israel dê, đơs be do: Rcang niam wơl tĕ ală gùng dà mơ broă lơh bol mê; mơ Añ rơp ơm mơ bol mê tòm tiah do.

⁴ Bañ dòn kơnòm di ală jơnau blac pơrlồm lah: “Do la hìu duh khoai Yàng Jehôwa dê, hìu duh khoai Yàng Jehôwa dê, hìu duh khoai Yàng Jehôwa dê.”

⁵ Bơh dilah bol mê rcang wơl gùng dà mơ broă lơh bol mê dê, dilah ngan bol mê lơh broă dô bă song ring bal mơ gơp,

⁶ dilah bol mê ò rồn bơklơn cau nac crih, cau kòn đòi, cau ùr bơnrau, mơ ò lơh gơtuh mhàm ò gơs glài tòm tiah do; kung ò lòt jat ală yàng ndai lơh iơh is să he,

⁷ gen Añ rơp ơm bal mơ bol mê tòm tiah do, tòm ù tiah mơ Añ neh ai ồng pàng bol mê in bơh rài yau jơl tus sùm sùm ò lồi.

⁸ Mơ do, bol mê dòn kơnòm di ală jơnau blac pơrlồm ò kwơ dô êt lơi.

⁹ Bol mê ngan ò di ntung kơñau, tơnchơt cau, tìs glài rềs àr bơrnàn, srat să blac, chu kơlhô Baal in, lòt jat yàng ndai, la yàng bol mi ò git.

¹⁰ Lồc behơ̆ bol mê tơlik mat mơ Añ tòm hìu do, la tiah geh tơmoh bơh sơnđan Añ, mơ đơs lah: “Bol hi neh geh dong tă rau!” Tồ mìng pơnjat sùm lơh ală bơta cù kìr hơ̆ ơ?

¹¹ Behơ̆ hìu do, la tiah geh tơmoh bơh sơnđan Añ, gơlik gơs trồm cau ntung kơñau di đap bol mê ơ? Bol mê git, să tòm Añ neh sền gŏ ală bơta hơ̆,’ Yàng Jehôwa đơs behơ̆.

¹² ‘Behơ̆ tŭ do, lòt tus tĕ hơ tiah ơm yau Añ jê tòm Silô, tềng hơ̆ Añ neh ơn sơnđan Añ dơ̆ sơnròp, mơ sền gŏ ñchi Añ neh lơh gơ in, tài bơh bơta iơh bơsak làng bol Israel Añ jê.’

¹³ Yàng Jehôwa đơs: ‘Mơ tŭ do, bơh bol mê neh lơh ală broă hơ̆, Añ neh guh gòñ bơh àng drim bơto sồr bol mê, mơya bol mê ò iat; mơ tòm tŭ Añ hòi bol mê, mơya bol mê ò ho wơl,

¹⁴ gen tàng Añ rơp lơh hìu do, hơ̆ la hìu geh hòi bơh sơnđan Añ, la hìu mơ bol mê gơn kơnòm, mơ tiah Añ neh ai bol mê in bal mơ ồng pàng bol mê in, kung be Añ neh lơh Silô.

¹⁵ Mơ Añ kung sang tơlik bol mê bơh di đap mat Añ, kung be Añ neh sang tơlik jơh oh mi bol mê dê, hơ̆ la jơh ală jơi bơtiàn Epraim dê.’

Bơta ò dòn bơr làng bol dê

¹⁶ Ai mê, bañ hòi dan ala bơh làng bol do in; bañ bơh bol khai mơ ai jơnau rac dan hòi dan, kung bañ hòi dan ala mơ Añ, bơh Añ rơp ò iat mê.

¹⁷ Mê ò gŏ bơta bol khai neh lơh tòm ală ƀòn Juda dê mơ tòm ală gùng Jerusalem ơ?

¹⁸ Kòn dòñ lòng, bèp sing ồs, mơ ală cau ùr bơcă kơmbuh, nàng lơh ƀañ ơn bơtau ùr hơđang trồ, mơ bol khai tuh phan ơn pơdơng ñô ală yàng ndai in, nàng bơrcek Añ gơjrañ.”

¹⁹ Yàng Jehôwa đơs: “Añ la cau bol khai bơrcek di sơl? Hơ̆ ò di să tòm bol khai, cèng wơl bơta jê sồt bol khai in ò ơ?”

²⁰ Gen tàng Jehôwa Yàng Tom Trồ đơs be do: “Bơta gơjrañ mơ bơta gơhào gơjrañ dờng Añ jê rơp tuh hơđang lơgar do, hơđang jơi kòn mơnus mơ phan poan jơng, hơđang chi che tòm ƀlàng mơ plai bơkào ù tiah dê, gơ rơp chu pơrguc mơ ò tŭ lơi đơp chơt.”

²¹ Yàng Jehôwa Gơnap Gơnoar, Yàng Tom Trồ Israel dê đơs be do: “Bơtơl tĕ phan ơn chu bol mê dê tòm ală phan ơn duh khoai, mơ sa poac tĕ!

²² Bơh tòm ngai Añ neh cèng ồng pàng bol mê dê lik bơh lơgar Ejiptơ, Añ òhềt đơs, mơ kung òhềt ai gơnoar sồr bol khai in bơh phan ơn chu mơ ală phan ơn duh khoai.

²³ Mơya, gơnoar sồr do Añ neh ai bol khai: ‘Iat tĕ jơnau Añ, gen Añ rơp lơh gơs Yàng Tom Trồ bol mê dê, bol mê rơp lơh gơs làng bol Añ jê; mìng lòt tĕ tòm gùng dà Añ neh sồr bol mê, nàng bol mê in geh lơngai lơngò.’

²⁴ Mơya bol khai ò dòn bơr, mơ ò ai tồr iat, kư̆ kơldang nùs tòm bơta iơh bơsak nùs kòñ bol khai dê, bol khai cơnđòa lòt tòm bơta kơlôi bơyai is bol khai dê, mơ tơnggòr hơ ngkòi, ò cơnđòa lòt hơđap.

²⁵ Bơh ngai ồng pàng bol mê dê lik bơh lơgar Ejiptơ jơl tus di ngai do, Añ neh kong sồr ală cau duh broă Añ jê la ală cau gơnoar hwơr, lòt tus mơ bol khai; kòp ngai Añ guh gòñ sồr bol khai tus.

²⁶ Mơya bol khai ò iat Añ, ò ơn tồr kơno, mơya lơh ngko bol khai kră kơldang. Bol khai lơh bơta iơh rmơh oă rlau mơ ồng pàng bol khai neh lơh.”

²⁷ “Behơ̆ mê rơp đơs jơh ală jơnau do bol khai in, mơya bol khai rơp ò iat mê. Mê rơp hòi, mơ bol khai rơp ò ho wơl.

²⁸ Mê pal yal bol khai in lah: ‘Do la làng bol ò iat jơnau Jehôwa Yàng Tom Trồ bol khai dê, mơ ò bài dòp bơta bơto pơnniam. Bơta song ngan neh roh rau, neh tă tơlik bơh bơr bol khai.

²⁹ Siat tĕ sŏ mơ sơrbì gơ ngài; Ai sap ñìm rac hơđang ală dòr kơlờl! Bơh Yàng Jehôwa neh pơndang sang mơ sang lòi jơi bơtiàn do, La jơi bơtiàn neh bơrcek bơta gơjrañ Kơnràñ dê.’”

Thòng tơnchơt tơnroh

³⁰ Yàng Jehôwa đơs: “Bơh làng bol Juda neh lơh bơta iơh di đap mat Añ, bol khai ơn ală phan cù kìr tòm hìu geh sơnđan bơh sơnđan Añ, nàng lơh gơ in ƀơ̆ ƀơl.

³¹ Bol khai neh bơt ală tiah jơnhoa Tôphet dê, tòm thòng kòn klau Hinôm dê, nàng chu kòn klau kòn ùr he tòm ồs, hơ̆ la bơta Añ òhềt sồr, la bơta Añ òhềt kơlôi sơnơng.”

³² Gen tàng, Yàng Jehôwa đơs: “Tòm ngai rơp tus nền ngan, tŭ hơ̆ ò gam sơnđan Tôphet mơ thòng kòn klau Hinôm tai, mơya la thòng bơta sreh tơnchơt; bơh cau rơp tơp ală cau chơt tòm Tôphet tian gơs ò tang tiah tơp.

³³ Ală ƀồc làng bol do rơp lơh gơs phan sa ală sềm trồ mơ phan poan jơng tòm ù in, ò gơs cau lơi bơtrơh tơrngòt bol gơ.

³⁴ Mơ Añ rơp tơnlồi sap bơta chò hòp mơ bơta hòn chò, sap cau bơrtơu pa mơ ƀan pa tòm ală ƀòn dờng Juda dê mơ tòm ală gùng ƀòn dờng Jerusalem dê, bơh lơgar do rơp gơlik gơs tiah lòi srau gòi.”