Jeremi 6 - Sră Goh 2018

Jerusalem gơkòl cau sò tơm gơrwàng

¹ “Ơ ală kòn sau Benjamin, Lik dô tĕ bơh Jerusalem nàng geh lơngap lơngai. Uh kơlwòk tĕ tòm Tekôa, pò tơngguh bồng bi hơđang Bethakkerem; bơh mƀur bơta iơh tus bơh đah đang, Mơ bơta roh gơprah dờng ngan.

² Añ rơp tơnroh kòn ùr Siôn dê, tus hơ ƀlàng ñhơt niam mơnĕ ngan.

³ Ală cau ê mơ mpồl belàt bol khai dê rơp tus tòmdră mơ khai. Bol khai rơp sơntơp sàl gùt dar gơ, bol khai rơp sa ñhơt, tòm jơh ală tiah bol khai dê.”

⁴ Rcang tĕ bơta kơlìn tòmdră mơ gơ! “Ñă, mơ bol he brồ lơh tĕ di tŭ trồ gùl ngai! Bòl glar bol hi in bơh ngai mòr lồi, Mƀur trồ mho dê neh jòng!

⁵ Guh, mơ bol he brồ lơh tòm tŭ trồ mang, mơ tơnroh gơlang gơ dê!”

⁶ Bơh Yàng Jehôwa Gơnap Gơnoar đơs be do: “Kơl tĕ ală chi khai dê; mơ bơt bơtào tiah gơrwàng tòmdră mơ Jerusalem! Do la ƀòn pal kong lơh glài; Digùl gơ ò gơs bơta lơi rlau mơ ală bơta rồn bơklơn.

⁷ Kung be tơrlung dà prap dà mrềt pa be lơi, Gen gơ kung prap ală bơta iơh bơsak pa behơ̆ sơl. Bơta iơh bơsak mơ bơta phà tơnroh geh kơno tòm hơ̆; Kòp jê mơ sồt rmàñ ơm sùm di đap Añ.

⁸ Ơ Jerusalem, dòp tĕ bơta bơto tơnggit, hala Añ rơp sang lòi ai tòm ngkòr ngkàc, Mơ lơh ai in gơlik gơs tiah rhàng srau, dô bă tiah ò gơs cau ơm.”

⁹ Yàng Jehôwa Gơnap Gơnoar đơs be do: “Bol khai rơp dòñ jơh ală cau Israel gam wơl kung be cau dòñ plai ño; be cau tơrgòm pic plai ño, tơrwơl tê pic tai hơđang ală ntê gơ dê.”

¹⁰ Añ rơp đơs mơ ñcau, mơ sồr cau lơi kơrhia, Nàng bol khai rgơi kơno taih? Ne, tồr bol khai neh sềt, bol khai ò rgơi kơno. Jơnau Yàng Jehôwa dê gơwèt mơ bol khai be phan sền òsơp, Bol khai ò lơh niam nùs tòm gơ.

¹¹ Mơya Añ bềng bơta gơjrañ Yàng Jehôwa dê, Añ bòl glar bơh gơ ơm tòm Añ. “Tuh tơlik tĕ gơ hơđang ală kòn dềt tòm gùng, mơ hơđang ală cau pơnu tơrgòm bal di sơl; jơh bau klau mơ bau ùr rơp gơkòl kup cèng, cau kra mơ ală cau jòng sơnam.

¹² Ală hìu bol khai dê rơp gơrê mơ cau ndai, ală sre bol khai dê mơ ală bau ùr dô bă bal sơl; Bơh tê Añ rơp pò tơlik tê Añ jê, tòmdră mơ làng bol ơm tòm ù tiah do.” Yàng Jehôwa đơs behơ̆.

¹³ “Bơh tòm bol khai bơh cau dềt rlau jơh tus di cau dờng rlau jơh, kòp nă cau la hàm hà jòi cồng nha ò song ring, mơ cau gơnoar hwơr jơl tus cau gơnoar ơn phan duh khoai, jơh tơl nă lơh lòt ma blac.

¹⁴ Bol khai pồt tiah sồt rmàñ làng bol Añ jê dô bă ơlă ơlai, Mơ đơs lah: ‘Lơngap lơngai! Lơngap lơngai!’ Mơya ò gơs lơngap lơngai dô êt lơi.

¹⁵ Bol khai lơh broă bềng bơta ƀàssìl, mơ tìs glài iơh rmơh; Mơya bol khai ò git ƀàssìl. Bol khai ò dum mat ƀàssìl dô êt lơi. Gen tàng bol khai rơp gơpừ digùl ală cau gơpừ. Di di tŭ Añ lơh glài bol khai, bol khai rơp kong tuh tơlup.” Yàng Jehôwa đơs behơ̆.

¹⁶ Yàng Jehôwa đơs be do: “Ntào tĕ hơđang ală sơnah gùng, mơ sền; mơ lùp bơh ală gùng rài yau, Ntềng đah gùng niam ơm gen lòt tĕ tòm hơ̆, mơ jòi bàn bơta rlô bòl hwềng soàn bol mê in. Mơya bol khai đơs lah: ‘Bol hi rơp ò lòt tòm gùng hơ̆.’

¹⁷ Añ kung neh bơtào ală cau kơp gàr bol mê in; ‘Ai tĕ tồr iat ntas kơlwòk!’ Mơya bol khai đơs lah: ‘Bol hi rơp ò ai tồr iat!’

¹⁸ Gen tàng, ơ ală lơgar iat tĕ! Ơ ală mpồl jơnum, git tĕ ñchi bơta rơp gơlik tus mơ bol khai.

¹⁹ Ơ ù tiah, iat tĕ! Do, Añ rơp cèng bơta rung rài tus hơđang làng bol do, cồng nha bơh ală kai gơrmơ̆i bol khai dê, Tài bơh bol khai ò bài ai tồr iat ală jơnau Añ jê, Mơ bơh bơta bơto sồr Añ jê bol khai neh sang lòi gơ.

²⁰ Behơ̆, ñchi kwơ cèng kơlhô tus bơh Seba Añ in, Chi ƀô lơngồt tus bơh lơgar ngài? Phan ơn chu bol mê dê ò geh dòp, Phan ơn pơdơng bol mê ò niam nùs Añ.”

²¹ Gen tàng Yàng Jehôwa đơs be do: “Ne, Añ rơp ơn di đap làng bol do; Pơnai lŭ gơtup pừ tòmdră lơh bol khai in gơtup pừ. Mè bèp mơ ală kòn dô bă bal; Cau gơp ƀòn mơ cau bơyô gen roh rui.”

²² Yàng Jehôwa đơs be do: “Ne, dô làng bol tus bơh lơgar đah đang; Dô lơgar dờng bơtào tơngguh bơh tiah lồi plai ù dê.

²³ Bol khai jơh tơl nă at àtak mơ đào, bol khai iơh bơsak ngan, ò gơs nùs nđàc sơngit. Sap bol khai nggồr kung be dàlềng, Bol khai hào hơđang ală ơseh; rcang rơndap sèng kung be cau ling lòt tòmlơh Mơ tòmdră mơ ai, Ơ kòn ùr Siôn!”

²⁴ “Bol he neh kơno jơnau yal bơh bol khai, Tê bol hi gơrung ò gơs bơta dong kòl; Bơta jê sồt sơmbat kup bol hi, Bơta jê sồt be dô nă cau ùr deh kòn.

²⁵ Bañ lik lòt tòm ƀlàng sre, Hala lòt tòm gùng, Bơh cau sò tơm gơs dô nơm đào, bơta rngòt rngơt gơs tòm kòp đah.”

²⁶ Ơ làng bol nđàc sơngit Añ jê, soh tĕ bài sơnò kiat, Mơ pơrlac să tòm bùh. Ñìm ƀồc tĕ kung be neh roh kòn dùl nă, Ñìm rac tĕ dô bă sràt bơtang; Bơh cau phà tơnroh nisơna, rơp tus hơđang bol he.

²⁷ “Añ neh bơtào mê lơh gơs cau lòng mơ cau kơnềng lơh goh digùl làng bol Añ, Nàng mê rgơi git mơ lòng gùng dà bol khai dê.

²⁸ Bol khai jơh tơl nă kơldang bồ mơ pơrlơ̆ dră, Lòt làm bă tiah đơs iơh, Kră be kòng, be lòs, jơh tơl nă bol khai lơh ală broă roh gơprah lơm.

²⁹ Ding khồm ntas dờng, trà neh lề bơh ồs; tiar oă dơ̆ kung la ò kwơ; bơh cau iơh bơsak òhềt tă tơlik.

³⁰ Bol khai kòl sơnđan la ‘priă neh sang tơlik,’ Bơh Yàng Jehôwa neh sang tơlik bol khai.”