Jeremi 49 - Sră Goh 2018

Jơnau đơs hwơr bơh cau Ammôn, Edôm, Damas, Arabi, Persia

¹ Bơh kòn sau Ammôn, Yàng Jehôwa đơs be do: “Israel ò gơs kòn klau ơ? Ò gơs cau pơrdòn jơtài ơ? Gen ñchi bơh tài Milkôm ai Gat lơh gơs sre brê, mơ làng bol khai ơm tòm ală ƀòn Gat dê taih?”

² Yàng Jehôwa đơs: “Gen tàng, ală ngai rơp tus nền cê ngan, Tòm tŭ Añ rơp yal jơnau tơnggit bơh kơlìn gơtoă Tòmdră mơ Rapbah cau Ammôn dê, Gơ rơp gơlik gơs dô gơnru tơrlah tơrling; ală ƀòn gùt dar rơp kong chu mơ ồs, Tŭ hơ̆ Israel rơp tòmpìt ai sre brê ală cau neh tòmpìt sre brê khai.” Yàng Jehôwa đơs behơ̆.

³ “Ơ Hesbôn, ñìm rac tĕ, bơh Ahi neh kong phà tơrlah! Ơ kòn ùr Rapbah, driau nggà tĕ! Soh tĕ ào ƀào sơnò kiat, ñìm rac tĕ, mơ sơyoă să tòm bol mê mơ gai sơyoă! Bơh Milkôm rơp kong kup cèng gơs dĭ bal mơ ală cau gơnoar ơn phan duh khoai mơ ală kwang at bồ gơ dê.

⁴ Ơ kòn ùr ò dòn song ne, Ñchi bơh tài ai jòng să bơh ală bơta pràn kơldang ai dê? Bơta pràn kơldang ai dê gơhuc gơ mù, Ai dòn kơnòm di phan màng he dê, mơ đơs lah: ‘Ñcau rơp brồ lơh añ taih?’”

⁵ Yàng, la Yàng Jehôwa Gơnap Gơnoar, đơs: “Ne, Añ rơp cèng bơta rngòt rngơt Bơh kòp bă tiah tus hơđang ai; Kòp nă tòm bol ai rơp kong bơtrơh mơ ntoat dô, ò gơs cau lơi tơrgòm wơl ală cau ntoat dô.

⁶ Mơya tơnơ̆ hơ̆, Añ rơp cèng ală kòn sau Ammôn kong kup cèng gơs dĭ rê wơl.” Yàng Jehôwa đơs behơ̆.

Jơnau đơs hwơr bơh Edôm

⁷ Bơh Edôm. Yàng Jehôwa Gơnap Gơnoar đơs be do: “Tòm Theman ngan ò gam gơs bơta jak chài ơ? Ală cau cri bơyai neh roh bơta chài rgơi rau ơ? Bơta jak chài bol khai dê neh roh rau ơ?

⁸ Ơ làng bol Dedan, Wèt ngkòi tĕ, dô tĕ, pồn să tòm ală tiah jrô; Bơh Añ rơp lơh bơta rung rài Esau dê tus hơđang gơ, La tŭ Añ rơp lơh glài khai.

⁹ Ală cau pic plai ño tus hơ mê, Ngan ò lòi wơl dô êt ơ? Dilah cau kơñau tòm trồ mang Ngan ò di mìng kơñau tơl pơnah bol khai kòñ ơ?

¹⁰ Mơya Añ tì klò jơh Esau, Lơh khai in ơm kuh, Khai ò geh pồn ndơp. Kòn sau, oh mi, cau gơp ƀòn khai gen kong tơnroh, Mơ să tòm khai ò gam tai.

¹¹ Lòi tĕ ală kòn đòi mê dê; să tòm Añ rơp prap gàr bơta kis bol khai dê; Ală cau ùr bơnrau bol mê dê rgơi dòn kơnòm di Añ!”

¹² Yàng Jehôwa đơs be do: “Ală cau ò di hùc mơngàn do, ngan rơp hùc gơ; mơ mê rgơi klàs bơh bơta lơh glài ơ? Mê rơp ò klàs bơh bơta lơh glài, mê ngan rơp hùc mơngàn hơ̆.”

¹³ Yàng Jehôwa đơs: “Bơh Añ neh sơnio să tòm Añ mơ srat să, Bôsra rơp gơlik gơs cù kìr mơ sền òsơp, kong phà tơrlah mơ srat sơntơm; ală ƀòn gơ dê rơp gơlik gơs dô gơnru lề lac jơl sùm sùm.”

¹⁴ Do la jơnau mơ Yàng Jehôwa neh ai añ in kơno, Mơ gơs dô nă cau kong sồr geh sồr tus digùl ală lơgar: Pơjum bal tĕ lòt sò lơh khai! Ñă ntào tĕ mơ tòmlơh!

¹⁵ Bơh do, Añ lơh mê in gơlik gơs dềt rhền digùl ală lơgar, Gơkòl sền òsơp digùl jơi kòn mơnus.

¹⁶ Ơ cau ơm tòm rgồng lŭ dờng, Neh sơmbat geh bồ mơnơm ne, Kòp he la pal rngòt, Nùs pơnhừ să neh pơrlồm mê; Bulah mê lơh rsòn mê hơđang kung be rsòn klàng bung, Añ kung lơh mê in bơh hơ̆ dùh hơđơm, Yàng Jehôwa đơs behơ̆.

¹⁷ Edôm rơp gơlik dô nơm phan cù kìr, kòp nă cau lòt gan rơp ai lơh krơi; gen dơñŏ tơnhial bơh bơta rung rài gơ dê.

¹⁸ Gơ rơp tòm toh be bơta roh rui Sôdôm mơ Gômôrơ, mơ ală ƀòn ơm rềp mơ gơ, Yàng Jehôwa đơs behơ̆. Edôm rơp ò gơs cau ơm tai, rơp ò gơs dô nă cau ơm tềng hơ̆.

¹⁹ Gơ kung be klìu triă guh bơh ală brê me Jordan dê guh tus hơ ală ƀlàng ñhơt tơlir sùm. Nisơna Añ rơp lơh Edôm in ntoat dô, mơ Añ rơp bơtào cau mơ Añ neh sac rwah nàng at bồ gơ: Bơh ñcau be Añ taih? Ñcau khin pơrlòng mơ Añ taih? Gơs cau ê belàt lơi rgơi ntào di đap Añ sơl?

²⁰ Behơ̆ iat tĕ bơta Yàng Jehôwa neh lơh nền tòmdră mơ Edôm, mơ tơnggume broă Kơnràñ neh bơtào tòmdră mơ làng bol Theman: Ngan ală kòn dềt tòm mpồl bol khai rơp kong hwài lòt; nền cê ngan mpồl bol khai rơp kong rngòt rngơt.

²¹ Kơno bơta tơrlah tơrlơm bol khai dê gen ù gơlơnggơr, jơnau hòi driau bol khai dê rơp geh kơno tus hơ Dàlềng Pơrhê.

²² Ne, cau sò tơm par kung be klàng bung, pò pơnđar tòmdră mơ Bôjrah. Ngai hơ̆, nùs ală cau ling Edôm dê gơlik gơs kung be nùs cau ùr ơm jê deh.

Jơnau đơs hwơr bơh Damas

²³ Bơh Damas: Ƀòn Hamat mơ Arpat kong ƀàssìl ƀàsso; Bơh bol khai kơno yal bơta iơh Bol khai lề lac bơh rngòt rngơt, dơrcul be dàlềng lơnggac, Ò rgơi ơm mŏ mŏ

²⁴ Damas neh gơlik mprơm, wơlke ntoat dô, Bơta rơm să neh kup khai; bơta moat jrùng jê sồt sơmbat kơ̆ khai, Kung be cau ùr ơm deh kòn.

²⁵ Ngan, ƀòn tiơng pơnro neh kong sang lòi, La ƀòn gơs bơta chò hòp Añ in.

²⁶ “Behơ̆ gen, tòm tŭ hơ̆, ală cau pơnu gơ dê rơp gơpừ tòm ală jơnum gùng, Ală ling gơ dê rơp kong tơnchơt.” Yàng Jehôwa Mpồl Ling đơs.

²⁷ “Añ rơp ai ồs chu dơrñang Damas, Gơ rơp chu pơrguc ală gơlang bơtau Benhadat.”

Bơta cahrña Keđa mơ Hajor

²⁸ Bơh Keda mơ ală lơgar bơtau Hajor mơ Nebukatnessar bơtau Babilôn neh lơh alah. Yàng Jehôwa đơs be do: “Guh tĕ, lòt lơh Keda, Tơnroh ală làng bol đah mattơngai lik.

²⁹ Tòmpìt ală sàl mơ mpồl phan poan jơng bol khai Tă cèng jơh ală bài kơrnìng mơ ală phan, Cèng jơh ală làkđa bol khai dê bol mê in, Mơ cau rơp kơno driau dờng: ‘Bơta rngòt rngơt gùt dar!’”

³⁰ Yàng Jehôwa đơs: “Ơ làng bol Hajor, dô mhar tĕ! Pleh ngài tĕ! Pồn tĕ să tòm ală tiah jrô, Bơh Nebukatnessar, bơtau Babilôn, Neh rơndap broă tòmdră mơ bol mê, Lơh nền lơh iơh di bol mê.”

³¹ Yàng Jehôwa đơs: “Ñă tĕ, lòt tòmlơh mơ làng bol kis lơngap lơngai Ơm ring lơngai. Mpồng dờng ò til, ò gơs kơrnal, Ơm is dô bă tiah.

³² Ală làkđa bol khai rơp lơh gơs phan phà kup, Mpồl phan poan jơng bol khai rơp lơh gơs phan tòmpìt ai. Añ rơp lơh gơprah gơpring hơ ală jơng trồ Ală cau koah sŏ bìng liang; Añ rơp cèng bơta rung rài bơh làm bă tiah tus hơđang bol khai.” Yàng Jehôwa đơs behơ̆.

³³ “Hajor rơp gơlik gơs trồm pì òng, La tiah lòi srau sùm sùm. Ò gơs cau lơi ơm tềng hơ̆ tai, ò gơs dô nă cau lơi ơm tềng hơ̆!”

Bơta cahrña hơđang Elam

³⁴ Tŭ Jedekia bơtau Juda pa at bồ, gơs jơnau Yàng Jehôwa đơs mơ Jeremi, bơh Elam lah:

³⁵ Yàng Jehôwa Gơnap Gơnoar đơs be do: “Do, Añ rơp tơrpă àtak Elam dê, la bơta pràn kơldang tòm khai dê.

³⁶ Añ rơp lơh poan gah càl bơh poan đah mum trồ khồm tus tòmdră mơ Elam, rơp lơh nrah nring bol khai tus kòp đah càl hơ̆, bơh ò gơs lơgar lơi mơ ò gơs cau Elam kong kup cèng tus.

³⁷ Añ rơp lơh cau Elam in rngòt rngơt di đap cau sò tơm mơ cau jòi bơta kis bol khai.” Yàng Jehôwa đơs: “Añ rơp cèng bơta sơbơng roh, hơ̆ la bơta gơhào gơjrañ dờng Añ jê, tuh hơđang bol khai; mơ sồr đào jat bơh ngkòi, jơl tus di tŭ Añ tơnroh jơh bol khai.”

³⁸ Yàng Jehôwa đơs: “Añ rơp ơn sơbàn añ tòm Elam; Añ rơp tơnroh jơh bơtau mơ ală kwang at bồ gơ.

³⁹ Mơya tòm ală ngai tơnơ̆, Añ rơp cèng ală cau kong kup lơh dĭ Elam dê rê wơl.” Yàng Jehôwa đơs behơ̆.