Jeremi 46 - Sră Goh 2018

Jơnau đơs hwơr bơh ală làng bol ( 46:1 – 51:64 ) Jơnau đơs hwơr bơh lơgar Ejiptơ

¹ Gơs jơnau Yàng Jehôwa đơs mơ cau gơnoar hwơr Jeremi bơh ală làng bol.

² Bơh Ejiptơ, bơh mpồl ling bơtau Ejiptơ dê, Pharaôn Nekô, tŭ hơ̆ bơtào sàl ling rềp hiòng Ơphrat, tòm Karkemis; hơ̆ la mpồl ling gơkòl Nebukatnessar bơtau Babilôn lơh alah, tòm nam dơ̆ poan rài Jehôyakim kòn klau Jôsia bơtau Juda dê.

³ Rcang tĕ khèl dềt khèl dờng, mơ lik tòmlơh!

⁴ Ơ ling hào ơseh, kơt tĕ ừn ơseh, hào tĕ! Ndau tĕ sơgơn lòs ñă jat sèng; Tồl tà mơ soh ào lòs!

⁵ Ñchi bơta Añ neh gŏ taih? Bol khai rngòt rngơt, ruc wơl; Ală ling kong lơh gơprah gơpring, sơrbac sơrbang ntoat dô ò sền wơl đah ngkòi. Bơta rngòt rngơt làm jơh gùt dar, Yàng Jehôwa đơs behơ̆.

⁶ Cau ngac ngan kung ò rgơi dô, cau pràn ngan kung ò geh klàs. Bơh đah đang, di gah hiòng Ơphrat, Bol khai gơtup mơ gơpừ!

⁷ Ne, cau do la ñcau gơhào khuh be hiòng Nil, kung be ală hiòng gơtơngguh ryà dờng

⁸ Hơ̆ la Ejiptơ tơngguh be hiòng Nil, be ală hiòng dà gơhào khuh ryà. Gơ đơs, añ rơp guh, gòm jơh ù tiah; añ rơp phà tơrlah ală ƀòn mơ làng bol.

⁹ Ơseh, brồ tus hơđap; rơndeh tòmlơh ntoat tĕ mhar; Ală cau ling, ntoat tĕ tòmlơh; Cau Kus mơ cau Phus gen àñ khèl, Ai cau Lidi at àtak mơ wàr gơ.

¹⁰ Ngai hơ̆ la ngai Yàng Jehôwa, Yàng Tom Trồ Gơnap Gơnoar; Hơ̆ la ngai sal tê, Kơnràñ rơp sal tê cau sò tơm di Kơnràñ. Đào rơp loan jơl tus hòm, Hùc mhàm bol khai jơl tus rài tơhìr; Bơh Yàng Jehôwa la Yàng Tom Trồ Gơnap Gơnoar, Gơs bơta ơn phan duh khoai tòm lơgar đah đang, di gah hiòng Ơphrat.

¹¹ Ơ ală ơruh òhềt bau, kòn ùr Ejiptơ dê! Guh tĕ hơ Galaat, mơ ai kơlhô; Bol ai ngui oă sơnơm kung ò kwơ, Ò geh sơmbòi bol ai in ò!

¹² Ală lơgar gen neh kơno bơta ƀàssìl ƀàsso bol ai dê, mơ plai ù bềng sap driau nggà bol ai dê; Bơh ling tòmlơh gơtup jơng mơ ling tòmlơh, Jơh bàr đah gơpừ bal.

Babilôn sò lơh Ejiptơ

¹³ Do la jơnau Yàng Jehôwa đơs mơ cau gơnoar hwơr Jeremi, bơh bơta Nebukatnessar, bơtau Babilôn, rơp tus lơh lơgar Ejiptơ:

¹⁴ “Yal tơlik tĕ tòm Ejiptơ; yal Mikdôl in, Yal tơnggit Nôp mơ Tahpanhes in, đơs lah: ‘Mut ơm tĕ tòm toh di tiah ơm, mơ rcang kơp, Bơh đào neh loan gùt dar mê.’

¹⁵ Tài bơh ñchi Apis dô thit, ñchi bơh tài ală kơnrồ bol mê ò rgơi ntào, bơh Yàng Jehôwa neh ting bơtrơh bol khai.

¹⁶ Kơnràñ lơh oă cau in gơtup jơng, mơ gơpừ, Cau do hơđang cau ne, mơ đơs bal mơ gơp lah: ‘Tus tĕ, rê wơl hơ làng bol he, Tòm lơgar bol he neh geh deh, ngài bơh pềs tà rồn bơklơn!’

¹⁷ Ai tĕ Pharaôn bơtau Ejiptơ in dô nơm sơnđan, lah: ‘Cau pơnhừ să mơ jòng să! La cau neh lòi roh tŭ bơtoah.’”

¹⁸ Bơtau, sơnđan Kơnràñ la Yàng Jehôwa Gơnap Gơnoar đơs lah: “Ngan kung be Añ kis sùm, Cau sò tơm rơp tus, kung be mơnơm Thabôr ơm digùl ală mơnơm, kung be Karmel mpòl di gah dàlềng.

¹⁹ Ơ ală ơruh dềt ơm tòm Ejiptơ, rcang ală kơldung bol ai dê nàng lòt gơs dĭ, bơh Nôp rơp gơlik gơs tiah lòi srau; rơp kong chu, ò gơs làng bol ơm tai.

²⁰ Ejiptơ la dô nơm kơnrồ dra niam mơnĕ, mơya kòl dô nơm tòt bơh đah đang tus cik gơ.

²¹ Ală ling tòmlơh ơpah ơm digùl gơ kung be kơnrồ kòn lơmă. Mơya bol khai kung wơlke mơ dô jơh, bol khai ò jai ntào. Bơh ngai rung rài, tơngai lơh glài, neh tus hơđang bol khai rau.

²² Khai lơh ntas kung be bơs nsròng; bơh cau sò tơm khai dê lòt tus pràn ngan, at sùng yoas tus tòmdră mơ khai, kung be ală cau chài kơl chi.”

²³ Yàng Jehôwa đơs lah: “Cau sò tơm kơl chi tòm dơr brê khai dê, bulah brê hơ̆ ò rgơi lòt gan. Bơh bol khai gal ngan rlau mơ srah nting, kung ò rgơi kòp.

²⁴ Kòn ùr Ejiptơ rơp kòl bơta ƀàssìl ƀàsso, rơp kong phi tòm tê làng bol đah đang.”

²⁵ Yàng Jehôwa Gơnap Gơnoar Dờng, Yàng Tom Trồ Israel dê, đơs lah: “Do, Añ rơp lơh glài Ammôn, la yàng Nô dê, bal mơ Pharaôn, mơ Ejiptơ, bal mơ ală yàng mơ ală bơtau gơ dê: hơ̆ la Pharaôn bal mơ ală cau gơn kơnòm di khai.

²⁶ Añ rơp phi bol khai tòm tê ală cau jòi bơta kis bol khai, hơ̆ la tòm tê Nebukatnessar, bơtau Babilôn, mơ tòm tê ală cau kwang khai dê; tơnơ̆ mơ hơ̆ Ejiptơ rơp gam gơs làng bol ơm kung be yau òr, Yàng Jehôwa đơs behơ̆.

²⁷ Ai mê, ơ dĭ gơna Añ la Jakôp, bañ rngòt!; Ơ Israel, bañ rngòt rngơt! Bơh Añ rơp dong tă mê bơh lơgar ngài, rơp lơh jơi bơtiàn mê lik bơh lơgar bol khai kong kup gơs dĭ. Jakôp rơp rê wơl, geh lơngap lơngai, ò gơs cau lơi lơh khai in rngòt rngơt tài.”

²⁸ Yàng Jehôwa đơs: “Ơ Jakôp dĭ gơna Añ, mê bañ rngòt, bơh Añ ơm bal mơ mê. Añ rơp tơnroh jơh ală lơgar mơ Añ neh bơtrơh mê tus; ai mê, gen Añ ò tơnroh jơh ò, mơya lơh glài tơmàl mê dô bă song ring, mê ò rgơi ò lơh glài tơmàl ò.”