Jeremi 43 - Sră Goh 2018

Jeremi kong cèng hơ lơgar Ejiptơ, Jeremi yal lài bơh bơta cahrña

¹ Tòm tŭ Jeremi neh sir yal wơl jơh ală jơnau bơh Jehôwa Yàng Tom Trồ bol khai in, la jơnau Jehôwa Yàng Tom Trồ bol khai dê neh sồr khai yal wơl bol khai in iat,

² gen Ajaria kòn klau Hôsaya, Jôhanan kòn klau Kareah, bal mơ ală cau pơnhừ să đơs mơ Jeremi lah: “Mê đơs blac! Jehôwa Yàng Tom Trồ bol hi òhềt tŭ lơi sồr mê yal bol hi in lah: ‘Bañ lòt hơ lơgar Ejiptơ mơ ơm tềng hơ̆.’

³ Mơya hơ̆ la Baruk kòn klau Neriya, chồl mê tòmdră mơ bol hi, jào bol hi tòm tê cau Kalde nàng tơnchơt hala kup cèng gơs dĭ tòm lơgar Babilôn.”

⁴ Behơ̆ gen, Jôhanan kòn klau Kareah, ală cau at bồ ling mơ làng bol, ò dòn jơnau Yàng Jehôwa neh sồr ơm wơl tòm lơgar Juda.

⁵ Jôhanan kòn klau Kareah, mơ ală cau at bồ ling cèng ală cau Juda gam wơl tòm lơgar Juda hơ̆, la jơh ală cau rê wơl bơh ală lơgar ndai mơ bol khai neh kong bơtrơh tus,

⁶ ală cau klau, ală cau ùr, ală kòn dềt, bal mơ ală kòn ùr cau bơtau, mơ ală cau mơ Nebujaradan, kwang lam bồ mpồl ling kơp gàr bơtau, neh lòt bal mơ Gedalia kòn klau Ahikam sau Saphan dê, mơ kung cèng bal cau gơnoar hwơr Jeremi mơ Baruk kòn klau Neriya,

⁷ mut tòm lơgar Ejiptơ, tus hơ Tahpanhes; bơh bol khai ò dòn jat jơnau Yàng Jehôwa.

⁸ Tòm Tahpanhes, gơs jơnau Yàng Jehôwa đơs mơ Jeremi be do:

⁹ “Ai tĕ ală pơnai lŭ dờng ơn tòm tê mê dê, cèng pồn tòm ù kơnàng lơh gac di đap hìu Pharaôn, tòm Tahpanhes, lòi ală cau Juda in sền mê lơh behơ̆.

¹⁰ Mê pal yal tĕ bol khai in lah: Yàng Jehôwa Gơnap Gơnoar, Yàng Tom Trồ Israel dê, đơs be do: ‘Añ rơp sồr mơ cèng dĭ gơna Añ la Nebukatnessar bơtau Babilôn, mơ khai rơp ơn sơbàn bơtau khai dê hơđang ală lŭ do mơ Añ pa pồn; bơtau hơ̆ rơp cang ală kơrnìng hơđang.

¹¹ Bơtau hơ̆ rơp tus, lơh lơgar Ejiptơ Ală cau pal kong pluh plàng gen chơt bơh pluh plàng, Ală cau pal lơh dĭ gen kup cèng gơs dĭ, Ală cau pal kong chơt bơh pềs tà gen phi pềs tà in!

¹² Añ rơp sing ồs chu ală hìu bơmồng ală yàng Ejiptơ dê; Nebukatnessar rơp chu hala cèng ală rùp ràk hơ̆; bơtau hơ̆ kơñau jơh hir lơgar Ejiptơ, kung be cau ê belàt dòñ goh sai rồ tòm ào khai, mơ lik lòt lơngap lơngai.

¹³ Khai rơp dơrpă ală jrong Bet Semes dê tòm lơgar Ejiptơ, mơ rơp ai ồs chu jơh ală hìu bơmồng ală yàng Ejiptơ dê.’”