Jeremi 42 - Sră Goh 2018

Jeremi bơto làng bol bañ lòt hơ lơgar Ejiptơ

¹ Tŭ hơ̆ ală cau at bồ mpồl ling, Jôhanan kòn klau Kareah, Jesania, kòn klau Hôsaya, mơ jơh làng bol, bơh cau dềt tus cau dờng,

² neh tus đơs mơ Jeremi lah: “Dan dòp jơnau bol hi dan, mơ hòi dan ala mơ Jehôwa Yàng Tom Trồ ồng dê bol hi in, hơ̆ la ală cau gam wơl in. Mơ tai, bol hi bơh lài ngan la oă cau, ngai do gam wơl dô êt ngan, kung be mat ồng neh gŏ.

³ Dan Jehôwa Yàng Tom Trồ ồng dê sơnio bol hi in tềng đah bol khai pal lòt mơ ñchi broă bol hi pal lơh!”

⁴ Gen cau gơnoar hwơr Jeremi ho lah: “Añ kơno rau! Do, añ rơp hòi dan Jehôwa Yàng Tom Trồ bol mê dê, jat be jơnau bol mê dan, bơta lơi Yàng Jehôwa ho wơl, añ rơp yal bol mê in git, ò pồn dô êt lơi mơ bol mê.”

⁵ Ală cau hơ̆ đơs mơ Jeremi lah: “Dilah bol hi ò lơh jat kòp jơnau Jehôwa Yàng Tom Trồ ồng dê rơp sồr ồng yal bol hi in, dan Yàng Jehôwa la song ngan, dòn song lơh cơng digùl bol he!

⁶ Bulah bơta niam hala bơta iơh, bol hi rơp lơh jat jơnau Jehôwa Yàng Tom Trồ bol hi dê, la Bơtau mơ bol hi sồr ồng hòi dan; nàng tòm tŭ dòn bơr Jehôwa Yàng Tom Trồ bol hi dê, gen bol hi rơp geh lơngai.”

⁷ Tơnơ̆ mơ jơt ngai, gơs jơnau Yàng Jehôwa đơs mơ Jeremi.

⁸ Khai hòi Jôhanan, kòn klau Kareah, jơh ală cau kwang ling mơ jơh ală cau ling, bơh cau dềt tus cau dờng,

⁹ mơ đơs mơ bol khai lah: “Jehôwa Yàng Tom Trồ Israel, la Bơtau mơ bol mê sồr añ tus, nàng yal tơlik bơta hòi dan di đap Kơnràñ, đơs be do:

¹⁰ ‘Dilah bol mê kư̆ ơm wơl tòm lơgar do, gen Añ rơp bơtào bol mê wơl mơ ò phà tơnroh, Añ rơp tam bol mê mơ ò dus sang; bơh Añ neh tòmgơl bơh bơta rung rài mơ Añ neh dùh hơđang bol mê.

¹¹ Yàng Jehôwa đơs lah: bañ rngòt bơtau Babilôn, be bol mê neh rngòt; bañ rngòt bơtau hơ̆, bơh Añ ơm bal mơ bol mê nàng dong tă mơ dong bol mê klàs bơh tê khai.

¹² Añ rơp nđàc sơngit bol mê, tồ bơtau hơ̆ kung nđàc sơngit bol mê, mơ ai bol mê in rê wơl hơ lơgar tòm he.’

¹³ Mơya dilah bol mê đơs lah: ‘Bol hi ò bài ơm tòm lơgar do;’ mơ bol mê ò dòn jat jơnau Jehôwa Yàng Tom Trồ bol mê dê,

¹⁴ mơ đơs lah: ‘Ò, bol hi kòñ tus tòm lơgar Ejiptơ, la tiah bol hi ò gŏ kơlìn gơtoă tai, rơp ò kơno jơnau ntas kơlwòk tai, tềng hơ̆ bol hi rơp ò siơ̆u piang lă; hơ̆ la tiah bol hi rơp ơm,’

¹⁵ gen, ơ bol mê la cau Juda gam wơl ne, iat tĕ jơnau Yàng Jehôwa dê. Yàng Jehôwa Gơnap Gơnoar, Yàng Tom Trồ Israel dê, đơs be do: ‘Tŭ bol mê wèt mat mut tòm Ejiptơ nàng ơm tòp tềng hơ̆,

¹⁶ gen pềs tà mơ bol mê rngòt rngơt rơp ting bàn bol mê tòm lơgar Ejiptơ; bơta jơgloh rung mơ bol mê cù kìr kung rơp ting jat bol mê tòm lơgar Ejiptơ, mơ bol mê rơp chơt tềng hơ̆.

¹⁷ Behơ̆ gen, dilah cau lơi wèt mat mut tòm lơgar Ejiptơ nàng ơm tòp tềng hơ̆, gen rơp chơt bơh pềs tà, jơgloh rung, mơ pluh plàng. Tòm mpồl bol khai, ò gơs cau lơi gam wơl; ò gơs cau lơi klàs bơh bơta rung rài mơ Añ cèng tus hơđang bol khai.’

¹⁸ Ngan behơ̆, Yàng Jehôwa Gơnap Gơnoar, Yàng Tom Trồ Israel dê, đơs be do: ‘Kung be bơta gơjrañ mơ bơta gơjrañ dờng Añ jê neh dùh hơđang làng bol Jerusalem mbe lơi, gen tŭ bol mê mut tòm Ejiptơ, bơta gơjrañ Añ kung rơp tuh tơlik bol mê in kàr hơ̆; tềng hơ̆ bol mê rơp lơh kai cau in srat sơntơm, cù kìr, srat rma, mơ sền òsơp; mơ bol mê kung rơp ò gŏ tiah do tai.’

¹⁹ Ơ oh mi la cau Juda gam ơm wơl, Yàng Jehôwa neh đơs bơh oh mi lah: ‘Bañ tus hơ lơgar Ejiptơ.’ Pal git loh lah ngai do añ neh yal loh oh mi in.

²⁰ Tài bơh oh mi neh lơh bơta tìs sơbơng rơng ngan. Bơh oh mi neh sồr añ tus mơ Jehôwa Yàng Tom Trồ oh mi dê, mơ đơs lah: ‘Dan tài bơh bol hi hòi dan ala mơ Jehôwa Yàng Tom Trồ bol hi dê, mơ yal bol hi in git kòp bơta mơ Jehôwa Yàng Tom Trồ bol hi đơs; gen bol hi rơp lơh jat.’

²¹ Mơ tai, ngai do añ neh yal oh mi in rau; mơya oh mi ò dòn jat jơnau Jehôwa Yàng Tom Trồ oh mi bơta lơi Kơnràñ sồr añ yal wơl oh mi in.

²² Tŭ do, pal git loh lah oh mi rơp chơt bơh pềs tà, jơgloh rung, pluh plàng, tòm tiah mơ oh mi kòñ tus mơ ơm.”