Jeremi 4 - Sră Goh 2018

Jơnau bơto tơngkah mơ pơhìn lơh glài

¹ Yàng Jehôwa đơs: “Ơ Israel, dilah mê rê wơl, Dilah mê rê wơl mơ Añ, Mơ dilah mê sang ală phan cù kìr ngài bơh di đap Añ, Mơ ò wañ lơnggơr.

² Mơ dilah mê srat să ‘Kung be Yàng Jehôwa kis sùm!’ Tòm jơnau song, tòm bơta song ring, mơ song ngan, Gen ală lơgar rơp geh lơngai bơh Kơnràñ, Mơ bơh Kơnràñ bol khai jòng să.”

³ Bơh bơta hơ̆ Yàng Jehôwa đơs mơ cau Juda bal mơ làng bol ơm tòm Jerusalem be do: “Troă lơòr tĕ ù tiah pa bol mê dê, Bañ sih gar tòm gùl ală lò.

⁴ Ơ bol mê, la cau Juda mơ làng bol ơm tòm Jerusalem, Siat gơltau tĕ să tòm he Yàng Jehôwa in, Mơ siat gơltau nùs bol mê dê! Dilah ò behơ̆, bơta gơjrañ Añ rơp hơng kung be ồs, Chu pơrguc bol mê, mơ ò gơs cau lơi đơp chơt gơ ò, Tài bơh ală bơta iơh bol mê neh lơh.”

⁵ Yal tơlik tĕ tòm Juda, yal tơnggit tĕ tòm Jerusalem lah: “Uh tĕ kơlwòk làm lơgar, driau dờng tĕ mơ đơs lah: ‘Pơjum dô bă bal tĕ, mơ bol he lòt lă mut tòm ală ƀòn dờng kơ̆ cê!’

⁶ Yò tơngguh tĕ bồng bi wèt hơ Siôn! Ntoat dô nàng geh dong tă, bañ lơh òbat! Bơh Añ cèng bơta rung rài bơh đah đang, mơ dô bơta gơprah gơpring dờng.

⁷ Klìu triă neh lik bơh dơr brê, Cau tơnroh ală lơgar neh lik lòt, khai neh lik bơh tiah khai dê, Nàng lơh ù tiah mê gơlik tiah srau gòi; Ală ƀòn dờng mê dê gơlik tiah sang ngềt ngơt, Mơ ò gơs cau ơm.

⁸ Tài bơh bơta do, ală bol mê soh tĕ ƀào sơnò kiat, Ñìm rac mơ pơt wòl lah: Bơta gơhào gơjrañ dờng Yàng Jehôwa dê òhềt pleh ngài bơh di bol hi.”

⁹ Yàng Jehôwa đơs: “Tòm ngai hơ̆, cau bơtau mơ ală kwang at bồ gơdô nùs; Ală cau gơnoar ơn phan duh rngòt rngơt, Ală cau gơnoar hwơr mơp dơl.”

¹⁰ Gen añ đơs: “Ôih! Khoai Jehôwa Yàng Tom Trồ! Ngan Yàng neh pơrlồm làng bol do mơ Jerusalem, mơ đơs lah: ‘Bol mê rơp geh lơngap lơngai,’ bulah đào neh ơm di ngko bol hi!”

¹¹ Tòm tŭ hơ̆, rơp gơs jơnau đơs mơ làng bol do mơ Jerusalem lah: “Càl duh tus bơh Añ rơp khồm ală dòr kơlờl tòm ƀlàng bràs tus hơ làng bol rƀah Añ jê, mơya ò di nàng tòmpơr kòi, hala puh goh kòi.

¹² Dô nơm càl pràn ngan rlau. Tŭ do Añ la cau yal bơta cahrña tòmdră mơ bol khai.”

¹³ Ne, khai rơp guh kung be dô puk mhwal, Rơndeh tòmlơh khai ò gơkrơi kung be càl wàl bong, Ơseh khai sơrbac sơrbang be klàng bung. Dồn sa rƀah bol hi in, bơh bol hi gơkòl tơnroh!

¹⁴ Ơ Jerusalem, rào goh tĕ nùs bol mê dê bơh bơta iơh bơsak, Tồ mê in geh dong tă. Nđò jŏ mê lòi bơta bơyai iơh ơm tòm dơlam mê taih?

¹⁵ Bơh gơs dô jơnau yal tus bơh Dan, mơ yal tơnggit bơta rung rài tus bơh mơnơm Epraim.

¹⁶ Yal tơnggit tĕ ală lơgar in, “Gơs bol khai tềng do! Yal tĕ Jerusalem in lah: ‘Cau gơrwàng tus bơh tiah ngài, driau nggà tòmdră mơ ală ƀòn dờng Juda dê.

¹⁷ Bol khai gơrwàng Jerusalem be cau kơp gàr sre; Tài bơh gơ neh pơrlơ̆ dră mơ Añ.’” Yàng Jehôwa đơs behơ̆.

¹⁸ “Hơ̆ la ală gùng dà mơ broă lơh mê dê Neh cèng bơta do hơđang bol mê. Hơ̆ la pơnah mê dê, sràt bơtang ngan, gơ neh tus hơ kòp nơm nùs bol mê dê.”

Bơta moat jrùng lơgar roh rui in

¹⁹ Bơta jê sồt añ jê! Bơta jê sồt añ jê! Bơta jê sồt tơryoat añ; Plai nùs añ gơpiah pràn ngan. Añ ò rgơi ơm mŏ; Bơh añ neh kơno ntas kơlwòk, Jơnau yal tơnggit bơh bơta kơlìn tòmlơh.

²⁰ Bơta rung rài ting bàn bơta rung rài, jơh tòm lơgar kong srau gòi; Nisơna ală sàl añ jê neh kong tơnroh, Ală bài kơrnìng añ jê gơcrè tòm dô ơthoa lơm!

²¹ Nđò jŏ tai añ pal sền di bồng bi, Mơ kơno ntas kơlwòk taih?

²² “Bơh làng bol Añ jê tùl gơla, Bol khai ò đal git Añ. Bol khai la kòn sau bơrngơl gơla, Bol khai ò gơs bơta git wă, Bol khai chài rgơi lơh bơta iơh, Mơya ò git mbe lơi lơh bơta niam.”

²³ Añ sền di ù tiah, ne, gơ la roh lơm mơ brong gòi; mơ sền hơ ală tap trồ, gen ò gơs bơta àng.

²⁴ Añ sền hơđang ală mơnơm, ne, jơh gơlơnggơr; mơ jơh ală dòr ơwañ lòt bơh tiah do tus tiah ne.

²⁵ Añ sền, mơ ne ò gam dô nă cau lơi, Jơh ală sềm tòm pah gòi neh dô pleh.

²⁶ Añ sền gŏ sre niam gơlik gơs ƀlàng ngềt ngơt, jơh ală ƀòn dờng gơ dê neh gơprah gơpring, di đap Yàng Jehôwa, bơh bơta gơhào gơjrañ dờng Kơnràñ dê.

²⁷ Bơh Yàng Jehôwa đơs be do: “Jơh lơgar rơp kòl sang srau gòi, Mơya Añ ò tơnroh jơh.

²⁸ Tài bơh hơ̆, ù do rơp moat jrùng ñìm ƀồc, mơ ală tap trồ hơđang gơlik jù cik; Bơh Añ neh đơs, Añ neh lơh nền, Añ rơp ò tòmgơl nùs, hala Añ kung ò tòmgơl jơnau.”

²⁹ Tŭ kơno ntas ling hào ơseh, mơ ling pañ sơna, Jơh ală cau tòm ƀòn dờng ntoat dô; Bol khai mut tòm rlau chi, hào hơđang ală pơnai lŭ; Jơh ală ƀòn dờng kong sang lòi, Ò gơs dô nă cau ơm tòm ală ƀòn dờng hơ̆.

³⁰ Ai ai, ơ cau kong sang lòi. Ñchi ai kòñ soh ào dà gur, bơka să mơ màh, Ai dà cih pih mat nàng dờng ơnàng taih? Lơh he in gơlik hàng mơnĕ, kung la ò kwơ; Cau kòñ gơboh ai sền ai òsơp, bol khai kòñ tă bơta kis ai.

³¹ Bơh añ kơno jơnau rơnđơh, gơlơh be cau ùr jê deh, Sap ñìm nggà kung be sap cau ùr deh kòn dơ̆ sơnròp. Hơ̆ la sap ñìm ală kòn ùr Siôn dê, tă nhơm bòl, pò tơlik tê khai dê: “Dồn sa añ in! Añ neh chơt kơng di đap ală cau tơnchơt cau!”