Jeremi 34 - Sră Goh 2018

Đơs hwơr bơh bơta neh lơh nền Jedekia in

¹ Gơs jơnau bơh Yàng Jehôwa đơs mơ Jeremi, tòm tŭ Nebukatnessar, bơtau Babilôn, bal mơ jơh mpồl ling khai dê, ală lơgar tòm dunnia, mơ ală làng bol ơm hơđơm gơnoar khai dê, gam tòmlơh tòmdră mơ ƀòn dờng Jerusalem mơ ală ƀòn dờng ndai gơrê bal mơ gơ.

² Jehôwa Yàng Tom Trồ Israel dê, đơs be do: “Lòt yal tĕ mơ Jedekia, bơtau Juda lah: Yàng Jehôwa đơs lah: ‘Do, Añ rơp phi ƀòn do tòm tê bơtau Babilôn, khai rơp ai ồs chu gơ.

³ Să tòm mê rơp ò klàs bơh tê khai; mơ ngan rơp kong kup, mơ kòl jào tòm tê khai. Mê rơp sền gŏ bơtau Babilôn; mat tòm mat, mơ mê rơp lòt tus hơ lơgar Babilôn.’

⁴ Bulah behơ̆, ơ Jedekia, bơtau Juda, iat tĕ jơnau Yàng Jehôwa! Bơh mê, Yàng Jehôwa đơs be do: ‘Mê rơp ò chơt bơh đào ò.

⁵ Mê rơp chơt tòm lơngap lơngai. Cau rơp chu sơnơm ƀô bơlhu mê in be neh chu ồng pàng mê in, hơ̆ la ală bơtau lài mơ mê, mơ rơp ñìm ƀồc mê in. Să tòm Añ neh đơs jơnau do, Yàng Jehôwa đơs behơ̆.’”

⁶ Gen cau gơnoar hwơr Jeremi đơs ală jơnau hơ̆ mơ Jedekia, bơtau Juda, tòm Jerusalem,

⁷ tòm tŭ mpồl ling bơtau Babilôn dê, tòmlơh mơ Jerusalem mơ ală ƀòn Juda gam wơl, hơ̆ la ƀòn Laki mơ ƀòn Ajeka; bơh tòm ală ƀòn Juda dê mìng bàr nơm ƀòn kơ̆ cê hơ̆ gam wơl lơm.

⁸ Gơs jơnau Yàng Jehôwa đơs Jeremi, tơnơ̆ mơ tŭ bơtau Jedekia neh bơtào bơta ho bal mơ jơh làng bol tòm Jerusalem, nàng yal bơta khat gơboh làng bol hơ̆ in,

⁹ tồ kòp nă cau in hồ toh cau dĭ klau hala dĭ ùr Hebrơ, geh khat gơboh, ò gơs cau lơi geh gơnoar krơ̆ wơl cau Juda oh mi he nàng gơs dĭ tai.

¹⁰ Mơ bol khai dòn bơr, jơh ală kwang at bồ mơ jơh làng bol neh gơs pơnah tòm bơta ho bal hơ̆, hồ toh cau dĭ klau he, cau dĭ ùr he in khat gơboh, ò gam prap wơl gơs dĭ gơna tai. Bol khai lơh jat mơ hồ toh bol hơ̆ in geh khat gơboh.

¹¹ Mơya tơnơ̆ mơ hơ̆ bol khai tòmgơl nùs; kup wơl ală dĭ klau dĭ ùr mơ he neh hồ toh, rê wơl duh broă gơs dĭ he be òs.

¹² Tŭ hơ̆ gơs jơnau Yàng Jehôwa đơs mơ Jeremi lah:

¹³ Jehôwa Yàng Tom Trồ Israel dê, đơs be do: “Añ neh bơtào bơta ho bal mơ ồng pàng bol mê dê tòm ngai Añ cèng bol khai lik klàs bơh lơgar Ejiptơ, bơh hìu ơm dĭ, mơ neh ai gơnoar sồr lah:

¹⁴ ‘Tŭ neh jơh poh sơnam, tòm ală bol mê kòp nă pal hồ toh oh mi he, la cau Hebrơ, neh tac bol mê in mơ neh duh broă bol mê prau sơnam rau, mê pal hồ tơlik khai nàng geh khat gơboh.’ Mơya ồng pàng bol mê dê ò bài iat Añ, kung ò ơn tồr kơlôi sơnơng.

¹⁵ Ai ală bol mê, pa do neh rê wơl mơ lơh bơta niam nùs Añ, kòp nă yal cau gơp ƀòn he geh khat gơboh; mơ neh bơt bơtào bơta ho bal di đap Añ, hơ̆ la tòm hìu geh sơnđan bơh sơnđan Añ.

¹⁶ Mơya bol mê neh tòmgơl nùs, neh lơh ƀơ̆ iơh sơnđan Añ; bol mê neh kup wơl ală cau dĭ klau dĭ ùr mơ he neh hồ toh geh khat gơboh rê wơl, mơ bơklơn pal lơh gơs dĭ he kung be lài.

¹⁷ Behơ̆ gen, Yàng Jehôwa đơs be do: ‘Bol mê neh ò iat Añ, kòp nă yal oh mi he in, cau gơp ƀòn he geh khat gơboh.’ Yàng Jehôwa đơs: ‘Do, Añ yal bơta khat gơboh bol mê in, hơ̆ la lòi bol mê in khat gơboh tòm pềs tà, pluh plàng, jơgloh rung, lòi bol mê kong rngòt rngơt digùl ală lơgar tòm dunnia.

¹⁸ Añ rơp phi ală cau neh tìs bơta ho bal Añ, ò lơh jat ală jơnau ho bal neh bơtào di đap Añ, tòm tŭ bol khai reh kơnrồ kòn gơlik gơs bàr pơnah, mơ lòt gan digùl bàr pơnah gơ dê;

¹⁹ ngan Añ rơp phi ală kwang at bồ Juda mơ ală kwang at bồ Jerusalem, kwang kơndời, cau gơnoar ơn phan duh khoai, mơ jơh ală cau ơm tòm lơgar neh lòt gan digùl bàr pơnah kơnrồ kòn;

²⁰ Añ rơp phi bol khai tòm tê cau sò tơm, cau kòñ lơh iơh di bơta kis bol khai; ƀồc chơt bol khai rơp lơh gơs phan sa sềm trồ mơ phan poan jơng tòm ù in.

²¹ Añ kung rơp phi Jedekia, bơtau Juda, bal mơ ală kwang at bồ khai dê, tòm tê cau sò tơm mơ cau kơp mòc bơta kis bol khai, hơ̆ la tòm tê mpồl ling bơtau Babilôn neh lik klàs bơh bol mê.’

²² Yàng Jehôwa đơs: ‘Añ rơp ai gơnoar sồr mơ lơh bol khai in rê wơl hơ ƀòn do; bol khai rơp lơh, rơp tòmpìt ai, mơ ai ồs chu pơrguc gơ. Añ rơp lơh ală ƀòn Juda gơlik gơs tiah sang lòi ngềt ngơt, ò gơs làng bol ơm.’”