Jeremi 33 - Sră Goh 2018

Jơnau ho bơh bơta bơtào wơl

¹ Tòm tŭ Jeremi gam kong jàm tòm rơng hìu ling kơp gàr, gen gơs jơnau Yàng Jehôwa đơs mơ khai dơ̆ bàr lah:

² “Yàng Jehôwa la Bơtau lơh gơs bơta do, Yàng Jehôwa la Bơtau bơt bơtào lơh gơ in kơ̆, Jehôwa la sơnđan Kơnràñ, đơs be do:

³ ‘Lùp tĕ Añ, Añ rơp ho wơl mê in; Añ rơp yal mê in ală broă dờng mơ ndơp ndơr, la ală broă mê òhềt tŭ lơi git.’

⁴ Bơh ală hìu gơrê bal mơ ƀòn do mơ hìu gơlang bơtau Juda dê, cau neh phà tơrlah nàng bơt wơl gơlang theng kơ̆ cê nàng tòmdră wơl mơ pềs tà mơ phan tòmlơh cau sò tơm dê, gen Jehôwa, Yàng Tom Trồ Israel dê đơs be do:

⁵ ‘Cau Kalde neh tus nàng tòmlơh, nàng lơh bềng lìu ƀồc ală cau mơ Añ neh tơnchơt tòm bơta gơjrañ mơ bơta gơjrañ dờng Añ jê; hơ̆ la tài bơh làng bol do iơh rmơh ngan mơ Añ neh pồn mat Añ jê bơh ƀòn do.

⁶ Mơya, Añ rơp ai pràn, mơ sơmbòi gơ in; Añ rơp sơm bol khai mơ ai bol khai in gŏ bơta tơngkah tơngkañ bơta lơngap lơngai mơ dong tă.

⁷ Añ rơp cèng ală cau kong kup cèng gơs dĭ Juda mơ Israel rê wơl; bơt bơtào wơl bol khai kung be lài òr.

⁸ Añ rơp lơh goh jơh ală bơta iơh bơsak bol khai neh tìs glài tòmdră mơ Añ; Añ rơp toh jơh ală bơta iơh bơsak bol khai neh tìs glài mơ Añ mơ tòmdră mơ Añ.

⁹ Gen ƀòn dờng do rơp gơlik gơs dô sơnđan chò hòp, jòng ro, gơklŏ Añ in ơm di đap ală làng bol tòm dunnia; ală làng bol hơ̆ rơp kơno bơh ală bơta niam Añ neh lơh bol khai in, gen rngòt rngơt mơ rơm să, tài bơh ală bơta lơngai lơngò bal mơ bơta bơtoah bơtoài mơ Añ neh ai làng bol Añ in.’

¹⁰ Yàng Jehôwa đơs be do: ‘Tòm tiah do bol mê neh đơs: “Hơ̆ la dô bă tiah srau gòi; ò gam gơs cau ơm, kung ò gơs phan poan jơng;” tòm ală ƀòn cau Juda, mơ ală gùng ƀòn dờng Jerusalem dê, hơ̆ la ală tiah neh kong sang lòi ngềt ngơt, ò gơs cau ơm, ò gơs làng bol ơm, kung ò gơs phan poan jơng,

¹¹ gen cau rơp kơno sap driau chò mơ hòn chò, sap cau bơrtơu pa mơ sap cau ƀan pa, sap ală cau đơs chò kung be bol khai cèng phan ơn pơdơng tòm hìu Yàng Jehôwa dê: “Ưnngài tĕ Yàng Jehôwa Gơnap Gơnoar, Bơh Yàng Jehôwa la niam, Bơta kòñ gơboh kơ̆ dơn Kơnràñ dê gam sùm sùm!” Bơh Añ rơp bơtào wơl lơgar do in be lài òr,’ Yàng Jehôwa đơs behơ̆.

¹² Yàng Jehôwa Gơnap Gơnoar đơs be do: ‘Tòm tiah do la tiah lòi srau, ò gơs cau ơm, kung ò gơs phan poan jơng, mơ tòm ală ƀòn gơ, rơp gơs wơl ală ƀlàng ñhơt cau ê in lòi mpồl he ơm bic rlô.

¹³ Tòm ală ƀòn tiah mơnơm mơ ală ƀòn tiah ƀlàng ring, tòm ală ƀòn tiah Negep, tòm lơgar Benjamin, tòm ală tiah gùt dar Jerusalem mơ tòm ală ƀòn Juda, ală mpồl belàt rơp lòt gan hơđơm tê cau kòp khà bol gơ,’ Yàng Jehôwa đơs behơ̆.

Ntê Song Ring mơ bơta ho bal mơ Dabit

¹⁴ Yàng Jehôwa đơs tai: ‘Ală ngai nền cê ngan rơp tus, tŭ hơ̆ Añ rơp lơh wil tơl jơnau Añ neh ho mơ hìu Israel mơ hìu Juda.

¹⁵ Tòm ală ngai hơ̆ mơ tŭ tơngai hơ̆, Añ rơp lơh dô nơm Ntê bơta song ring gơcat Dabit in; Bơtau hơ̆ rơp lơh gơs bơta song ring song ngan tòm lơgar do.

¹⁶ Tòm ală ngai hơ̆, Juda rơp geh dong klàs; Jerusalem rơp ơm lơngap lơngai; gơ geh sơnđan lah: “Yàng Jehôwa, bơta song ring bol he dê.”’

¹⁷ Mơ tai, Yàng Jehôwa đơs be do: ‘Dabit rơp ò siơ̆u dô nă cau klau nàng nggui hơđang sơbàn hìu Israel;

¹⁸ ală cau gơnoar ơn phan duh khoai, hơ̆ la cau Lebi, rơp kung ò siơ̆u dô nă cau di đap Añ nàng ơn phan ơn chu, phan ơn mơ kòi mbo, mơ ơn phan pơdơng kòp ngai.’”

¹⁹ Gơs jơnau Yàng Jehôwa đơs tai mơ Jeremi lah:

²⁰ “Yàng Jehôwa đơs be do: ‘Dilah bol mê rgơi tơnroh bơta ho bal mơ trồ ngai Añ jê mơ bơta ho bal mơ trồ mang Añ jê, tian gơs ò gơs ngai mơ mang tòm tŭ di wềr gơ dê,

²¹ gen sồng rgơi tơnroh bơta ho bal Añ jê mơ Dabit, dĭ gơna Añ, mơ khai rơp ò gơs kòn sau at bồ hơđang sơbàn khai tai, mơ tơnroh bơta ho bal Añ jê bal mơ ală cau gơnoar ơn phan duh khoai, hơ̆ la cau Lebi, cau duh broă Añ.

²² Cau ò rgơi kòp ală sơmañ hơđang trồ mơ was bràs tòm dàlềng: Añ kung rơp ai bơtơl Dabit, dĭ gơna Añ, mơ ai cau Lebi duh broă Añ, geh jơi bơtiàn gal ngan kung behơ̆.’”

²³ Gơs jơnau Yàng Jehôwa đơs tai mơ Jeremi be do:

²⁴ “Ngan mê ò ai tồr iat làng bol do đơs ơ? Bol khai đơs: ‘Bàr jơi bơtiàn Yàng Jehôwa neh sac rwah, gen Kơnràñ neh sang lòi rau.’ Behơ̆, bol khai sền òsơp làng bol Añ jê, sền làng bol do ò di la dô nơm lơgar tai!

²⁵ Mơya, do la jơnau Yàng Jehôwa đơs: ‘Dilah bơta ho bal Añ jê bơh ngai mơ mang ò gam bơtào kơ̆, mơ dilah Añ ò rơndap tap sèng gơnoar at bồ trồ mơ tiah in,

²⁶ gen kung behơ̆, Añ rơp sang lòi jơi bơtiàn Jakôp mơ jơi bơtiàn Dabit dĭ gơna Añ jê, tian gơs Añ rơp ò sac rwah dô nă tòm ală kòn sau khai dê lơh gơs cau at bồ jơi bơtiàn Abraham, Isak, mơ Jakôp dê. Bơh Añ rơp bơtào wơl sre brê bol khai dê, mơ rơp nđàc sơngit di bol khai.’”