Jeremi 31 - Sră Goh 2018

Israel rê wơl hơ lơgar tòm

¹ Yàng Jehôwa đơs: “Tòm tŭ hơ̆, Añ rơp lơh gơs Yàng Tom Trồ jơh ală jơi bơtiàn Israel in; mơ bol khai rơp lơh gơs làng bol Añ jê.”

² Yàng Jehôwa đơs be do: “Làng bol lik klàs bơh pềs tà Neh jòi bàn bơta nđàc tòm ƀlàng ngềt ngơt; tòm tŭ Israel jòi bàn tiah rlô.”

³ Yàng Jehôwa neh tơlik mat mơ Añ bơh tŭ jŏ jòng, “Ngan, Añ neh kòñ gơboh di mê mơ bơta kòñ gơboh gam sùm sùm, Gen tàng, Añ neh kư̆ pơnjat tai bơta dòn song Añ jê mơ bol mê.

⁴ Ơ kòn ơruh Israel dê! Añ rơp bơtào wơl bol ai, gen bol ai rơp geh bơtào, Bol ai rơp at wơl sơnggơr dềt ai dê, Lòt bal mơ ală cau tòmya chò hòp.

⁵ Bol ai rơp tam suơn ño wơl; Hơđang ală mơnơm Samari dê, Ală cau tam chi rơp tam Mơ rơp hòn chò pic plai.

⁶ Rơp gơs dô ngai, tòm tŭ ală cau kơp gàr rơp hòi Hơđang ƀòn dờng kơh mơnơm Epraim lah: ‘Tus tĕ, bol he lòt tĕ hơđang mơnơm Siôn, Tus hơ Jehôwa Yàng Tom Trồ bol he dê!’”

⁷ Yàng Jehôwa đơs be do: “Đơs chò dờng tĕ chò hòp bơh Jakôp; Driau chò tĕ bơh cau lam bồ ală lơgar. Yal tơlik tĕ bơta jòng ro mơ đơs lah: ‘Khoai Yàng Jehôwa, dan dong klàs làng bol Kơnràñ, La làng bol gam wơl Israel dê.’

⁸ Ne, Añ rơp cèng bol khai rê wơl bơh lơgar đah đang, Pơjum wơl bol khai bơh ală tiah lồi plai ù. Tòm mpồl bol khai gơs cau jơngo, cau kwet, Cau ùr bun, cau ùr deh kòn, Dô bă bal dô mpồl dờng mơ rê wơl hơ do.

⁹ Bol khai ñìm rac mơ tus, mơ Añ rơp tề lam tòm bơta rac dan; Añ rơp jun bol khai lòt rò gah ală hiòng, Jat gùng song ngan, ò kòl gơtup pừ. Bơh Añ neh lơh gơs bèp Israel in, Ai Epraim la kòn tơnhoa Añ jê.

¹⁰ Ơ ală làng bol, iat tĕ jơnau Yàng Jehôwa dê; Yal tơlik tĕ jơnau hơ̆ tòm ală lơgar ngài rò gah dàlềng Đơs tĕ: ‘Bơtau neh lơh nrah nring Israel rơp pơjum tơrgòm bol khai wơl, Mơ rơp ê gàr bol khai be dô nă cau ê belàt.’

¹¹ Bơh Yàng Jehôwa neh tơwài Jakôp, Dong tă bol khai klàs bơh tê cau pràn kơldang rlau mơ bol khai.

¹² Bol khai rơp tus mơ driau chò hơđang ală tiah jơnhoa Siôn dê; bol khai rơp àng gơcrà tòm bơta lơngai niam Yàng Jehôwa dê, Bơh kòi mbo, tơrnòm pa, mơ mơñà, Ală belàt kòn mơ kơnrồ kòn; Bơta kis bol khai dê rơp be dô nơm suơn tuh dà sùm, Mơ bol khai rơp ò gam lơbơn òsô tai.

¹³ Gen ală cau ơruh dềt rơp hòn chò tòmya, Ală klau pơnu mơ ală ồng kra kung rơp chò hòp bal Añ rơp tòmgơl bơta ñìm rac bol khai dê gơlik gơs bơta hòn chò, Añ rơp pơndòm pơniang bol khai ai hòn chò ala moat jrùng.

¹⁴ Añ rơp ai ală cau gơnoar ơn phan duh khoai bol khai dê geh bềng lìu phan sa dơngi, Mơ làng bol Añ jê rơp geh hừh hơh bơh bơta tơngkah tơngkañ Añ jê,” Yàng Jehôwa đơs behơ̆.

¹⁵ Yàng Jehôwa đơs be do: “Cau kơno tòm Rama, Bơta rac ròc mơ nggà ñìm dờng, Racel ñìm bơh ală kòn khai dê, Ò bài pơndòm pơniang Tài bơh ală kòn khai dê ò gam tai!”

¹⁶ Yàng Jehôwa đơs be do: “Ơm tĕ, bañ ñìm tai, Dà mat bol mê bañ hòr tai, Bơh broă lơh bol mê dê rơp geh phan ƀàn; Bol khai rơp rê wơl bơh di lơgar cau sò tơm dê,” Yàng Jehôwa đơs behơ̆.

¹⁷ Yàng Jehôwa đơs lah: “Behơ̆ rơp gơs bơta gơn kơnòm tòm tơngai tơnơ̆ bol mê dê; Kòn sau bol mê rơp rê wơl hơ lơgar tòm bol khai dê.

¹⁸ Ngan, Añ neh kơno Epraim ñìm rac: ‘Kơnràñ lơh glài tơmàl añ, añ kong bơta lơh glài; Kung be dô nơm kơnrồ dam òhềt tui yô. Cèng brê tĕ añ, lòi añ in rê wơl, Bơh Kơnràñ la Jehôwa Yàng Tom Trồ añ jê!

¹⁹ Bơh tơnơ̆ mơ tŭ añ lòt tìs nrah, añ neh gơjrañ sang glài; Tơnơ̆ mơ tŭ añ neh git wă, añ tur di ntơh añ jê. Añ neh kong ƀàssìl ƀàsso mơ sền òsơp, Añ kong sền òsơp bơh pah rài kơnòm să añ jê.’

²⁰ Epraim ò di la kòn klau gơboh đềt mềr Añ jê ơ? La kòn mơ Añ niam nùs ò ơ? Bulah Añ òs lah pơrhơng khai, Añ gam kah khai sùm. Gen tàng nùs Añ rngoh rngac ngan bơh khai; Nền cê ngan Añ rơp nđàc sơngit di khai,” Yàng Jehôwa đơs behơ̆.

²¹ “Bơtào tĕ ală tềl sơnio gùng, Lơh tĕ bol mê in ală jrong sơnio gùng. Đal git nền ală gùng me, La gùng bol mê neh lòt. Ơ cau ơruh dềt Israel, rê wơl tĕ Rê wơl hơ ală ƀòn dờng bol ai dê!

²² Ơ kòn ùr ò dòn song, ai rơp lòt lềng làng jơl tus di tŭ lơi taih? Bơh Yàng Jehôwa neh bơtào gơs dô bơta pa hơđang ù, Hơ̆ la cau ùr rơp gòm gơrwàng cau klau.”

²³ Yàng Jehôwa Gơnap Gơnoar Dờng Làm Jơh la Yàng Tom Trồ Israel dê đơs be do: “Tòm tŭ añ cèng bol khai rê wơl bơh di tiah kong kup cèng pơrdô gen làng bol tòm lơgar Juda mơ tòm ală ƀòn dờng gơ dê rơp dô dơ̆ tai đơs ală jơnau do: ‘Dan Yàng Jehôwa ai lơngai mê in, Ơ tiah ơm bơta song ring, ơ mơnơm sàng goh.’

²⁴ Làng bol rơp ơm bal tòm Juda mơ tòm ală ƀòn dờng gơ dê, ală cau lơh sre bal mơ ală cau ê mpồl phan poan jơng bol khai dê.

²⁵ Añ rơp ai cau bòl glar in geh pràn wơl, Ai cau gơplơ̆ nùs in geh hừh hơh.”

²⁶ Tŭ hơ̆ añ kah rngal wơl mơ sền gùt dar. Bơta bic lơhă añ jê la niam ngan añ in.

Cồng nha kòp nă cau dê

²⁷ Yàng Jehôwa đơs: “Ală ngai hơ̆ rơp tus, la tòm tŭ Añ rơp tam hìu Israel mơ hìu Juda mơ gar sơntìl jơi kòn mơnus mơ gar sơntìl jơi phan poan jơng sơl.

²⁸ Kung be Añ neh sền gàr bol khai, nàng dus, phà tơrlah, tuh tơlup, tơnroh, mơ lơh bòl glar mbe lơi, gen Añ kung rơp sền gàr nàng bơt bơtào, tam wơl kung behơ̆,” Yàng Jehôwa đơs behơ̆.

²⁹ “Tòm ală ngai hơ̆, cau rơp ò gam đơs tai lah: ‘Ồng pàng sa plai ño sràt mơ kòn sau pal kìr sề.’

³⁰ Mơya kòp nă rơp chơt tài bơh bơta iơh bơsak he; dilah cau lơi sa plai ño sràt, gen cau hơ̆ pal kong kìr sề he sơl.”

Bơta ho bal pa

³¹ Yàng Jehôwa đơs: “Ală ngai nền cê ngan rơp tus, tŭ hơ̆ Añ rơp bơt bơtào dô nơm bơta ho bal pa hìu Israel bal mơ hìu Juda in.

³² Bơta ho bal do rơp ò jat bơta ho bal mơ Añ neh ho mơ ồng pàng bol khai dê tòm ngai Añ at tê tề lam bol khai lik bơh lơgar Ejiptơ, hơ̆ la bơta ho bal mơ bol khai neh sang lòi, bulah Añ la bau klau bol khai dê,” Yàng Jehôwa đơs behơ̆.

³³ Yàng Jehôwa đơs: “Do la bơta ho bal mơ Añ rơp bơtào bal mơ hìu Israel tơnơ̆ mơ ală ngai hơ̆. Añ rơp ơn bơta boh lam Añ tòm dơngoh bol khai mơ cih tòm nùs bol khai. Añ rơp lơh gơs Yàng Tom Trồ bol khai, bol khai rơp lơh gơs làng bol Añ jê.

³⁴ Bol khai kòp nă rơp ò bơto cau gơp ƀòn he hala oh mi he, mơ lah: ‘Đal git tĕ Yàng Jehôwa!’ Tài bơh bol khai jơh tơl nă rơp đal git Añ, cau dềt kung be cau dờng.” Yàng Jehôwa đơs: “Añ rơp toh bơta iơh bơsak bol khai dê, mơ ò kah bơta tìs bol khai tai.”

³⁵ Yàng Jehôwa, la Bơtau neh ai gơnoar sồr mattơngai lơh gơs bơta àng trồ ngai, Ai gơnoar sồr mat kơnhai mơ sơmañ lơh gơs bơta àng tòm trồ mang, Bơtau lơh lơnggac dàlềng, tian gơs ryà gơ nggồr ur ur, Yàng Jehôwa Gơnap Gơnoar la sơnđan Kơnràñ dê đơs lah:

³⁶ “Dilah gơnoar sồr hơ̆ Roh thit di đap Añ, Gen tŭ hơ̆ jơi bơtiàn Israel rơp ò gam la dô nơm lơgar ơm sùm di đap Añ tai.” Yàng Jehôwa đơs behơ̆.

³⁷ Yàng Jehôwa đơs be do: “Dilah hơđang rgơi was sơnoa ală tap trồ, Hala hơđơm rgơi was sơnoa kơnàng plai ù; Gen kung behơ̆, Añ rơp sang lòi jơh jơi bơtiàn Israel Tài bơh ală bơta bol khai neh lơh.” Yàng Jehôwa đơs behơ̆.

Jerusalem geh pò ơnàng

³⁸ Yàng Jehôwa đơs: “Ală ngai rơp tus, tŭ ƀòn dờng rơp geh bơt bơtào wơl Yàng Jehôwa in, bơh Theng Hananel tus di Mpồng Mum.

³⁹ Che was rơp dang hơđang dòr Garep, mơ lòt pơdar tus di Gôa.

⁴⁰ Jơh tiah tòm thòng gơs ală ƀồc mơ bùh, jơh ală ƀlàng sre tus di Thòng Kidrôn mơ tus di mum Mpồng Ơseh bơh đah mattơngai lik, gen rơp geh ơn is goh Yàng Jehôwa in. Gơ rơp ò kong dus sang hala kong tơnroh tai.”