Jeremi 30 - Sră Goh 2018

Jơnau ho bơtào wơl Israel mơ Juda

¹ Gơs jơnau Yàng Jehôwa dê đơs mơ Jeremi lah:

² “Jehôwa, Yàng Tom Trồ Israel dê, đơs be do: ‘Cih tĕ tòm dô nơm sră jơh ală jơnau Añ neh đơs mơ mê.’

³ Yàng Jehôwa đơs lah: ‘Ală ngai nền cê ngan rơp tus, tŭ hơ̆ Añ rơp bơtào wơl sre brê làng bol Añ jê, Israel mơ Juda, Yàng Jehôwa đơs, mơ Añ rơp cèng bol khai in rê wơl tòm lơgar mơ Añ neh ai ồng pàng bol khai in, mơ bol khai rơp geh lơgar hơ̆ lơh gơs sre brê.’”

⁴ Do la ală jơnau Yàng Jehôwa dê đơs bơh Israel mơ Juda.

⁵ “Yàng Jehôwa đơs be do: ‘Bol he neh kơno jơnau driau nggà rngòt rngơt, ò di jơnau lơngap lơngai.

⁶ Lòt sền tĕ, lùp tĕ Di ngan cau klau deh kòn sơl? Ñchi bơh tài Añ gŏ kòp nă cau klau gen ai tê he ơn di but he tòm toh be cau ùr jê deh taih? Ñchi bơh tài muh mat cau lơi kung pàl lơm?

⁷ Bòl glar ngan! Ngai hơ̆ cù kìr dờng ngan, Tian gơs òhềt gơs dô ngai lơi tòm toh behơ̆. Hơ̆ la tŭ bòl glar Jakôp dê! Mơya khai rơp geh dong klàs bơh bơta hơ̆.’

⁸ Yàng Jehôwa Gơnap Gơnoar đơs lah: ‘Tòm ngai hơ̆, Añ rơp dơrpă yô bơh di ngko mê; Rơp gơltac che cap mê, Cau crih mat rơp ò kup bol khai duh broă tai;

⁹ Mơya bol khai rơp duh broă Jehôwa Yàng Tom Trồ bol khai dê, Mơ Dabit bơtau bol khai dê, Mơ Añ rơp tơngguh bol khai in.’

¹⁰ Yàng Jehôwa đơs: ‘Ơ Jakôp, mê la dĭ gơna Añ, bañ rngòt. Ơ Israel, bañ rngòt rngơt! Añ rơp dong klàs mê bơh tiah ngài, Mơ jơi bơtiàn mê bơh lơgar kong kup cèng gơs dĭ. Jakôp rơp rê wơl geh ring lơngai mơ lơngap lơngai, Ò gơs cau lơi lơh khai in rngòt rngơt.’

¹¹ Yàng Jehôwa đơs: ‘Bơh Añ ơm bal mơ mê nàng dong tă mê. Añ rơp tơnroh jơh ală lơgar Mơ Añ neh lơh mê in nrah nring tòm hơ̆, Mơya mê gen Añ ò tơnroh jơh. Añ rơp lơh glài tơmàl mê, Mơya ò tŭ lơi lòi mê klàs bơh bơta lơh glài.’

¹² Yàng Jehôwa đơs be do: ‘Tềl sồt mê ò geh sơm, Sồt rmàñ mê kơnjơ̆ ngan.

¹³ Ò gơs cau lơi dong tò broă mê dê Ò gơs sơnơm lơi sồt rmàñ mê in, Ò gơs bơta sơmbòi mê in.

¹⁴ Ală cau kòñ gơboh mê neh hŭi mê, Ò kơlôi rcang mê in dô êt lơi; Bơh Añ neh lơh mê kong sồt kung be cau sò tơm lơh, Lơh glài mê kung be cau rhung rhang lơh glài, Tài bơh bơta tìs glài mê dờng ngan, Tồi glài mê oă ngan.

¹⁵ Ñchi bơh tài mê driau nggà bơh tềl sồt mê? Bơta jê sồt mê ò rgơi sơm. Hơ̆ la tài bơh bơta tìs glài mê dờng ngan, Tồi glài mê oă ngan, Gen Añ neh lơh ală bơta do mê in.

¹⁶ Gen tàng ală cau loan mê rơp kong loan; Jơh ală cau sò tơm mê, kòp nă rơp kong kup cèng gơs dĭ; Ală cau phà kơñau bol mê rơp kong phà kơñau, Ai ală cau ơn dòm mê, Añ kung rơp lơh khai in kong ơn dòm.’

¹⁷ Yàng Jehôwa đơs: ‘Añ rơp ai wơl bơta pràn mê in, Mơ tềl sồt mê dê Añ rơp sơm, Bơh bol khai neh sơnđan mê la cau kong sang lòi: “Hơ̆ la Siôn, ò gơs cau lơi wèt sền tai!”’

¹⁸ Yàng Jehôwa đơs be do: ‘Añ rơp cèng ală sàl Jakôp rê wơl klàs bơh bơta kup cèng gơs dĭ, Añ rơp nđàc sơngit tiah ơm khai dê; Ƀòn do rơp bơt bơtào wơl hơđang tiah tơrlah tơrling gơ dê, Hìu gơlang rơp geh bơtào di tiah yau òr.

¹⁹ Bơta ưnngài rơp tus bơh di bol khai Mơ jơnau driau chò ală cau chò hòp dê. Añ rơp lơh bol khai gơlik bơtơl oă ngan, mơ bol khai rơp ò gơs dô êt. Añ kung rơp lơh bol khai geh dờng màng, ò gam kong sền òsơp tai.

²⁰ Kòn sau bol khai rơp kung be yau òr; Mpồl jơnum bol khai rơp geh bơtào kơ̆ di đap Añ; Mơ Añ rơp lơh glài jơh ală cau rồn bơklơn bol khai.

²¹ Ală kwang bơtau la cau tòm bol khai dê, Cau at bồ rơp gơlik gơs bơh digùl bol khai. Añ rơp cèng khai tus rềp, gen khai rơp tus rềp mơ Añ; Bơh ñcau neh gơs bơta khin cha tus rềp mơ Añ taih? Yàng Jehôwa đơs behơ̆.

²² Behơ̆ gen, bol mê rơp lơh gơs làng bol Añ, Añ rơp lơh gơs Yàng Tom Trồ bol mê.’”

²³ Ne sền, càl rbut dờng Yàng Jehôwa dê! Bơta gơjrañ dờng Kơnràñ dê neh tơngguh, Dô nơm càl wàl bong, gơ rơp khồm druh hơđang bồ cau iơh.

²⁴ Bơta gơhào gơjrañ Yàng Jehôwa dê ò ruc wơl Jơl tus di tŭ Kơnràñ neh lơh wil tơl, Nùs kòñ Kơnràñ dê. Tòm ală ngai lồi dut, Bol mê rơp wă wơng ală bơta hơ̆.