Jeremi 26 - Sră Goh 2018

Jơnau bơto tơngkah Jeremi dê gơkòl làng bol sang lòi. Khai kong kup, jàm, mơ geh hồ toh

¹ Tŭ Jehôyakim, kòn klau Jôsia, bơtau lơgar Juda, rơp sơntòm at bồ, gơs jơnau do bơh Yàng Jehôwa.

² Yàng Jehôwa đơs be do: “Ntào tĕ tòm rơng hìu Yàng Jehôwa, mơ đơs ală jơnau Añ sồr mê đơs mơ ală cau tòm ală ƀòn Juda neh tus nàng duh khoai tòm hìu Yàng Jehôwa dê; bañ pơndut dô jơnau lơi.

³ Digơlan bol khai rơp iat mê, mơ kòp nă rơp sang gùng iơh bol khai dê; tồ Añ in rơp tòmgơl nùs bơh bơta rung rài mơ Añ neh lơh nền tuh hơđang bol khai, bơh broă iơh bol khai neh lơh.

⁴ Mê pal đơs bol khai in lah: Yàng Jehôwa đơs be do: ‘Dilah bol mê ò bài iat Añ, ò lòt jat bơta boh lam Añ neh ơn di đap bol mê;

⁵ Ò iat jơnau ală dĭ gơna Añ jê, la ală cau gơnoar hwơr Añ sồr tus mơ bol mê jal ngan, mơya bol mê ò bài iat bol khai,

⁶ gen Añ rơp lơh hìu do gơlik gơs kung be Silô, mơ rơp lơh ƀòn do gơlik gơs bơta srat rma jơh ală lơgar hơđang plai ù in.’”

⁷ Ală cau gơnoar ơn phan duh khoai, ală cau gơnoar hwơr, mơ jơh làng bol neh kơno Jeremi đơs ală jơnau hơ̆ tòm hìu Yàng Jehôwa.

⁸ Tŭ Jeremi neh đơs sir ală bơta Yàng Jehôwa neh sồr ồng yal jơh ală làng bol in, gen ală cau gơnoar ơn phan duh khoai, ală cau gơnoar hwơr, mơ jơh làng bol kup khai mơ đơs lah: “Mê ngan rơp chơt!

⁹ Ñchi bơh tài mê ai sơnđan Yàng Jehôwa mơ đơs hwơr lah: ‘Hìu do rơp gơlik gơs kung be Silô, ƀòn dờng do rơp lòi srau mơ ò gơs cau ơm taih’?” Tŭ hơ̆ jơh làng bol gơrwàng gùt dar Jeremi tòm hìu Yàng Jehôwa.

¹⁰ Ală kwang at bồ Juda kơno ală bơta hơ̆, bơh tòm gơlang bơtau guh hơ hìu Yàng Jehôwa, nggui tòm gùng mut Mpồng Pa hìu Yàng Jehôwa dê,

¹¹ Gen ală cau gơnoar ơn phan duh khoai mơ ală cau gơnoar hwơr đơs mơ ală cau kwang at bồ mơ làng bol lah: “Cau do pal chơt; bơh neh đơs hwơr tòmdră mơ ƀòn do, kung be tồr bol mê dê neh kơno.”

¹² Gen Jeremi đơs mơ ală cau kwang at bồ mơ jơh làng bol lah: “Hơ̆ la Yàng Jehôwa neh sồr añ nàng đơs hwơr tòmdră mơ hìu do mơ ƀòn do, mơ oh mi neh kơno.

¹³ Tŭ do oh mi pal rcang wơl gùng dà mơ broă lơh oh mi dê, dòn bơr lơh jat tĕ jơnau đơs Jehôwa Yàng Tom Trồ oh mi dê, gen Yàng Jehôwa rơp tòmgơl bơh bơta rung rài mơ Kơnràñ neh yal tơnggit tòmdră mơ oh mi.

¹⁴ Đah pơnah mơ añ, do, añ ơm tòm tê oh mi dê, lơh tĕ añ in bơta lơi oh mi sền la niam la di.

¹⁵ Mơya pal git nền la dilah oh mi tơnchơt añ, gen oh mi bal mơ ƀòn do mơ làng bol gơ rơp àñ mhàm ò gơs glài. Bơh Yàng Jehôwa ngan neh sồr añ tus mơ oh mi, sồr đơs ală jơnau do tòm tồr oh mi dê.”

¹⁶ Ală kwang at bồ mơ jơh làng bol, đơs mơ ală cau gơnoar ơn phan duh khoai mơ ală cau gơnoar hwơr lah: “Cau do ò di pal chơt; bơh khai ai sơnđan Jehôwa Yàng Tom Trồ bol he dê mơ đơs mơ bol he.”

¹⁷ Bàr pe nă cau kwang kra tòm lơgar ñă ntào đơs mơ jơh mpồl làng bol be do:

¹⁸ “Mice ơm tòm Môreset, la cau đơs hwơr bơh rài Ejekia, bơtau Juda, neh đơs mơ jơh làng bol Juda lah: Yàng Jehôwa Gơnap Gơnoar đơs be do: ‘Siôn rơp kong troă kung be sre, Jerusalem rơp gơlik gơs kung be gơnru lŭ, Mơnơm Hìu duh khoai rơp gơlik gơs tiah brê dơr.’

¹⁹ Ejekia bơtau Juda, mơ jơh Juda, neh tơnchơt khai sơl? Ò di Ejekia neh duh rngòt Yàng Jehôwa mơ rac dan bơta nđàc Yàng Jehôwa dê ò ơ? Behơ̆ gen Yàng Jehôwa neh tòmgơl bơh bơta rung rài mơ Kơnràñ neh yal tơnggit tòmdră mơ bol khai. Ngai do dilah bol he tơnchơt Jeremi, hơ̆ la tìs glài kơnjơ̆ gen rơp toès wơl bơta rung rài să tòm he in.”

²⁰ Mơ kung gơs dô nă cau ndai tai neh ai sơnđan Yàng Jehôwa mơ đơs hwơr: hơ̆ la Uria, kòn klau Semayah, ơm tòm Kiriat Jearim. Khai kung đơs hwơr tòmdră mơ ƀòn mơ lơgar do tòm toh be ală jơnau Jeremi dê.

²¹ Bơtau Jehôyakim, jơh ală mpồl ling, mơ ală kwang at bồ neh kơno ală jơnau khai, gen bơtau kòñ tơnchơt khai; mơya Uria neh git, gen rngòt mơ dô tus tòm lơgar Ejiptơ.

²² Gen bơtau Jehôyakim sồr Elnathan, kòn klau Akbô, mơ bàr pe nă ndai tai lòt tus hơ Ejiptơ,

²³ cèng Uria bơh Ejiptơ rê wơl hơ bơtau Jehôyakim. Bơtau sồr ngui đào sreh tơnchơt khai mơ cơm ƀồc khai tòm bơtô ƀồc cau òs dê.

²⁴ Mơya tŭ hơ̆, Ahikam, kòn klau Saphan, dong tò Jeremi, mơ kơryan ò ai jào khai tòm tê làng bol nàng tơnchơt.