Jeremi 24 - Sră Goh 2018

Bàr bài plai chi ƀal

¹ Yàng Jehôwa yal tơnggit añ in, ne, gơs bàr nơm bài plai chi ƀal ơn di đap hìu duh khoai Yàng Jehôwa. Hơ̆ la tơnơ̆ mơ tŭ Nebukatnessar, bơtau Babilôn, neh kup Jekônia, kòn klau Jehôyakim, bơtau Juda, ală cau kwang at bồ Juda, ală cau chài lơh ală broă mơ ală cau chài tiar lòs bơh ƀòn dờng Jerusalem cèng hơ Babilôn.

² Dô nơm tòm bàr nơm bài geh ơn ală plai chi ƀal niam ngan, kung be plai chi ƀal bồ sơnam; ai dô nơm bài ne gen ơn plai ò niam dô êt lơi, iơh ngan tian gơs ò rgơi sa.

³ Yàng Jehôwa đơs mơ añ lah: “Ơ Jeremi, ñchi mê gŏ taih?” Añ ho lah: “Plai chi ƀal, ală plai niam gen niam ngan, ai ală plai ò niam gen iơh ngan, iơh ngan tian gơs ò rgơi sa.”

⁴ Gen jơnau Yàng Jehôwa đơs mơ añ lah:

⁵ “Jehôwa Yàng Tom Trồ Israel dê đơs be do: ‘Kung be ală plai chi ƀal niam do, Añ kung rơp sền ală cau kup cèng gơs dĭ Juda dê, mơ Añ neh bơtrơh bơh tềng do tus tòm lơgar cau Kalde, lòi bol khai in gơs kwơ.

⁶ Añ rơp ơn mat Añ hơđang bol khai sùm, mơ Añ rơp cèng bol khai rê wơl tòm lơgar do, bơtào gơs mơ ò phà tai, tam wơl mơ ò dus sang tai.

⁷ Añ rơp ai bol khai in nùs đal git Añ la Yàng Jehôwa. Bol khai rơp lơh gơs làng bol Añ, mơ Añ rơp lơh gơs Yàng Tom Trồ bol khai; bơh bol khai rơp jơh nùs rê wơl mơ Añ.’

⁸ ‘Ai Jedekia, bơtau Juda, ală kwang at bồ bal mơ làng bol gam ơm wơl tòm ƀòn dờng Jerusalem, la làng bol gam ơm tòm lơgar do, mơ ală cau ơm tòm lơgar Ejiptơ, gen gơwèt mơ ală plai chi ƀal ò niam cau ò rgơi sa mbe lơi, Añ kung rơp lơh bol khai in ndròm bal behơ̆.

⁹ Añ rơp lơh bol khai in gơlik dô bơta rngòt rngơt, dô bơta iơh rmơh ală lơgar tòm plai ù in, dô bơta dơñŏ tơnhial, jơnau đơs kơnhơl, lah sơrpah, srat sơntơm, tòm ală lơgar mơ Añ rơp bơtrơh bol khai.

¹⁰ Añ rơp sồr pềs tà, jơgloh rung, pluh plàng tus hơđang bol khai, jơl tus di tŭ bol khai kong tơnroh jơh hir bơh lơgar Añ neh ai bol khai in bal mơ ồng pàng bol khai dê.’”