Jeremi 21 - Sră Goh 2018

Jerusalem rơp dùh tòm tê Nebukatnessar

¹ Do la jơnau Yàng Jehôwa yal Jeremi in, tŭ bơtau Jedekia sồr Pasur kòn klau Malkiah, mơ Sôphôni, kòn klau cau gơnoar ơn phan duh khoai Maaseyah, tus đơs mơ khai lah:

² “Dan hòi lùp Yàng Jehôwa bol he in, bơh Nebukatnessar, bơtau Babilôn, neh tus tòmlơh mơ bol he; digơlan Yàng Jehôwa rơp lơh ală broă crih crài bol he in be Kơnràñ òs lơh, mơ rơp lơh khai in lik ngài bơh bol he.”

³ Gen Jeremi đơs mơ bol khai lah: “Yal tĕ mơ Jedekia lah:

⁴ ‘Jehôwa Yàng Tom Trồ Israel dê, đơs be do: Añ rơp tơrwơl ală phan tòmlơh tòm tê bol mê at nàng tòmdră mơ bơtau Babilôn mơ cau Kalde ơm gơrwàng bol mê đah bơdìh dơrñang, gen Añ rơp cèng tơrgòm gơtơmut digùl ƀòn dờng do.

⁵ Să tòm Añ rơp tòmlơh tòmdră mơ bol mê, mơ tê pò tơlik, mơ tơwòr tê pràn kơldang, tòm bơta gơjrañ, tòm bơta gơhào gơjrañ mơ bơta gơjrañ dờng.

⁶ Añ rơp pù lơh làng bol ơm tòm ƀòn dờng do, kòn mơnus bal mơ phan poan jơng; bol khai rơp chơt bơh pluh plàng dờng ngan.’

⁷ Yàng Jehôwa đơs: ‘Tơnơ̆ mơ hơ̆, Añ rơp jào Jedekia, bơtau Juda, dĭ gơna mơ làng bol khai dê, hơ̆ la ală cau gam wơl tòm ƀòn dờng, neh klàs bơh pluh plàng, pềs tà, jơgloh rung, Añ rơp phi bol khai tòm tê Nebukatnessar, bơtau Babilôn, tòm tê ală cau sò tơm bol khai dê mơ ală cau kòñ jòi bơta kis bol khai dê. Nebukatnessar rơp tơnchơt bol khai mơ đào, ò pơlai, ò kòñ nđàc, ò git nđàc sơngit.’

⁸ Mê đơs tĕ mơ làng bol do lah: ‘Yàng Jehôwa đơs be do: Sền do, Añ ơn di đap bol mê gùng kis mơ gùng chơt.

⁹ Cau lơi kư̆ ơm wơl tòm ƀòn dờng do rơp chơt bơh pềs tà, jơgloh rung, mơ pluh plàng; mơya cau lơi lik, kong alah mơ cau Kalde, hơ̆ la cau ơm gơrwàng bol mê; gen rơp kis, mơ bol khai rơp geh bơta kis.’

¹⁰ Yàng Jehôwa đơs: ‘Bơh Añ ơn mat Añ tòmdră mơ ƀòn dờng do, bơta iơh ò di la bơta niam; gơ rơp kong phi tòm tê bơtau Babilôn, mơ khai rơp chu gơ mơ ồs.’

¹¹ Bơh hìu bơtau Juda, mê đơs tĕ: ‘Iat tĕ jơnau Yàng Jehôwa dê,

¹² Ơ hìu Dabit! Yàng Jehôwa đơs be do: Tŭ àng drim lơh tĕ bơta song ring. Dong tă cau kòl kup bơklơn lik klàs bơh tê cau rồn bơklơn, Rngòt bơh bol mê lơh bơta iơh bơsak, Mơ bơta gơjrañ dờng Añ jê hìt be ồs, ò gơs cau lơi rgơi đơp chơt gơ.’

¹³ Yàng Jehôwa đơs: ‘Do, ơ ală cau ơm tòm thòng, Ơ pơnai lŭ tòm ƀlàng ring ne, Añ tòmdră mơ bol mê, La ală cau khin đơs lah: Ñcau rơp mù tòmdră mơ bol he? Ñcau rgơi mut tòm tiah bol he ơm crŭ taih?’”

¹⁴ Yàng Jehôwa đơs: “Añ rơp lơh glài bol mê jat be cồng nha broă lơh bol mê dê; Añ rơp sing ồs tòm dơr brê bol mê, Ồs rơp sa loan jơh ală phan gùt dar gơ.”