Jeremi 2 - Sră Goh 2018

Jơnau đơs hwơr bơh lơgar Juda ( 2:1 – 45:5 ) Yàng Tom Trồ pơndang mơ Israel nàng gơjrañ sang glài

¹ Gơs jơnau Yàng Jehôwa đơs mơ añ lah:

² Lòt tĕ, mơ đơs di tồr làng bol Jerusalem in kơno lah: “Yàng Jehôwa đơs be do: ‘Añ gam kah nùs duh hul mê dê bơh tŭ gam kơnòm să, Nùs kòñ gơboh mi dê be dô nă ƀan pa rê hìu bau klau, Mbe mê neh jat Añ tòm ƀlàng ngềt ngơt, tòm ù tiah ò sih ò tam.

³ Israel la làng bol sàng goh Yàng Jehôwa in; La plai bồ sơnam cồng nha Kơnràñ dê. Dilah cau lơi sa loan làng bol hơ̆ rơp gơkòl glài; Bơta rung rài neh tus hơđang bol khai.’” Yàng Jehôwa đơs behơ̆.

⁴ Ơ hìu Jakôp, bal mơ jơh ală hìu nhă Israel dê, iat tĕ jơnau Yàng Jehôwa!

⁵ Yàng Jehôwa đơs be do: “Ồng pàng bol mê neh gŏ bơta lơi ò song ring tòm Añ, tàng neh lòt ngài bơh di Añ; Neh lòt jat bơta roh lơm, Mơ gơlik gơs ò kwơ să tòm bol khai in?

⁶ Bol khai ò tŭ lơi lùp: ‘Ntềng đah Yàng Jehôwa taih? La Bơtau neh cèng bol hi lik bơh lơgar Ejiptơ, Bơtau neh lam bol hi tòm ƀlàng ngềt ngơt, Tòm dô bă tiah ƀlàng bràs mơ ală trồm tơrluh, Tòm dô bă tiah ro rañ mơ klam jơngo cik, Tòm dô bă tiah ò gơs dô nă cau lơi lòt gan, tiah ò gơs dô nă cau lơi ơm?’

⁷ Añ neh cèng bol mê mut tòm dô nơm lơgar ù bơkah tiah lơngồt, nàng sa plai mơ dòp ală bơta niam gơ dê. Mơya tòm tŭ bol mê neh mut, gen bol mê neh lơh ƀơ̆ ƀơl lơgar Añ, neh lơh sre brê Añ jê gơlik gơs ngkòr ngkàc.

⁸ Ală cau gơnoar ơn phan duh khoai kung ò lùp: ‘Ntềng đah Yàng Jehôwa taih?’ Ală cau bơto bơta boh lam kung ò git Añ. Ală cau ê gàr neh pơrlơ̆ dră di Añ. Ală cau gơnoar hwơr ai sơnđan Baal mơ đơs hwơr, mơ lòt jat ală bơta ò gơs kwơ.”

⁹ Yàng Jehôwa đơs lah: “Gen tàng dô dơ̆ tai Añ lơh nền glài bol mê, mơ Añ lơh nền glài kòn sau set se bol mê dê.

¹⁰ Lòt tus tĕ hơ bồt pơlào Kittim mơ sền! Sồr cau tus hơ Keda, mơ sền nề nề; lòng sền dilah tềng hơ̆ gơs ală broă behơ̆ sơl.

¹¹ Gơs lơgar lơi tòmgơl yàng gơ dê, Bulah gơ ò di la yàng sơl? Mơya làng bol Añ neh tòmgơl bơta gơklŏ bol khai dê Bơh ală rùp ràk ò kwơ!

¹² Ơ ală tap trồ, ai lơh krơi tĕ bơh bơta hơ̆; Nrơt nrơl tĕ, neh roh gơprah jơh.” Yàng Jehôwa đơs behơ̆.

¹³ “Làng bol Añ neh lơh bàr bơta iơh: Bol khai neh sang lòi Añ, La hiòng dà bơta kis, Mơ tò is tơrlung dà bol khai in, ală tơrlung dà neh dàng, Ò rgơi ơn dà.

¹⁴ Israel la dô nă cau dĭ ơ? Khai la cau duh broă deh tòm hìu ơ? Ñchi bơh tài khai gơkòl phi tòm bơta tòmpìt sơmbrơt taih?

¹⁵ Ală klìu triă neh ơluh ơhùm tòmdră mơ khai, Bol gơ ơluh ơhùm dờng ngan, Mơ gơlơh ù tiah khai dê gơlik gơs ngềt ngơt. Ală ƀòn dờng khai gơkòl tơnroh gơprah, ò gơs cau ơm.

¹⁶ Rlau mơ hơ̆, làng bol Memphis mơ Tahpanhes dê neh lơh bơcah sơgơn bơtau di bồ mê.

¹⁷ Ò di bol mê neh cèng bơta hơ̆ tus hơđang să tòm bol mê in, Bơh neh sang lòi Jehôwa Yàng Tom Trồ mê, Tŭ Kơnràñ neh lam bol mê tòm gùng lòt ơ?

¹⁸ Gen ñchi bơta mê geh tŭ lòt hơ Ejiptơ, Nàng hùc dà hiòng Nil ơ? Hala bol mê geh bơta lơi tŭ lòt hơ Asiri, Nàng hùc dà hiòng Ơphrat ơ?

¹⁹ Bơta iơh bơsak mê dê rơp lơh glài mê, Bơta pơrlơ̆ dră mê dê rơp lah pơrhơng mê, sền mơ git tĕ lah hơ̆ la bơta iơh mơ hòi bơtang ngan bơh bol mê neh sang lòi Jehôwa Yàng Tom Trồ mê dê, tòm mê ò gơs nùs duh rngòt di Añ.” Yàng la Yàng Jehôwa Gơnap Gơnoar đơs behơ̆.

²⁰ “Bơh lài òr Añ neh dơrpă yô mê dê, Gơltac che sreng mê dê, Mơ mê đơs lah: ‘Añ rơp ò duh broă!’ Hơđang kòp nơm dòr jơnhoa, mơ hơđơm kòp nơm chi tơlir, Mê neh kun să mơ lơh bơta dri tơlàr.

²¹ Añ neh tam mê kung be dô nơm chi ño sac rwah; Dô nơm chi ño niam goh rlau jơh. Mơya mbe mê neh gơlik ală ntê ò niam, mơ gơlik dô tòm ño brê taih?

²² Bulah mê neh rào să mê mơ kơmbuh pìh, mơ ngui oă kơmbuh nàng um să he, Tồi glài mê kung gam cih kah sùm di đap Añ.” Yàng Jehôwa đơs behơ̆.

²³ “Mbe mê khin đơs lah: ‘Añ ò ƀơ̆ ƀơl; Añ òhềt lòt jat rùp ràk Baal’? Sền tĕ gùng mê dê tòm thòng; git tĕ bơta mê neh lơh, Kung be làkđa dra sơrbac sơrbang mơ gơlềng gơlàng,

²⁴ Kung be alàng me brê, mòng ơm tòm tiah ngềt ngơt, Di tŭ gơ duh rhềp càl kòñ dam, Ñcau rgơi kơryan gơ hàm kòñ taih? Ală cau jòi gơ ò bòl glar, Tus di kơnhai gơ dê, bol khai rơp jòi bàn gơ.

²⁵ Kơrmap gàr tĕ jơng mê bañ lòt jơng gòi, Mơ ngko rnồng mê bañ tơhìr! Mơya mê đơs lah: ‘Hơ̆ la ò gơs gơn kơnòm! Bơh añ neh kòñ gơboh ală cau crih mat, Mơ añ rơp jat bol khai.’

²⁶ Be dô nă cau ntung kơñau ƀàssìl, tòm tŭ gơkòl kup geh, Behơ̆ sơl hìu Israel kung rơp gơkòl ƀàssìl, Bol khai, ală cau bơtau bol khai dê, ală cau kwang bol khai dê, Ală cau gơnoar ơn phan duh khoai bol khai dê, mơ ală cau gơnoar hwơr bol khai dê, kung rơp ƀàssìl behơ̆.

²⁷ Bol khai đơs mơ dô nơm chi lah: ‘Kơnràñ la bèp añ,’ mơ đơs mơ lŭ lah: ‘Kơnràñ neh tơnggơs añ.’ Bơh bol khai neh wèt ngkòi hơ Añ, Mơ ò di la muh mat bol khai dê. Mơya, tòm tŭ rung rài, bol khai đơs lah: ‘Tus tĕ, dong kòl bol hi!’

²⁸ Mơya ntềng đah ală yàng bol mê dê, bol mê neh mòn să tòm bol mê in taih? Lòi bol gơ tus, dilah bol gơ rgơi dong tă bol mê! Tòm tŭ bol mê gơtìp bơta bòl glar. Ơ Juda, bol mê gơs oă ală yàng rùp ràk, kung be bol mê gơs oă ƀòn dờng behơ̆ sơl!

²⁹ Ñchi bơh tài bol mê yoam tòmdră mơ Añ taih? Jơh ală bol mê neh pơrlơ̆ dră tòmdră mơ Añ.” Yàng Jehôwa đơs behơ̆.

³⁰ “Añ neh pù lơh kòn sau bol mê dê la ò kwơ; Bol khai ò bài dòp bơta bơto sồr. Đào bol mê neh tơnroh ală cau gơnoar hwơr, Be klìu triă phà tơnroh.

³¹ Ơ jơi bơtiàn bol mê! Sền nền tĕ jơnau Yàng Jehôwa đơs: Añ la dô nơm ƀlàng ngềt ngơt, hala dô bă ù tiah klam jơngo cik gơwèt hơ làng bol Israel ơ? Behơ̆ gen ñchi bơh tài làng bol Añ đơs lah: ‘Bol hi geh khat gơboh, Bol hi rơp ò tus mơ Kơnràñ tai’?

³² Dô nă kòn ơruh rgơi hŭi phan bơka să khai dê, Hala dô nă ƀan pa hŭi phan soh mơ phan bơka să he dê ơ? Mơya làng bol Añ neh hŭi Añ bơh ală ngai ò jai kòp.

³³ Mbe mê wàs niam gùng bol mê dê Nàng jòi jat cau kòñ gơboh! Tian gơs ală cau ùr iơh bơsak lòt jat gùng bol mê dê.

³⁴ Di tiang ào mê dê sơl kung gŏ mhàm ală cau rƀah ò gơs glài, bulah bol mê ò kup bol khai tò ƀlong hìu cau, mơya la tài bơh ală bơta iơh hơ̆.

³⁵ Mê đơs lah: ‘Añ ò gơs glài, Ngan bơta gơjrañ Kơnràñ dê neh pleh bơh di añ.’ Mơ do, Añ rơp cèng mê nàng cahrña Bơh mê đơs lah: ‘Añ ò gơs glài.’

³⁶ Ñchi bơh tài mê mhar ngan tòmgơl gùng dà mê dê. Bol mê rơp gơkòl ƀàssìl bơh Ejiptơ, kung be bol mê neh ƀàssìl bơh Asiri.

³⁷ Bơh tềng hơ̆ bol mê rơp lik lòt ngài, Mơ tê bol mê dê ơn hơđang bồ; Bơh Yàng Jehôwa sang lòi ală cau mơ mê neh dòn kơnòm, Mơ mê rơp ò geh bơtoah bơtoài bơh di bol khai.”