Jeremi 19 - Sră Goh 2018

Gri mơ ù neh bơcah

¹ Yàng Jehôwa đơs lah: “Lòt tĕ blơi dô nơm gri mơ ù di tiah cau chài mòn glah. Cèng bal mơ mê dô êt nă cau kwang kra tòm mpồl làng bol mơ dô êt cau jòng sơnam tòm mpồl cau gơnoar ơn phan duh khoai,

² mơ lòt tus tòm thòng kòn klau Hinôm, rềp gùng mut tòm Mpồng Ù Glah; tềng hơ̆, yal tĕ ală jơnau Añ rơp đơs mơ mê.

³ Mê pal đơs lah: ‘Ơ ală cau bơtau Juda, mơ làng bol Jerusalem, iat tĕ jơnau Yàng Jehôwa dê. Yàng Jehôwa Gơnap Gơnoar, Yàng Tom Trồ Israel dê, đơs be do: Do, Añ rơp dùh bơta rung rài hơđang tiah do, tian gơs cau lơi kơno kung pal nggồr tồr;

⁴ Tài bơh làng bol neh sang lòi Añ, neh lơh ƀơ̆ ƀơl tiah do tòm tŭ bol khai ơn phan duh khoai yàng ndai in tềng hơ̆, mơ bol khai hala ồng pàng bol khai dê, hala ală bơtau Juda dê kung òhềt git, mơ tài bơh bol khai neh lơh gơtuh bềng mhàm ò gơs glài tềng do.

⁵ Kung bơt bơtào ală tiah jơnhoa Baal in nàng chu ală kòn dềt bol khai dê lơh gơs phan chu pơdơng Baal in, la bơta Añ ò tŭ lơi ai gơnoar sồr, ò tŭ lơi yal, la bơta Añ ò tŭ lơi kơlôi sơnơng tòm nùs Añ.’

⁶ Behơ̆ gen, Yàng Jehôwa đơs: ‘Ne, ngai tus, tŭ hơ̆ tiah do rơp ò sơnđan la Tôphet, kung ò sơnđan la thòng kòn klau Hinôm tai, mơya la Thòng Bơta Tơnchơt.

⁷ Tòm tiah do Añ rơp lơh roh bơta rơndap Juda dê mơ Jerusalem dê. Añ rơp lơh bol khai in gơpừ bơh đào di đap cau sò tơm, mơ bơh tê ală cau kòñ tơnroh bơta kis bol khai dê; Añ rơp phi ƀồc bol khai ală sềm trồ mơ jơi phan poan jơng tòm ù lơh gơs phan sa.

⁸ Añ rơp lơh ƀòn dờng do gơlik gơs dô nơm phan cau in dơñŏ tơnhial bơh ală bơta rung rài gơ dê.

⁹ Añ rơp lơh bol khai in sa poac kòn klau kòn ùr he dê, mơ kòp nă sa poac cau bơyô he dê tòm tŭ gơkòl gơrwàng, mơ tòm bơta dồn sa rƀah la tŭ cau sò tơm mơ ală cau kòñ jòi bơta kis bol khai dê lơh bol khai in jê sồt.’

¹⁰ Gen mê pòng bơcah tĕ gri di đap ală cau lòt bal mơ mê,

¹¹ mơ đơs mơ bol khai lah: Yàng Jehôwa Gơnap Gơnoar đơs be do: ‘Añ rơp pòng bơcah làng bol do mơ ƀòn dờng do kung be pòng bơcah gri mơ ù, ò rgơi lơh niam wơl; cau rơp tơp ƀồc tòm tiah Tôphet, tian gơs ò tơl tiah nàng tơp.’

¹² Yàng Jehôwa đơs: ‘Añ rơp lơh tiah do bal mơ làng bol gơ; mơ Añ rơp lơh ƀòn dờng do gơlik gơs kung be Tôphet.

¹³ Ală hìu Jerusalem dê mơ hìu gơlang ală cau bơtau Juda neh gơlik gơs ƀơ̆ iơh, kung be tiah Tôphet; ngan, hơ̆ la hơđang rkàng ală hìu hơ̆ cau neh chu kơlhô ală sơmañ đang trồ, mơ ơn phan ơn ñô ală yàng ndai in.’”

¹⁴ Tòm tŭ Jeremi rê bơh Tôphet, la tiah Yàng Jehôwa neh sồr khai lòt đơs hwơr; gen khai ñă tòm tiah rơng hìu Yàng Jehôwa dê, mơ đơs mơ jơh ală làng bol lah:

¹⁵ “Yàng Jehôwa Gơnap Gơnoar, Yàng Tom Trồ Israel dê đơs be do: ‘Do, Añ rơp cèng bơta rung rài mơ Añ neh yal lài ƀòn dờng do in mơ ală ƀòn gơrê bal mơ gơ, bơh bol khai neh lơh ngko bol khai gơlik kơldang, ò bài iat ală jơnau Añ.’”