Jeremi 17 - Sră Goh 2018

Tồi glài mơ kong lơh glài gơwèt mơ cau Juda

¹ Tồi glài Juda dê neh geh cih mơ gai cih lòs, Mơ mơng lŭ kră kơldang; Geh pac hơđang mpàn nùs bol khai, mơ hơđang ngke ală cơnòng duh khoai bol khai dê.

² Tòm tŭ ală kòn bol khai dê kah wơl cơnòng duh khoai Mơ rùp ràk Asera bol khai neh bơt bơtào di gah ală rlau chi tơlir Mơ hơđang dòr jơnhoa.

³ Ơ mơnơm Añ jê tòm lơgar, Añ rơp jào bơta pas sơm, mơ jơh ală phan màng mê lơh gơs phan phà kup; Be jền tơngai bơh tồi glài mê neh tìs tòm làm jơh lơgar bol mê dê.

⁴ Bơh broă lơh să tòm bol mê dê Bol mê rơp lơh roh sre brê Añ neh ai mê in; Añ rơp kup mê duh broă cau sò tơm mê Tòm dô nơm lơgar mơ mê òhềt git; Bơh tòm bơta gơjrañ Añ jê be ồs neh sing mơ rơp sa hơng sùm sùm.

⁵ Yàng Jehôwa đơs be do: “Pal srat rma ngan cau lơi in dòn kơnòm di kòn mơnus, lơh pràn kơldang poac să bol khai dê, Nùs bol khai neh ơm ngài bơh Yàng Jehôwa.

⁶ Khai kung be ñhơt tòm ƀlàng bràs, mơ rơp ò sền gŏ tòm tŭ bơta lơngai lơngò tus, Khai rơp ơm tòm ƀlàng ngềt ngơt ro rañ, tòm dô bă tiah ù boh ò gơs cau ơm.

⁷ Lơngai cau lơi in dòn kơnòm di Yàng Jehôwa, La ală cau dòn kơnòm di Yàng Jehôwa.

⁸ Khai kung be chi tam di gah croh dà, Sro ryas jat gùng dà hòr; Gơ rơp ò rngòt tŭ bơta duh trơàl tus Mơ nha kư̆ tơlir niam sùm. Di sơnam prang jòng kung ò kơlôi rngòt, Kư̆ gơlik plai sùm ò dơh.

⁹ Nùs jơi kòn mơnus la blac chừt rlau mơ jơh ală jơi phan, Mơ ƀơ̆ iơh ngan; Ñcau rgơi git loh?

¹⁰ Añ, Yàng Jehôwa, sền sơwì tòm dơngoh, Lòng tòm nùs, Tơm wơl kòp nă cau in jat gùng bol khai lòt, Cồng nha jat ală broă lơh bol khai dê.”

¹¹ Cau lơi geh pas gơs ò jat bơta song ring, Kung be sềm tap tra krơm tap mơ gơ ò tap; Tus di nggùl rài, khai kong roh jơh, mơ tòm ngai lồi dut khai gơlik gơs cau bơrngơl gơla.

¹² Sơbàn gơklŏ geh bơtào gơs bơh sơnròp, Hơ̆ la Hìu Duh Khoai Sàng Goh bol he dê!

¹³ Khoai Yàng Jehôwa, la bơta gơn kơnòm Israel dê, Ală cau lơi sang lòi Kơnràñ gen rơp kong ƀàssìl ƀàsso! Ală cau dô pleh bơh Kơnràñ rơp kong cih sơnđan hơđơm ù, Bơh bol khai neh sang lòi croh dà bơta kis, hơ̆ la Yàng Jehôwa.

¹⁴ Khoai Yàng Jehôwa! Dan Kơnràñ sơm añ gen añ rơp geh bòi; Dan Kơnràñ dong añ gen añ rơp geh dong klàs; Bơh Kơnràñ la bơta jòng ro añ jê.

¹⁵ Do la jơnau mơ cau neh đơs mơ añ: “Ntềng đah jơnau đơs Yàng Jehôwa dê taih? Lòi gơ gơlik gơs tĕ!”

¹⁶ Ai añ, añ ò sang gơnoar broă ê gàr tòm bơta duh broă Kơnràñ. Añ kung ò kơp gơn tơngai bòl glar, Kơnràñ ngan neh git. Jơnau lik bơh bơr añ jê.

¹⁷ Dan bañ lơh añ in rngòt rngơt! Kơnràñ la tiah añ kìng crŭ tòm ngai rung rài,

¹⁸ Dan Kơnràñ lơh ală cau kup kơryan añ jê kong ƀàssìl, Mơya bañ lòi añ kong ƀàssìl; Lòi bol khai gơlik rngòt rngơt, Mơya bañ lòi añ kòl rngòt rngơt! Dan cèng ngai rung rài tus hơđang bol khai, Mơ tơnroh bol khai tơrlah tơrling bàr dơ̆ rlau!

Ơn sàng goh ngai Saƀat

¹⁹ Yàng Jehôwa đơs mơ añ lah: “Lòt tĕ, ntào di Mpồng Làng Bol, hơ̆ la mpồng ală cau bơtau Juda òs lik mut, mơ di jơh ală mpồng theng Jerusalem dê.

²⁰ Mê pal đơs lah: ‘Ơ ală cau bơtau lơgar Juda, bal mơ jơh ală làng bol Juda, mơ jơh ală làng bol Jerusalem, la cau òs lòt gan ală mpồng do, iat tĕ jơnau Yàng Jehôwa dê.

²¹ Yàng Jehôwa đơs be do: Bol mê pal prap gàr, bañ tui ơnòng tòm ngai Saƀat; bañ tui ơnòng mut tòm mpồng ƀòn dờng Jerusalem.

²² Tòm ngai Saƀat, bañ tui ơnòng lik lòt bơh hìu bol mê dê, kung bañ lơh broă lơi; mơya ơn is tĕ ngai Saƀat gơlik gơs sàng goh, kung be Añ neh nting sồr ồng pàng bol mê dê.

²³ Mơya, bol khai ò bài iat, ò bài ơn tồr kơno; bol khai kơldang ngko mơ ò bài iat Añ mơ ò bài dòp jơnau nting sồr.’

²⁴ Yàng Jehôwa đơs lah: ‘Dilah bol mê iat Añ, dilah bol mê ò tui ơnòng mut tòm mpồng ƀòn dờng hơ̆ tòm ngai Saƀat, dilah bol mê ơn is ngai Saƀat gơlik gơs ngai sàng goh mơ ò lơh broă tòm ngai hơ̆,

²⁵ gen ală cau bơtau mơ ală cau kwang at bồ nggui hơđang sơbàn Dabit, rơp hào rơndeh, hào ơseh, bal mơ ală cau kwang at bồ cau Juda, bal mơ làng bol Jerusalem bơh mpồng theng hơ̆ mơ mut; mơ ƀòn dờng hơ̆ rơp gam wơl sùm sùm.

²⁶ Cau rơp tus bơh ală ƀòn Juda dê mơ bơh ală tiah ơm gùt dar Jerusalem, bơh lơgar Benjamin, bơh tiah ring, tiah mơnơm, mơ đah đơm, nàng cèng phan ơn chu mơ ală phan ơn, phan ơn bơsàp bal mơ kơlhô, mơ cèng phan ơn kah bơta nđàc tus tòm hìu Yàng Jehôwa dê.

²⁷ Mơya dilah bol mê ò bài iat Añ nàng ơn is ngai Saƀat gơlik gơs ngai sàng goh, mơ tòm ngai Saƀat tui ơnòng mơ mut tòm mpồng ƀòn dờng Jerusalem, gen Añ rơp ơn ồs di mpồng theng, ồs hơ̆ rơp chu pơrguc gơlang bơtau tòm Jerusalem, mơ rơp ò geh đơp chơt ò.’”