Jeremi 16 - Sră Goh 2018

Nùs kòñ Yàng dê gơwèt hơ Jeremi

¹ Jơnau Yàng Jehôwa đơs mơ añ be do:

² Mê bañ jòi bau, bañ gơs kòn klau kòn ùr tòm tiah do.

³ Bơh Yàng Jehôwa đơs bơh ală kòn klau kòn ùr rơp tơnggơs tềng do, mơ bơh ală mè bèp neh tơnggơs bol khai tòm lơgar do be do:

⁴ “Bol khai rơp kong pluh plàng mơ chơt; bol khai rơp ò gơs cau ñìm ƀồc mơ kung ò gơs cau tơp; ƀồc bol khai gam wơl kung be phan jă brê hơđang ù. Bol khai rơp kong tơnroh bơh pềs tà mơ jơgloh rung; ƀồc bol khai dê rơp lơh gơs phan sa sềm trồ mơ jơi phan poan jơng hơđang ù in.”

⁵ Yàng Jehôwa đơs be do: “Bañ mut tòm hìu gơs cau chơt, bañ tòmpà bơta moat jrùng, mơ kung bañ ñìm ƀồc bol khai; bơh Añ neh tă bơta lơngap lơngai, bơta kòñ gơboh kơ̆ dơn mơ bơta nđàc sơngit Añ jê bơh làng bol do,” Yàng Jehôwa đơs behơ̆.

⁶ “Cau dờng kung be cau dềt rơp chơt tòm lơgar do; ò geh tơp, ò gơs cau lơi ñìm bơh bol khai; cau ò còr is poac he hala siat sŏ bơh bol khai.

⁷ Ò gơs cau lơi cèng phan sa cau ñìm ƀồc in nàng pơndòm pơniang bol khai; ò gơs cau lơi bơh bơta chơt cau bèp hala cau mè mơ dòp mơngàn tòmpà bơta moat jrùng.

⁸ Kung bañ mut tòm tiah gơs bơta ñô sa nàng nggui sa bal mơ bol khai.

⁹ Bơh Yàng Jehôwa Gơnap Gơnoar, Yàng Tom Trồ Israel dê, đơs be do: ‘Do, di đap bol mê, tòm rài bol mê, Añ rơp tă tơlik bơh lơgar do ală sap chò hòp mơ hòn chò, ò gam kơno sap cau bơrtơu mơ cau ƀan dê.’

¹⁰ Tŭ mê cèng jơnau do yal wơl làng bol in, bol khai ngan rơp lùp mê lah: ‘Ñchi bơh tài Yàng Jehôwa yal tơlik ală bơta rung rài do bol hi in taih? Bol hi gơs glài lơi? Tồi glài tòmdră lơi mơ bol hi neh tìs mơ Jehôwa Yàng Tom Trồ bol hi taih?’

¹¹ Gen đơs tĕ mơ bol khai lah: Yàng Jehôwa đơs: ‘Hơ̆ la tài bơh ồng pàng bol mê dê neh sang lòi Añ, lòt jat ală yàng ndai, nàng duh broă mơ duh khoai ală yàng hơ̆, mơ neh sang lòi Añ ò prap gàr bơta boh lam Añ jê.

¹² Ai bol mê lơh bơta iơh rlau mơ ồng pàng bol mê dê; mơ do, bol mê kòp nă lơh jat nùs iơh kră kơldang bol mê dê, ò bài iat Añ.

¹³ Gen tàng Añ rơp sơrbì bol mê lik bơh lơgar do, mut tòm dô nơm lơgar mơ bol mê bal mơ ồng pàng bol mê dê kung òhềt tŭ lơi git, tềng hơ̆ bol mê rơp duh broă ală yàng hơ̆ mang mơ ngai; bơh Añ ò yal tơlik bơta nđàc bol mê in tai.’”

Yàng Tom Trồ rơp Bơtào Wơl Israel

¹⁴ Yàng Jehôwa đơs: “Ne, ngai tus, la tŭ cau rơp ò đơs lah: ‘Ngan kung be Yàng Jehôwa gam kis sùm, la Bơtau neh cèng làng bol Israel lik bơh lơgar Ejiptơ.’

¹⁵ Mơya: ‘Ngan kung be Yàng Jehôwa gam kis sùm, la Bơtau neh cèng kòn sau Israel lik bơh đah đang, mơ bơh ală lơgar mơ bol khai neh kong bơtrơh.’ Añ rơp lam bol khai rê wơl tòm lơgar mơ Añ neh ai ồng pàng bol khai in.”

¹⁶ Yàng Jehôwa đơs lah: “Tŭ do Añ rơp sồr oă cau dang bơtơng ka, ală cau hơ̆ rơp kup bol khai; tơnơ̆ hơ̆, Añ rơp sồr oă cau lòt mòc, ală cau hơ̆ rơp kup bol khai bơh ală mơnơm, ală dòr, mơ ală tiah gồp lŭ.

¹⁷ Bơh mat Añ sền sơwì kòp gùng dà bol khai dê, ală broă hơ̆ ò geh pồn bơh di mat Añ, tồi glài bol khai ò geh pồn ndơp bơh mat Añ.

¹⁸ Lài ngan Añ rơp tơm wơl bơta iơh bơsak mơ tồi glài bol khai bàr dơ̆ rlau, bơh bol khai neh lơh ƀơ̆ ƀơl ù tiah Añ bơh ală rùp ràk, mơ cèng ală bơta cù kìr bềng lìu tòm sre brê Añ.”

¹⁹ Ơ Yàng Jehôwa, Kơnràñ la bơta pràn kơldang añ, theng kơ̆ cê añ, La tiah kìng crŭ añ jê tòm ngai bòl glar! Bơh tiah lồi plai ù Ală lơgar rơp tus hơ Kơnràñ, mơ đơs lah: “Ồng pàng bol he ò dòp ală phan lơi mìng jơnau ma blac, bơta roh lơm mơ ală phan ò kwơ dô êt lơi.

²⁰ Kòn mơnus rgơi lơh is bol khai in ală yàng ơ? Mơ hơ̆ ò di la yàng!”

²¹ “Behơ̆ gen, ngan Añ rơp ai bol khai in git, dơ̆ do, Añ rơp ai bol khai in git bơta pràn kơldang mơ gơnap gơnoar Añ jê; Mơ bol khai rơp git Sơnđan Añ la Yàng Jehôwa.”