Jeremi 12 - Sră Goh 2018

Jơnau lùp Jeremi dê

¹ Khoai Yàng Jehôwa, Kơnràñ song ring ngan; Tòm tŭ añ tòm pơndang mơ Kơnràñ Bulah behơ̆, añ dan lùp Kơnràñ. Ñchi bơh tài gùng dà cau iơh geh bơtoah bơtoài taih? Ală cau tìs glài geh cồng nha taih?

² Kơnràñ neh tam bol khai; Bol khai neh sro ryas, hòn dờng mơ gơlik plai. Bơr bol khai ơm rềp mơ Kơnràñ, Mơya nùs bol khai ơm ngài mơ Kơnràñ.

³ Khoai Yàng Jehôwa, Kơnràñ git añ! Kơnràñ gŏ añ, lòng sền añ, nùs añ gơwèt hơ Kơnràñ. Dan hwài bol khai kung be belàt kong tề tus hơ tiah tơnchơt, Ơn is bol khai tòm ngai tơnchơt in.

⁴ Nđò jŏ tòm lơgar kong moat jrùng, mơ ñhơt tòm ƀlàng sre ro jrùh taih? Tài bơh làng bol iơh bơsak ơm tềng hơ̆, Gen tàng ală jơi phan poan jơng mơ jơi sềm kòl pơs jơh. Bơh bol khai đơs lah: “Yàng Tom Trồ rơp ò gŏ gùng dà bol he lơh.”

Jơnau ho wơl Yàng Jehôwa dê

⁵ “Dilah mê ntoat pơrlòng bal mơ cau ntoat mơ jơng, mơ gam bòl glar, Gen mbe rgơi ntoat pơrlòng mơ ơseh taih? Tòm tŭ lơgar ơm ring lơngai mơ mê gơtup pừ, Mbe mê rơp lơh mơ tòm tŭ hiòng Jordan ngơr?

⁶ Să tòm oh mi mê mơ hìu bèp mê Ơm tòmdră mơ mê, Bol khai kung driau dờng sòdră đah ngkòi mê tai sơl. Bulah bol khai đơs ală jơnau niam, Mê kung bañ dòn bol khai!

⁷ Añ neh sang hìu Añ; Neh sang lòi sre brê Añ; Neh jào phi làng bol mơ nùs Añ kòñ gơboh Tòm tê cau sò tơm khai dê.

⁸ Sre brê Añ tòmdră mơ Añ Kung be dô nơm klìu triă tòm brê, Ơluh ơhùm tòmdră mơ Añ; Gen tàng Añ gơjrañ bol khai.

⁹ Bơh sre brê Añ la be grơt jròk sa, gơs ală sềm sa poac gơrwàng gùt dar gơ ơ? Lòt tĕ pơjum ală jơi phan poan jơng wơl tòm brê, ai bol gơ in sa loan khai!

¹⁰ Oă cau ê belàt neh tơnroh suơn ño Añ jê, Jă trơm pơnah sre brê Añ jê, Lơh pơnah ù tiah Añ kòñ gơboh Gơlik gơs dô bă tiah srau gòi ngềt ngơt.

¹¹ Bol khai neh lơh gơ in gơlik tiah lòi srau, rhàng ngềt ngơt, Gơ pơt wòl di đap Añ. Jơh lơgar neh gơlik srau gòi, Mơya ò gơs cau lơi ơn nùs di gơ.

¹² Hơđang jơh ală dòr kơlờl tòm ƀlàng bràs; Cau phà kơñau neh tus; Bơh đào Yàng Jehôwa dê loan lơgar do Bơh bồ do tus hơ bồ ne, Ò gơs dô nă lơi geh lơngap lơngai.

¹³ Bol khai neh sih gar kòi mi mơ toès ală tòm lò, Bol khai kong bòl glar mơya ò dòp geh phan lơi. Bol mê rơp ƀàssìl bơh kơnhai toès bol khai dê, Bơh bơta gơhào gơjrañ dờng ngan Yàng Jehôwa dê!”

Jơnau pơhìn lơh glài mơ jơnau ho pơgon bơh làng bol bơdìh

¹⁴ Yàng Jehôwa đơs be do: “Ală cau gơp ƀòn iơh Añ jê, la cau tòmpìt sre brê mơ Añ neh ai làng bol Añ in, la Israel, lơh gơs phan jơtài: Añ rơp dus bol khai bơh digùl ù tiah bol khai dê, mơ rơp dus hìu Juda bơh digùl bol khai.

¹⁵ Mơya, tơnơ̆ mơ tŭ Añ neh dus rau, Añ rơp nđàc sơngit wơl di bol khai; mơ Añ rơp cèng bol khai wơl hơ sre brê bol khai dê, mơ jơh kòp nă tòm bol khai.

¹⁶ Dilah bol khai ngac ngar bơtê gùng dà làng bol Añ jê, ai sơnđan Añ mơ srat să lah: ‘Ngan kung be Yàng Jehôwa kis gam sùm sùm!’ Kung be bol khai neh bơto làng bol Añ sơnio Baal mơ srat să, gen bol khai rơp geh bơt bơtào digùl làng bol Añ.

¹⁷ Mơya dilah bol khai ò bài iat, Añ rơp dus jơh bơh ryas làng bol hơ̆, mơ tơnroh gơ.” Yàng Jehôwa đơs behơ̆.