Jeremi 10 - Sră Goh 2018

Tồi glài duh rùp ràk cèng bơta tơnroh Jerusalem

¹ Ơ hìu Israel, iat tĕ jơnau Yàng Jehôwa đơs mơ bol mê.

² Yàng Jehôwa đơs be do: “Bañ lơh jat gùng dà ală làng bol bơdìh, Bañ rngòt ală tềl hơđang trồ, Bulah ală làng bol bơdìh pin rngòt ală tềl hơ̆.

³ Bơh bơta òs yau ală làng bol hơ̆ la ma blac. Cau kơl chi tòm brê, Tê cau chài lơh chi ai sùng mơ blah;

⁴ Bol khai ai màh priă mơ bơka gơ; Ai mut mơ pơng đìn, nàng gơ ò ơwañ.

⁵ Ală rùp ràk bol khai dê be phan tơrngòt tòm sre rpung, Bol gơ ò rgơi đơs; Ò rgơi lòt, gen tàng pal tùng. Bañ rngòt ală bol gơ, Bơh bol gơ ò rgơi tơndùh bơta rung rài hala ai lơngai.”

⁶ “Ơ Yàng Jehôwa, ò gơs cau lơi ndròm bal mơ Kơnràñ! Kơnràñ la dờng, Sơnđan Kơnràñ gơs gơnoar pràn dờng ngan.

⁷ Khoai Bơtau ală lơgar! Ñcau ò rngòt di Kơnràñ taih? Bơh Kơnràñ di pal geh dòn duh. Tòm ală cau jak chài ală lơgar dê, Mơ tòm lơgar bol khai dê, Ò gơs cau lơi be Kơnràñ.

⁸ Bol khai jơh tơl nă bơrngơl mơ tùl gơla. Bol khai geh bơta bơto sồr bơh rùp ràk Ò lin rlau mơ chi.

⁹ Hơ̆ la priă klơn lơho cèng tus bơh Tarsis, Mơ màh bơh Upha, Gơ la broă lơh bơh tê cau chài pac mơ cau chài lơh màh mòn gơs; Geh tơnsoh gơ in mơ bài dà tơlir mơ dà gur; Bol gơ jơh ală la broă lơh cau chài rgơi dê.

¹⁰ Mơya Yàng Jehôwa la Yàng Tom Trồ song ngan; Kơnràñ la Yàng Tom Trồ kis sùm, la Bơtau gam sùm sùm. Bơh bơta gơjrañ Kơnràñ dê ù gơlơnggơr, Ală làng bol ò jai kong bơta gơjrañ Kơnràñ dê.

¹¹ Bol mê pal đơs mơ bol khai lah: ‘Ală yàng ò rgơi crơng ală trồ mơ ù tiah, rơp kong tơnroh thit bơh di ù tiah hơđơm ală tap trồ.’

¹² Să tòm Yàng Jehôwa neh crơng gơs ù bơh gơnap gơnoar Kơnràñ dê, Neh bơtào gơs lơgar dunnia bơh bơta jak chài Kơnràñ dê, Neh lì ală tap trồ bơh bơta git wă Kơnràñ dê.

¹³ Tŭ Kơnràñ tơlik sap đơs, gen dà nggồr tòm ală tap trồ; Kơnràñ lơh nhơm dà guh bơh tiah lồi plai ù, Lơh puhlèp jat mìu, cèng tơlik càl bơh tòm đam Kơnràñ dê;

¹⁴ Kòp nă cau la bơrngơl mơ ò git wă; Cau chài lơh màh kòl ƀàssìl bơh ală rùp ràk khai dê; bơh ală rùp ràk bol khai la ma blac, Ò gơs nhơm tă tòm gơ;

¹⁵ Bol gơ ò kwơ, mìng la bơta blac pơrlồm; Tòm ngai lơh glài bol gơ rơp kong roh rui.

¹⁶ Ò di be Yàng Jehôwa la pơnah sre brê Jakôp dê, Tài bơh Kơnràñ neh crơng gơs jơh ală phan, mơ Israel la jơi bơtiàn sre brê Kơnràñ dê. Sơnđan Kơnràñ la Yàng Jehôwa Gơnap Gơnoar.”

Bơta cèng pơrdô mòr tus

¹⁷ Ơ mê la cau kong gơrwàng, Tơrgòm tĕ phan mơna mơ lik bơh tiah do.

¹⁸ Bơh Yàng Jehôwa đơs be do: “Di di tŭ do, Añ rơp sang sơrbì làng bol lơgar do, Añ rơp cèng bơta bòl glar hơđang bol khai, Nàng bol khai kah rngal wơl.”

¹⁹ Bòl glar añ in, bơh tềl sồt añ jê! Tềl sồt añ kơnjơ̆ ngan! Mơya añ đơs: “Ngan do la bơta pù tơmàl añ jê, Mơ añ pal kong.”

²⁰ Sàl añ jê neh kong tơnroh, Ală che añ jê kòl gơltac jơh, Ală kòn añ sang lòi añ, Bol khai ò gam tai. Ò gơs cau nàng lì sàl añ tai Mơ cang bài kơrnìng añ in.

²¹ Ală cau ê belàt la tùl gơla, Ò jòi jat Yàng Jehôwa. Gen tàng bol khai ò geh bơtào tơngguh, Mơ jơh ală mpồl belàt bol khai dê gen gơprah gơpring jơh.

²² Iat tĕ, dô sap đơs! Iat tĕ, gơ neh tus, gơs bơta nggồr nggàc dờng tus bơh đah đang, lơh ală ƀòn Juda dê gơlik gơs tiah lòi srau, gơlik gơs trồm so rhau ơm.

Bơta hòi dan Jeremi dê

²³ Ơ Yàng Jehôwa, añ git gùng dà jơi kòn mơnus dê ò di bơh bol khai lơh tòm, Bol khai ò rgơi lơh nền ală cơnđòa jơng bol khai dê.

²⁴ Khoai Yàng Jehôwa, dan Yàng lơh glài tơmàl añ jat kơr sơnoa; Ò di tòm bơta gơjrañ Kơnràñ dê, hala cèng añ tus hơ bơta roh rui.

²⁵ Dan Kơnràñ tuh bơta gơjrañ dờng Kơnràñ dê hơđang ală lơgar ò git Kơnràñ, Mơ hơđang ală làng bol ò hòi dan dê sơnđan Kơnràñ. Bơh bol khai neh sa loan Jakôp, Mơ neh sa loan; Bol khai neh sa pơrguc Jakôp, mơ lòi srau gòi tiah ơm khai dê.