Jang 9 - Sră Goh 2018

Yàng Jesu sơmbòi cau jơngo. Bơta kơldang nùs ală cau Pharisi dê

¹ Tòm tŭ lòt gùng, Yàng Jesu gŏ dô nă cau jơngo bơh tòm tŭ pa deh.

² Ală cau bơtê lùp Kơnràñ lah: “Ơ Rabi, ñcau neh tìs glài, cau do hala mè bèp khai, gen tàng bơh tŭ pa deh khai neh jơngo behơ̆ taih?”

³ Yàng Jesu ho lah: “Hơ̆ ò di tài bơh cau do hala mè bèp khai neh tìs glài ò, mơya nàng ală broă Yàng Tom Trồ dê geh yal tơlik tòm khai.

⁴ Tòm tŭ gam trồ ngai, bol he pal lơh ală broă Bơtau neh sồr Añ lòt tus, mang tus gen ò gơs cau lơi rgơi lơh broă ò.

⁵ Tòm tŭ Añ gam ơm tòm dunnia, Añ la bơta àng dunnia dê.”

⁶ Đơs rau, Kơnràñ choh tòm ù, ai dà diau bơcă gơs bŏ, bong di mat cau jơngo,

⁷ mơ sồr khai lah: “Lòt tĕ mơ rào tòm tơnau Silôe,” (Jơnau do gơtha la “Geh sồr lòt.” Behơ̆, khai lòt rào mơ rê wơl gen geh gŏ.)

⁸ Ală cau ơm rềp mơ ală cau lài òr neh gŏ khai kanadàn, đơs lah: “Do ò di la cau neh nggui kanadàn ò ơ?”

⁹ Cau ƀà đơs lah: “Ngan la khai;” cau ƀà tai đơs lah: “Ò di, mơya dô nă cau ndai bơsùt be khai gơ dê.” Ai cau jơngo đơs lah: “Să tòm añ do.”

¹⁰ Bol khai lùp cau jơngo lah: “Behơ̆ gen, mbe mat mê geh gơ pò wơl taih?”

¹¹ Khai ho lah: “Dô nă cau sơnđan la Jesu neh bơcă bŏ, bong di mat añ, mơ sồr añ lòt tĕ hơ tơnau Silôe mơ rào. Behơ̆ añ neh lòt, rào mơ geh àng mat.”

¹² Bol khai lùp lah: “Ntềng đah cau hơ̆ taih?” Khai ho lah: “Añ ò git.”

¹³ Bol khai lam cau lài neh jơngo tus hơ ală cau Pharisi.

¹⁴ Hơ̆ la tòm ngai Saƀat Yàng Jesu neh bơcă bŏ mơ pò mat cau jơngo in.

¹⁵ Ală cau Pharisi lùp tai khai mbe lơh gơs àng mat. Khai đơs lah: “Cau hơ̆ bong bŏ di mat añ, añ rào gen gơs gŏ.”

¹⁶ Gơs cau ƀà tòm mpồl cau Pharisi đơs lah: “Cau hơ̆ ò di tus bơh Yàng Tom Trồ, bơh khai ò prap gàr ngai Saƀat.” Cau ndai đơs lah: “Dô nă cau glài mbe rgơi lơh ală tềl krơi behơ̆ taih?” Mơ digùl bol khai gơs bơta cah mpồl.

¹⁷ Tài behơ̆, bol khai lùp cau jơngo tai lah: “Ai mê, mê đơs mbe lơi bơh cau neh lơh mê in àng mat taih?” Khai đơs lah: “Hơ̆ la dô nă cau gơnoar hwơr.”

¹⁸ Bulah behơ̆ cau Juda ò dòn lah cau hơ̆ lài neh jơngo mơ tŭ do gơs àng mat, jơl tus di tŭ bol khai hòi mè bèp khai tus,

¹⁹ mơ lùp lah: “Do ngan la kòn klau bol mê dê mơ bol mê đơs lah khai neh jơngo bơh tòm tŭ deh sơl? Behơ̆ mbe tŭ do khai gơs àng mat taih?”

²⁰ Mè bèp khai ho lah: “Bol hi git khai la kòn klau bol hi dê mơ khai neh jơngo bơh tòm tŭ deh;

²¹ mơya tŭ do lơh mbe lơi khai gơs àng mat gen bol hi ò git. Bol hi kung ò git ñcau neh pò mat khai in. Lùp tĕ khai, khai neh tơl sơnam rau; să tòm khai rơp yal.”

²² Mè bèp cau jơngo đơs behơ̆ tài bơh rngòt di cau Juda: bơh cau Juda neh ho lah cau lơi yal tơlik Yàng Jesu la Bơtau Krist, gen pal kong bơtrơh tơlik bơh di hìu jơnum.

²³ Tài bơh hơ̆ tàng mè bèp cau jơngo đơs lah: “Khai neh tơl sơnam rau, lùp tĕ khai.”

²⁴ Dô dơ̆ tai, ală cau Pharisi hòi wơl cau lài neh jơngo mơ đơs lah: “Jòng ro tĕ Yàng Tom Trồ, bol he git cau hơ̆ la cau gơs glài.”

²⁵ Khai ho lah: “Añ ò git cau hơ̆ la cau glài hala ò; mơya añ mìng git dô bơta, hơ̆ la añ neh jơngo mơ tŭ do añ gơs gŏ.”

²⁶ Bol khai lùp tai lah: “Ñchi bơta khai neh lơh mê in taih? Mbe khai neh pò mat mê in taih?”

²⁷ Khai ho lah: “Añ neh đơs mơ ală ồng rau, mơ ală ồng ò iat añ. Ñchi bơh tài ală ồng kòñ kơno tai taih? Ngan sơl, ală ồng kung kòñ lơh gơs cau bơtê khai dê ơ?”

²⁸ Gen bol hơ̆ lah sơrpah khai mơ đơs lah: “Mê la cau bơtê ồng hơ̆ dê, ai bol hi la cau bơtê Môise dê.

²⁹ Bol hi git Yàng Tom Trồ neh đơs mơ Môise, ai cau do gen bol hi ò git bơh lơi mơ tus.”

³⁰ Cau jơngo ho lah: “Hĕ, krơi ngan! Cau neh pò mat añ in, mơ ală ồng ò git khai bơh lơi mơ tus!

³¹ Bol he git lah Yàng Tom Trồ ò dòp jơnau cau glài dê, mơya dilah cau lơi duh rngòt di Kơnràñ mơ lơh jat nùs kòñ Kơnràñ dê, gen Kơnràñ iat jơnau khai dê.

³² Bơh rài yau tus rài do òhềt tŭ lơi kơno đơs gơs cau lơi pò mat cau jơngo bơh tŭ pa deh.

³³ Dilah cau do ò tus bơh Yàng Tom Trồ, gen ò rgơi lơh bơta lơi ò.”

³⁴ Bol khai ho lah: “Jơh să jan mê deh tòm tồi glài, mơ kòñ bơto bol hi ơ?” Gen bol khai bơtrơh tơlik khai di tiah.

³⁵ Yàng Jesu kơno bol hơ̆ neh bơtrơh tơlik khai, gen tàng tŭ tìp khai Kơnràñ lùp lah: “Mê dòn Kòn Yàng Tom Trồ sơl?”

³⁶ Khai ho lah: “Ơ Yàng, cau hơ̆ la ñcau, tồ añ in dòn khai, taih?”

³⁷ Yàng Jesu ho lah: “Mê neh gŏ khai, mơ hơ̆ la cau ơm đơs mơ mê do.”

³⁸ Khai ho lah: “Ơ Yàng, añ dòn; gen khai cùn khoai Kơnràñ.”

³⁹ Yàng Jesu đơs lah: “Añ neh lòt tus tòm dunnia do nàng cahrña, lơh cau jơngo in gơs gŏ; ai cau gŏ, gen gơlik jơngo.”

⁴⁰ Ală cau Pharisi ơm rềp tềng hơ̆ kơno ală jơnau hơ̆, gen đơs mơ Kơnràñ lah: “Bol hi kung la cau jơngo sơl ơ?”

⁴¹ Yàng Jesu ho lah: “Dilah bol mê la cau jơngo, gen ò gơs tồi glài ò; mơya tài bơh bol mê đơs: ‘Bol hi gŏ,’ gen tàng tồi glài bol mê dê gam wơl.”