Jang 5 - Sră Goh 2018

Yàng Jesu tòm Jerusalem sơmbòi cau gơlte di tơnau Betesda

¹ Tơnơ̆ mơ hơ̆, tòm dô bơta pơjum sa làng bol Juda dê, Yàng Jesu guh hơ Jerusalem.

² Tòm Jerusalem rềp di Mpồng Belàt, gơs dô nơm tơnau, jơnau Hebrơ sơnđan la Betesda, gơ gơs pram nơm mpồng rơng.

³ Gơs oă ngan cau kòp jê, jơngo lè, pă kwe, kwet gơlte bic tềng hơ̆,

⁵ tềng hơ̆ gơs dô nă cau klau kòp neh pe jơt phàm nam.

⁶ Yàng Jesu gŏ khai bic mơ git lah khai kòp neh jŏ rau, gen lùp khai lah: “Mê kòñ bòi sơl?”

⁷ Cau kòp ho lah: “Ơ ồng ò gơs cau nàng tơmù añ tòm tơnau tòm tŭ dà wañ; dơ̆ añ tus gen cau ndai neh mù lài mơ añ rau.”

⁸ Yàng Jesu đơs lah: “Ntào tĕ, at bềl mê mơ lòt.”

⁹ Tŭ hơ̆ mo cau hơ̆ geh bòi, at bềl mơ lòt. Ngai hơ̆ la ngai Saƀat.

Ală cau Juda yă Yàng Jesu tìs ngai Saƀat

¹⁰ Behơ̆ ală cau Juda đơs mơ cau neh geh sơmbòi lah: “Do la ngai Saƀat, mê ò geh gơnoar at bềl mê dê.”

¹¹ Khai ho lah: “Cau neh sơm añ sồr añ lah: ‘At tĕ bềl mê mơ lòt,’”

¹² Bol hơ̆ lùp khai lah: “Ñcau la cau neh sồr mê: ‘At tĕ bềl mơ lòt’?”

¹³ Mơya cau neh geh sơmbòi hơ̆ ò git la ñcau, bơh Yàng Jesu neh sơrlèt tòm mpồl làng bol tềng hơ̆.

¹⁴ Tơnơ̆ wơl Yàng Jesu bàn cau hơ̆ tòm hìu duh khoai gen đơs lah: “Do, mê neh bòi rau, bañ tìs glài tai yơ, rngòt gơs bơta lơi iơh rlau tai gơlik mê in mòn.”

¹⁵ Cau hơ̆ lòt yal mơ ală cau Juda lah Yàng Jesu la cau neh sơmbòi khai in.

¹⁶ Bơh hơ̆ ală cau Juda kup kơryan Yàng Jesu, tài bơh Kơnràñ lơh ală bơta hơ̆ tòm ngai Saƀat.

¹⁷ Mơya Yàng Jesu ho bol khai lah: “Bèp Añ lơh broă tus di tŭ do, mơ Añ kung lơh broă behơ̆ sơl.”

¹⁸ Tài bơh hơ̆, ală cau Juda sơlo jòi bơta nàng tơnchơt Kơnràñ, bơh Kơnràñ ò di mìng tìs ngai Saƀat lơm, mơya kung sơnđan Yàng Tom Trồ la Bèp, lơh is să he ndròm bal mơ Yàng Tom Trồ.

Yàng Jesu yal tơlik Kơnràñ mơ Bèp la dô bă bal

¹⁹ Behơ̆, Yàng Jesu đơs mơ bol khai lah: “Di ngan, di ngan, Añ đơs mơ bol mê, Kòn ò rgơi lơh is bơta lơi, mìng lơh bơta Kòn gŏ Bèp lơh; bơh bơta lơi Bèp lơh gen Kòn kung lơh behơ̆ sơl.

²⁰ Bèp kòñ gơboh dê Kòn mơ yal Kòn in jơh ală bơta Bèp lơh, mơ rơp yal Kòn in ală broă dờng rlau tai mơ ală broă do, nàng bol mê pal ai lơh krơi.

²¹ Bơh Bèp lơh ală cau chơt in kis wơl be lơi, gen Kòn kung ai bơta kis cau lơi in, jat be Kòn kòñ behơ̆ sơl.

²² Bèp ò cahrña cau lơi ò, mơya neh jào ală bơta cahrña Kòn in,

²³ nàng jơh tơl nă cau sền màng ryŭ di Kòn kung be sền màng ryŭ di Bèp sơl. Cau lơi ò sền màng ryŭ di Kòn, hơ̆ la ò sền màng ryŭ di Bèp, la Bơtau neh sồr Kòn lòt tus.

²⁴ Di ngan, Añ đơs ngan mơ bol mê, cau lơi iat jơnau Añ mơ dòn Bơtau neh sồr Añ lòt tus, gen geh bơta kis gam sùm sùm, ò kòl tòm bơta cahrña mơya neh tiă rlau di bơta chơt mơ tus hơ bơta kis.

²⁵ Di ngan, Añ đơs ngan mơ bol mê, jơ rơp tus mơ tŭ do neh tus rau, dơ̆ ală cau chơt rơp kơno jơnau đơs Kòn Yàng Tom Trồ dê, mơ ală cau kơno hơ̆ rơp kis.

²⁶ Bơh Bèp gơs bơta kis tòm să tòm Bèp be lơi, gen Kơnràñ kung neh ai Kòn in gơs bơta kis tòm să tòm Kòn behơ̆ sơl;

²⁷ Mơ Kơnràñ neh jào Kòn in gơnoar cahrña, bơh Kòn la Kòn Mơnus.

²⁸ Bañ ai lơh krơi bơh bơta hơ̆, tài bơh jơ tus, dơ̆ ală cau ơm tòm bơtô ƀồc rơp kơno jơnau đơs Kơnràñ,

²⁹ mơ lik jơh; cau lơi neh lơh bơta lơbơn niam gen kis wơl nàng dòp geh bơta kis, cau lơi neh lơh bơta iơh bơsak gen kis wơl nàng kong cahrña.

³⁰ Añ ò rgơi lơh is bơta lơi; Añ cahrña jat bơta Añ kơno, mơ bơta cahrña Añ jê la song ring, bơh Añ ò jòi jat nùs is Añ jê, mơya jòi jat nùs kòñ Bơtau neh sồr Añ lòt tus.

³¹ Dilah Añ lơh cơng is bơh să tòm Añ, gen jơnau lơh cơng hơ̆ la ò ngan.

³² Gơs Bơtau ndai lơh cơng bơh Añ, mơ Añ git lah jơnau Bơtau hơ̆ lơh cơng bơh Añ la ngan.

³³ Bol mê neh sồr cau lòt tus hơ Jang, gen khai neh lơh cơng bơh jơnau song.

³⁴ Añ ò càng kơnòm bơta lơh cơng bơh cau, bulah behơ̆ Añ đơs ală bơta hơ̆ nàng bol mê in geh dong klàs.

³⁵ Jang la be ồs đèng neh chu mơ pơnđàng, ai bol mê gen kòñ hòn chò ing tòm bơta àng khai dê.

³⁶ Mơya Añ gơs bơta lơh cơng dờng rlau mơ bơta lơh cơng Jang dê, bơh ală broă Bèp neh jào Añ in lơh wil tơl, ală broă Añ lơh hơ̆ lơh cơng bơh Añ lah Bèp neh sồr Añ lòt tus.

³⁷ Să tòm Bèp la Bơtau neh sồr Añ lòt tus kung lơh cơng bơh Añ. Bol mê òhềt tŭ lơi kơno jơnau đơs Kơnràñ, kung òhềt tŭ lơi gŏ rùp să Kơnràñ dê.

³⁸ Mơ jơnau Kơnràñ dê ò ơm tòm bol mê, bơh bol mê ò dòn Bơtau mơ Kơnràñ neh sồr lòt tus.

³⁹ Bol mê sền sơwì Sră Goh, bơh kơlôi tòm hơ̆ gơs bơta kis gam sùm sùm; hơ̆ la Sră Goh lơh cơng bơh Añ;

⁴⁰ Bulah behơ̆ bol mê ò bài lòt tus hơ Añ nàng geh bơta kis!

⁴¹ Añ ò jòi bơta gơklŏ bơh di cau ò;

⁴² Mơya Añ git bol mê ò gơs bơta kòñ gơboh Yàng Tom Trồ ơm tòm bol mê.

⁴³ Añ neh ai sơnđan Bèp Añ mơ lòt tus, mơ bol mê ò dòp Añ. Dilah gơs cau ndai ai sơnđan is he dê mơ lòt tus, gen bol mê rơp dòp khai.

⁴⁴ Bol mê dòp bơta gơklŏ bal mơ gơp, ò jòi jat bơta gơklŏ tus bơh Yàng Tom Trồ mìng dùl lơm, gen mbe rgơi bol mê dòn taih?

⁴⁵ Bañ kơlôi lah Añ rơp yă bol mê di đap Bèp; cau rơp yă bol mê la Môise, la cau mơ bol mê gơn kơnòm.

⁴⁶ Bơh dilah bol mê dòn Môise, gen kung dòn Añ sơl, bơh khai neh cih bơh Añ.

⁴⁷ Mơya dilah bol mê ò dòn ală jơnau Môise neh cih, gen mbe rgơi bol mê dòn jơnau Añ taih?”