Jang 20 - Sră Goh 2018

Yàng Jesu kis wơl

¹ Tŭ rìng àng ngai sơnròp tòm dô poh, trồ gam jơngo, Mari Madơlen lòt tus hơ bơtô ƀồc, gŏ pơnai lŭ neh gơtă bơh bơtô ƀồc.

² Behơ̆ khai ntoat tus hơ Simôn Pier mơ cau bơtê ndai, la cau Yàng Jesu kòñ gơboh, mơ đơs lah: “Cau neh tă cèng Yàng bơh di bơtô ƀồc, mơ bol hi ò git ntềng đah bol khai ơn Kơnràñ.”

³ Behơ̆ Pier mơ cau bơtê ndai lik lòt tus hơ bơtô ƀồc.

⁴ Bàr nă ntoat bal, mơ cau bơtê ndai ntoat mhar rlau mơ Pier, mơ tus lài hơ bơtô ƀồc.

⁵ Khai kun tơmềt, gŏ bài pùt gam ơm tòm hơ̆, mơya khai ò mut.

⁶ Simôn Pier jat bơh tơnơ̆ kung tus, mut tòm bơtô gŏ bài pùt ƀồc gam ơm tòm hơ̆.

⁷ Mơ chèo gòm bồ Yàng Jesu dê ơm bal dô bă mơ bài che dơmài, mơya gơpồt ơn is dô bă tiah ndai.

⁸ Tŭ hơ̆ cau bơtê ndai, la cau neh tus lài hơ bơtô ƀồc, kung mut tòm hơ̆ sơl, gŏ mơ dòn.

⁹ Bơh bol khai òhềt git jơnau Sră Goh cih lah Yàng Jesu pal kis wơl bơh bơta chơt.

¹⁰ Chòp bàr nă cau bơtê rê wơl hơ hìu bol khai dê.

Yàng Jesu tơlik să mơ Mari Madơlen

¹¹ Mơya Mari gen ntào đah bơdìh bơtô ƀồc mơ ñìm, khai ñìm ndang kun tơmềt ndang tòm bơtô ƀồc.

¹² Gŏ bàr nă cau gơnrơh soh ào bò, dô nă nggui đah bồ, dô nă nggui đah jơng, di tiah neh tơmbic ƀồc Yàng Jesu.

¹³ Bàr nă cau gơnrơh đơs lah: “Ơ cau ùr, ñchi bơh tài ai ñìm taih?” Khai đơs lah: “Tài bơh cau neh pơrdô Yàng añ, mơ ò git ntềng đah bol khai ơn Kơnràñ.”

¹⁴ Lồc đơs behơ̆, khai wơlke gŏ Yàng Jesu ntào tềng hơ̆, mơya ò git hơ̆ la Yàng Jesu.

¹⁵ Yàng Jesu đơs mơ khai lah: “Ơ cau ùr, ñchi bơh tài ai ñìm taih? Ñcau ai jòi?” Khai tồnlah hơ̆ la cau lơh suơn, gen đơs lah: “Ơ ồng, dilah ồng neh cèng pơrdô Kơnràñ, dan yal añ in git ntềng đah ồng neh ơn Kơnràñ, gen añ lòt tus nàng ai wơl.”

¹⁶ Yàng Jesu đơs lah: “Ơ Mari!” Mari wơlke, đơs mơ jơnau Hebrơ lah: “Rabôni!” (hơ̆ la Cau Bơto).

¹⁷ Yàng Jesu đơs lah: “Bañ ƀư di Añ, bơh Añ òhềt guh rê hơ Bèp. Mơya ai lòt tus tĕ hơ oh mi Añ, mơ đơs mơ bol khai lah: Añ guh rê hơ Bèp Añ, mơ la Bèp bol mê sơl, hơ Yàng Tom Trồ Añ mơ la Yàng Tom Trồ bol mê sơl.”

¹⁸ Mari Madơlen lòt yal ală cau bơtê in lah: Añ neh gŏ Yàng, mơ Kơnràñ neh đơs mơ khai ală bơta hơ̆.

Yàng Jesu tơlik să mơ ală cau bơtê

¹⁹ Tòm mho ngai hơ̆, la ngai sơnròp tòm dô poh, ală mpồng di tiah ală cau bơtê ơm neh til tài bơh bol khai rngòt di cau Juda, Yàng Jesu tus ntào digùl bol khai mơ đơs lah: “Lơngap lơngai bol mê in!”

²⁰ Lồc đơs behơ̆ Kơnràñ sơnio bol khai in sền tê mơ wĕ Kơnràñ dê. Behơ̆ ală cau bơtê gŏ Yàng gen hòn chò.

²¹ Yàng Jesu đơs tai mơ bol khai lah: “Lơngap lơngai bol mê in! Bèp neh sồr Añ lòt tus be lơi, gen Añ kung sồr bol mê lòt tus behơ̆ sơl.”

²² Neh Kơnràñ đơs behơ̆ rau, gen khồm nhơm hơđang ală cau bơtê mơ đơs lah: “Dòp tĕ Yàng Hwềng Goh.

²³ Dilah bol mê toh glài cau lơi, gen glài hơ̆ rơp geh toh; ai dilah bol mê ò toh glài cau lơi, gen glài hơ̆ gam wơl.”

²⁴ Mơya Thôma sơnđan la Didim, la dô nă cau tòm jơt bàr nă cau bơtê, ò ơm bal mơ bol khai tòm tŭ Yàng Jesu tus.

²⁵ Behơ̆ ală cau bơtê ndai đơs mơ khai lah: “Bol hi neh gŏ Yàng.” Mơya khai đơs lah: “Dilah añ ò gŏ tềl đìn di mpàng tê Kơnràñ, dilah añ ò ai ràs tê ƀư di tiah tềl đìn, mơ dilah añ ò ai tê ƀư di wĕ Kơnràñ, gen añ ò dòn.”

²⁶ Tòm phàm ngai tơnơ̆, ală cau bơtê Kơnràñ dê ơm bal tòm hìu, gơs Thôma ơm bal sơl; ală mpồng neh til, Yàng Jesu tus ntào digùl bol khai mơ đơs lah: “Lơngap lơngai bol mê in!”

²⁷ Chòp Kơnràñ đơs mơ Thôma lah: “Ai tĕ ràs tê mê ƀư tềng do mơ sền tĕ tê Añ, ai tĕ tê mê ƀư dê wĕ Añ; bañ pin, mơya dòn tĕ.”

²⁸ Thôma ho lah: “Khoai Yàng añ mơ Yàng Tom Trồ añ!”

²⁹ Yàng Jesu đơs lah: “Bơh mê neh gŏ Añ gen tàng mê dòn. Lơngai ală cau in òhềt gŏ mơya neh dòn.”

³⁰ Yàng Jesu neh lơh di đap ală cau bơtê Kơnràñ dê oă tềl krơi ndai tai, mơ ò cih tòm sră do.

³¹ Mơya ală broă do neh cih nàng bol mê in dòn lah Yàng Jesu la Bơtau Krist, la Kòn Yàng Tom Trồ, mơ kơnòm di bơta bol mê dòn, gen geh bơta kis tòm sơnđan Kơnràñ.