Jang 19 - Sră Goh 2018

Bơta lơh nền Pilat dê

¹ Tŭ hơ̆ Pilat sồr cèng Yàng Jesu mơ pù lơh Kơnràñ.

² Ală cau ling tàñ dô nơm sơgơn mơ lò, tơndau di bồ Kơnràñ, mơ tơnsoh Kơnràñ in dô nơm ào gur.

³ Bol khai tus rềp hơ Kơnràñ mơ đơs lah: “Khoai bơtau làng bol Juda!” Gen pah Kơnràñ.

⁴ Pilat lik wơl dô dơ̆ tai, mơ đơs mơ làng bol: “Do añ lam khai lik hơ bol mê, nàng bol mê in git lah añ ò bàn glài lơi tòm khai.”

⁵ Behơ̆ Yàng Jesu ndau sơgơn lò, soh ào gur mơ lik, gen Pilat đơs mơ bol khai lah: “Do, sền cau do!”

⁶ Mơya tòm tŭ ală cau gơnoar lam bồ ơn phan duh khoai mơ ală cau ling gŏ Kơnràñ, gen driau dờng lah: “Pơng tĕ khai di chi pơng, pơng tĕ khai di chi pơng!” Pilat đơs mơ bol khai lah: “Să tòm bol mê cèng tĕ khai mơ pơng di chi pơng, tài bơh añ ò bàn glài dô êt lơi tòm khai.”

⁷ Cau Juda ho lah: “Bol hi gơs dô bơta boh lam, jat bơta boh lam hơ̆ khai pal chơt, tài bơh khai neh sơnđan is să khai la Kòn Yàng Tom Trồ.”

⁸ Tòm tŭ Pilat kơno jơnau hơ̆ gen sơlo rngòt oă tai.

⁹ Khai mut wơl tòm hìu khai mơ đơs mơ Yàng Jesu lah: “Mê bơh lơi tus taih?” Mơya Yàng Jesu ò ho.

¹⁰ Behơ̆ Pilat đơs mơ Kơnràñ lah: “Mê ò đơs bơta lơi mơ añ ơ? Mê ò git lah añ gơs gơnoar hồ mơ kung gơs gơnoar pơng mê di chi pơng ò ơ?”

¹¹ Yàng Jesu ho lah: “Dilah ò di bơh hơđang neh ai ồng in, gen ồng ò gơs gơnoar lơi hơđang Añ; behơ̆ tàng, cau neh bơtào Añ ồng in gen cau hơ̆ gơs glài dờng rlau tai.”

¹² Tŭ hơ̆ Pilat jòi bơta nàng hồ Kơnràñ, mơya cau Juda driau dờng lah: “Dilah ồng hồ cau do, gen ồng ò di la dòn song mơ Sesa, bơh kòp nă cau lơi bơtào is să khai gơs bơtau gen hơ̆ la tòmdră mơ Sesa!”

¹³ Tòm tŭ Pilat kơno jơnau hơ̆ gen lam Yàng Jesu lik, gen nggui di tiah cahrña, tiah sơnđan la Tiah Bơt Lŭ, jơnau Hebrơ sơnđan la Gabatha.

¹⁴ Mơ tai, tŭ hơ̆ la ngai Rcang Lài bơta pơjum sa Lòt Gan, mơ pơgap di di jơ prau. Pilat đơs mơ cau Juda lah: “Do Bơtau bol mê dê!”

¹⁵ Bol khai driau dờng lah: “Tơnroh tĕ khai, tơnroh tĕ khai! Pơng tĕ khai di chi pơng!” Pilat đơs mơ bol khai lah: “Añ rơp pơng bơtau bol mê di chi pơng ơ?” Ală cau gơnoar lam bồ ơn phan duh khoai ho lah: “Bol hi ò gơs bơtau ndai tai rlau mơ Sesa.”

¹⁶ Gen khai jào Kơnràñ bol khai in nàng pơng di chi pơng. Behơ̆ bol khai lam Yàng Jesu lòt.

Yàng Jesu kong pơng di chi pơng

¹⁷ Yàng Jesu tui chi pơng lòt tus hơ Dòr Ntìng Bồ, jơnau Hebrơ sơnđan la Gôgôtha.

¹⁸ Tềng hơ̆ bol khai pơng Kơnràñ, mơ gơs bàr nă cau ndai kong pơng bal mơ Kơnràñ, dô nă đah ma, dô nă đah kiau, Yàng Jesu digùl.

¹⁹ Pilat kung sồr cih dô nơm mpàn mơ yồng hơđang chi pơng lah: “JESU CAU NASARET, BƠTAU LÀNG BOL JUDA.”

²⁰ Tài bơh tiah Yàng Jesu kong pơng la rềp di ƀòn dờng, mơ jơnau neh cih la jơnau Hebrơ, jơnau Latin mơ jơnau Grek. Gen tàng gơs oă cau Juda sền git.

²¹ Behơ̆ ală cau gơnoar lam bồ ơn phan duh khoai làng bol Juda dê đơs mơ Pilat lah: “Dan bañ cih: ‘Bơtau làng bol Juda,’ mơya cih lah: Khai đơs: ‘Añ la Bơtau làng bol Juda.’”

²² Pilat ho lah: “Jơnau añ neh cih gen añ neh cih rau.”

²³ Tòm tŭ ală cau ling neh pơng Yàng Jesu di chi pơng rau, gen ai ồi ào Kơnràñ dê tòmpà poan pơnah, kòp nă cau ling geh dô pơnah. Bol khai kung ai ào jrùh dơlam Kơnràñ dê sơl, mơ ào hơ̆ ò gơs gùng jing, gơs mìng dô pang bài tàñ bơh hơđang tus hơđơm.

²⁴ Behơ̆ bol khai đơs bal mơ gơp lah: “Bañ crè ào do, mơya bol he tă khà tĕ nàng sền cau lơi geh.” Hơ̆ la tồ gơlik di ngan be jơnau Sră Goh cih lah: “Bol khai neh tòmpà ồi ào Añ, Mơ tă khà nàng ai ào dơlam Añ jê sơl.” Hơ̆ la broă ală cau ling lơh.

²⁵ Mè Kơnràñ ntào di gah chi pơng Yàng Jesu dê, bal mơ oh mi mè Kơnràñ dê, Mari bau Kleôpa, mơ Mari Madơlen sơl.

²⁶ Yàng Jesu gŏ mè Kơnràñ, mơ cau bơtê Kơnràñ kòñ gơboh ntào rềp, gen đơs mơ mè lah: “Ơ mè, do la kòn mè dê!”

²⁷ Chòp Kơnràñ đơs mơ cau bơtê hơ̆ lah: “Do la mè mê!” Bơh jơ hơ̆, cau bơtê hơ̆ rò mò rê tòm hìu khai dê.

²⁸ Tơnơ̆ mơ hơ̆ Yàng Jesu git ală broă neh sir rau, tồ jơnau Sră Goh in gơlik di ngan, gen đơs lah: “Añ tơhìr dà.”

²⁹ Tềng hơ̆ gơs dô nơm gri ơn bềng dà sràt. Behơ̆ bol khai ai dô nơm phan nsồp iurŭ bềng dà sràt, ơn hơđang dô nơm gai nsồp mơ chồl rềp di bơr Kơnràñ.

³⁰ Tŭ Yàng Jesu neh liap dà sràt hơ̆, gen đơs lah: “Sir rau.” Gen Kơnràñ kun bồ mơ tơlik hwềng.

³¹ Tài bơh la ngai Rcang Lài, gen tàng ală cau Juda dan mơ Pilat sồr pòng pă ntìng jơng mơ tơmù bol khai, nàng ƀồc bol khai ò gam yồng di chi pơng tòm ngai Saƀat, bơh ngai Saƀat hơ̆ la dờng màng.

³² Behơ̆ ală cau ling lòt pòng pă ntìng jơng cau sơnròp, lồc behơ̆ tus hơ cau ne, la cau neh kong pơng bal mơ Kơnràñ.

³³ Mơya dơ̆ lòt tus di Yàng Jesu, gŏ Kơnràñ neh chơt rau, gen ò pòng pă ntìng jơng Kơnràñ.

³⁴ Bulah behơ̆ gơs dô nă cau ling ai tà hwit di wĕ Kơnràñ, gen gơlik mo mhàm mơ dà.

³⁵ Cau neh gŏ gen lơh cơng, jơnau lơh cơng khai dê la song ngan, mơ khai git he đơs song ngan tồ oh mi in kung dòn sơl.

³⁶ Ală bơta hơ̆ gơlik gơs di ngan be jơnau Sră Goh cih lah: “Ò gơs dô nơm ntìng lơi Kơnràñ dê rơp pă.”

³⁷ Mơ kung gơs jơnau ndai tòm Sră Goh cih lah: “Bol khai rơp sền gŏ Cau mơ bol khai neh hwit.”

Jôsep tơp Yàng Jesu

³⁸ Tơnơ̆ mơ hơ̆ Jôsep cau Arimathe, la cau bơtê Yàng Jesu dê dô bă ndơp ndơr, bơh rngòt di cau kwang Juda, khai dan mơ Pilat nàng ai ƀồc Yàng Jesu; gen Pilat ai gơnoar. Behơ̆ khai lòt tus nàng ai ƀồc Kơnràñ.

³⁹ Nikôđem, la cau bơh lài neh lòt tus hơ Yàng Jesu tòm trồ mang, khai kung tus sơl, mơ cèng pơgap pram jơt kơr cài trŭ bơcă bal mơ kơlhô.

⁴⁰ Behơ̆ bol khai ai ƀồc Yàng Jesu pò mơ bài che dơmài lơbơn bal mơ sơnơm ƀô, jat be bơta òs mòng cau Juda dê tòm bơta tơp ƀồc.

⁴¹ Mơ tai, tòm tiah Kơnràñ kong pơng hơ̆, gơs dô nơm suơn, tòm suơn hơ̆ gơs dô nơm bơtô ƀồc pa, òhềt tơp cau lơi.

⁴² Behơ̆ tài bơh la ngai Rcang Lài cau Juda dê, mơ bơtô ƀồc hơ̆ ơm rềp, gen bol khai tơp Yàng Jesu tềng hơ̆.