Jang 16 - Sră Goh 2018

Bơtau Pơndòm Pơniang

¹ “Añ neh yal bol mê in ală bơta hơ̆ nàng bol mê klàs gơtup tìs.

² Bol khai rơp bơtrơh tơlik bol mê bơh di hìu jum; mơ rơp tus di tŭ, dơ̆ cau lơi tơnchơt bol mê, gen tồnlah duh broă Yàng Tom Trồ.

³ Bol khai rơp lơh ală bơta hơ̆, tài bơh ò git Bèp, kung ò git Añ sơl.

⁴ Mơya Añ neh yal ală bơta hơ̆ bol mê in, nàng tŭ jơ tus, gen bol mê kah lah Añ neh đơs ală bơta hơ̆ mơ bol mê rau. Añ ò đơs ală bơta hơ̆ mơ bol mê bơh tŭ sơnròp, bơh Añ gam ơm mơ bol mê.

⁵ Mơya tŭ do Añ rê wơl hơ Bơtau neh sồr Añ lòt tus, mơ tòm bol mê ò gơs cau lơi lùp Añ lah: ‘Ntềng đah Kơnràñ lòt taih?’

⁶ Mơya tài bơh Añ neh yal ală bơta hơ̆ bol mê in, gen nùs bol mê bềng bơta moat jrùng.

⁷ Bulah behơ̆, Añ đơs song ngan mơ bol mê: Añ lòt la kwơ ngan bol mê in bơh dilah Añ ò lòt gen Bơtau Pơndòm pơniang ò tus hơ bol mê: Mơya dilah Añ lòt, gen Añ rơp sồr Kơnràñ tus hơ bol mê.

⁸ Tŭ Kơnràñ tus gen rơp bơto tơnggit dunnia in bơh tồi glài, bơh bơta song ring mơ bơh bơta cahrña:

⁹ Bơh tồi glài, tài bơh bol khai ò dòn Añ;

¹⁰ Bơh bơta song ring, tài bơh Añ rê wơl hơ Bèp, mơ bol mê ò gŏ Añ tai:

¹¹ Bơh bơta cahrña, tài bơh bơtau dunnia do neh kong cahrña rau.

¹² Añ gam gơs oă bơta tai kòñ đơs mơ bol mê, mơya tŭ do bol mê ò rgơi git wă.

¹³ Mơya tòm tŭ Hwềng Jơnau song dê tus, gen Kơnràñ rơp lam bol mê tòm làm jơh jơnau song; bơh Kơnràñ ò đơs is he dê, mơya đơs bơta lơi Kơnràñ kơno, mơ yal lài bol mê in ală bơta rơp tus.

¹⁴ Kơnràñ rơp lơh gơklŏ Añ in, bơh Kơnràñ rơp ai bơta bal mơ Añ mơ yal lài bol mê in.

¹⁵ Jơh ală bơta lơi Bèp gơs la bal mơ Añ, gen tàng Añ đơs lah Kơnràñ rơp ai bơta bal mơ Añ mơ yal lài bol mê in.”

Yàng Jesu pơndòm pơniang cau bơtê bơh bơta cah is

¹⁶ “Gam dô êt jŏ, bol mê ò gŏ tai Añ, gen gam dô êt jŏ tai, bol mê rơp gŏ wơl Añ.”

¹⁷ Behơ̆ gơs cau bơtê ƀà tòmbơhbơr bal lah: “Kơnràñ đơs mơ bol he lah: ‘Gam dô êt jŏ, bol mê ò gŏ tai Añ, gen gam dô êt jŏ tai, bol mê rơp gŏ wơl Añ,’ mơ ‘Bơh Añ rê wơl hơ Bèp,’ hơ̆ la ñchi jơnau taih?”

¹⁸ Bol khai đơs lah: “‘Gam dô êt jŏ,’ hơ̆ la ñchi jơnau taih? Bol he ò git wă Kơnràñ đơs bơh bơta lơi.”

¹⁹ Yàng Jesu git bol khai kòñ lùp, gen đơs lah: “Bol mê lùp bal bơh bơta Añ neh đơs lah: ‘Gam dô êt jŏ, bol mê ò gŏ tai Añ, gen gam dô êt jŏ tai, bol mê rơp gŏ wơl Añ,’ sơl?

²⁰ Ngan, Añ đơs ngan mơ bol mê, bol mê rơp ñìm mơ rac ròc, ai dunnia rơp hòn chò; bol mê rơp moat jrùng, mơya bơta moat jrùng bol mê dê rơp gơlik gơs bơta hòn chò.

²¹ Tòm tŭ cau ùr ơm deh gen gơs bơta moat jrùng, bơh jơ khai dê neh tus rau; mơya tòm tŭ kòn dềt neh lik rau, gen khai ò kah tai bơta bòl glar jê sồt hơ̆, mơya hòn chò bơh gơs dô nă cau neh deh tòm dunnia.

²² Behơ̆ tŭ do bol mê gơs bơta moat jrùng, mơya Añ rơp gŏ wơl bol mê gen nùs bol mê rơp hòn chò, mơ ò gơs cau lơi rgơi kơñau bơta hòn chò bol mê dê.

²³ Tòm ngai hơ̆ bol mê rơp ò lùp Añ bơh bơta lơi tai. Ngan, Añ đơs ngan mơ bol mê, bơta lơi bol mê rơp dan mơ Bèp, gen Kơnràñ rơp bơh sơnđan Añ mơ ai bol mê in.

²⁴ Tus di tŭ do, bol mê òhềt ai sơnđan Añ mơ dan bơta lơi. Dan tĕ, gen bol mê rơp geh, tồ bơta hòn chò bol mê dê geh wil tơl.

²⁵ Añ neh ai jơnau pơnyơu nàng đơs ală bơta hơ̆ mơ bol mê. Jơ tus, gen Añ ò tai ai jơnau pơnyơu nàng đơs mơ bol mê ò, mơya Añ rơp yal loh làng bơh Bèp bol mê in.

²⁶ Tòm ngai hơ̆ bol mê rơp ai sơnđan Añ mơ dan, Añ ò đơs Añ rơp bơh bol mê mơ hòi dan mơ Bèp ò;

²⁷ Bơh să tòm Bèp kòñ gơboh di bol mê, tài bơh bol mê neh kòñ gơboh di Añ, mơ dòn lah Añ bơh Yàng Tom Trồ mơ tus.

²⁸ Añ lik bơh di Bèp mơ lòt tus tòm dunnia; mơ tai, Añ rơp sang dunnia mơ rê wơl hơ Bèp.”

²⁹ Ală cau bơtê đơs lah: “Tŭ do Kơnràñ đơs loh làng, ò ngui jơnau pơnyơu tai.

³⁰ Tŭ do bol hi git lah Kơnràñ git jơh ală bơta, ò càng cau lơi lùp Kơnràñ; bơh hơ̆ bol hi dòn lah Kơnràñ lik bơh di Yàng Tom Trồ”

³¹ Yàng Jesu ho lah: “Tŭ do bol mê dòn sơl?

³² Do jơ tus, mơ neh tus rau, tŭ bol mê rơp gơprah gơpring, kòp nă lòt gùng is, mơ lòi is dô nă Añ; mơya Añ ò ơm is dô nă, tài bơh Bèp ơm mơ Añ.

³³ Añ neh đơs ală bơta hơ̆ bol mê in, tồ bol mê in gơs bơta lơngap lơngai tòm Añ. Bol mê rơp gơs bơta rung rài tòm dunnia, mơya kơ̆ tĕ nùs; Añ neh pha mơ dunnia rau.”