Jang 10 - Sră Goh 2018

Cau ê belàt lơbơn niam

¹ “Ngan, Añ đơs ngan mơ bol mê, cau lơi ò bơh mpồng mơ mut tòm wàng belàt, mơya hào mut bơh gùng ndai, cau hơ̆ la cau ntung, cau kơñau.

² Mơya cau lơi mut bơh mpồng, hơ̆ la cau ê belàt.

³ Cau kơp mpồng pò khai in, belàt kơno jơnau đơs cau ê dê; cau ê hòi sơnđan belàt khai dê mơ lam gơlik hơ tiah.

⁴ Tŭ neh tơlik jơh ală belàt khai dê, cau ê lòt lài; belàt jat bơh tơnơ̆, bơh belàt mòng di jơnau đơs khai dê.

⁵ Belàt ò jat cau crih mat, mơya gơ dô bơh di khai, tài bơh belàt ò mòng di jơnau đơs cau crih mat dê.”

⁶ Yàng Jesu yal pơnyơu hơ̆ bol khai in, mơya bol khai ò git wă ñchi jơnau Kơnràñ kòñ đơs.

⁷ Behơ̆, Yàng Jesu đơs tai lah: “Ngan, Añ đơs ngan mơ bol mê, Añ la mpồng belàt dê.

⁸ Jơh ală cau neh lòt tus lài mơ Añ hơ̆ la ală cau ntung, cau kơñau, mơya belàt ò iat bol khai.

⁹ Añ la mpồng: Dilah cau lơi bơh Añ mơ mut, gen rơp geh dong klàs. Bol khai rơp mut lik mơ bàn ƀlàng ñhơt.

¹⁰ Cau kơñau mìng tus nàng kơñau, hàl mơ tơnroh; ai Añ neh tus tồ belàt in geh bơta kis mơ bơta kis tơngkah tơngkañ.

¹¹ Añ la cau ê niam. Cau ê niam bơh mpồl belàt mơ phi bơta kis he.

¹² Cau ê ơpah ò di la cau ê; belàt ò bal mơ khai, gen tàng tŭ gŏ so rhau tus, gen khai sang belàt mơ dô. So rhau kap belàt mơ lơh gơprah gơpring jơh.

¹³ Tài bơh khai la cau ê ơpah, gen tàng ò kơlôi bơh belàt dô êt lơi.

¹⁴ Añ la cau ê lơbơn niam. Añ git belàt Añ jê mơ belàt Añ git Añ,

¹⁵ kung be Bèp git Añ mơ Añ git Bèp behơ̆ sơl. Añ bơh mpồl belàt mơ phi bơta kis Añ.

¹⁶ Añ gam gơs ală belàt ndai ò bal mơ wàng do; Añ pal lam gơrê sơl, belàt hơ̆ rơp kơno jơnau đơs Añ jê, mơ rơp gơs mìng dô mpồl mơ dô nă cau ê lơm.

¹⁷ Tài behơ̆ tàng Bèp kòñ gơboh dê Añ, la bơh Añ phi bơta kis Añ nàng geh dòp wơl.

¹⁸ Ò gơs cau lơi tă bơta kis Añ, mơya Añ phi is Añ jê; Añ gơs gơnoar phi bơta kis mơ gơs gơnoar ai wơl; Añ neh dòp jơnau sồr hơ̆ bơh di Bèp Añ.”

¹⁹ Tài bơh ală jơnau hơ̆, ală cau Juda gơs bơta cah mpồl tai.

²⁰ Oă cau tòm bol khai đơs lah: “Khai kòl cà lơh mơ sơnrang; ñchi bol mê gam iat khai taih?”

²¹ Cau ƀà đơs lah: “Hơ̆ ò di la jơnau đơs dô nă cau kòl cà lơh ò. Mbe cà rgơi pò mat cau jơngo in tiah?”

Yàng Jesu kòl pơndang sang

²² Tŭ hơ̆ la kơnhai noat mrềt, tòm ƀòn dờng Jerusalem gơs bơta pơjum ơn Hìu Duh Khoai.

²³ Yàng Jesu lòt tòm tiah gơrê bal mơ hìu duh khoai, hơđơm ƀlàng rơng Salômôn dê.

²⁴ Gen ală cau Juda gơrwàng gùt dar Kơnràñ mơ lùp lah: “Cau Bơto lòi bol hi pal kơp gơn jơl tus tŭ lơi taih? Dilah Cau Bơto la Bơtau Krist, gen đơs tĕ loh làng bol hi in.”

²⁵ Yàng Jesu ho lah: “Añ neh yal bol mê in, mơya bol mê ò dòn; ală broă Añ neh lơh tòm sơnđan Bèp Añ lơh cơng Añ in lơm.

²⁶ Mơya bol mê ò dòn, tài bơh bol mê ò di la belàt Añ jê.

²⁷ Belàt Añ kơno jơnau Añ, Añ git bol gơ mơ bol gơ jat Añ.

²⁸ Añ ai bol gơ in bơta kis gam sùm sùm; bol gơ ò gơs tŭ lơi roh rui ò mơ ò gơs cau lơi kơñau bol gơ bơh tê Añ.

²⁹ Bèp Añ, la Bơtau dờng rlau jơh neh ai ală belàt hơ̆ Añ in mơ ò gơs cau lơi rgơi kơñau bol gơ bơh di tê Bèp.

³⁰ Añ mơ Bèp la dùl.”

Ală cau Juda kòñ cơm lŭ di Yàng Jesu

³¹ Ală cau Juda dòñ tai lŭ nàng cơm di Kơnràñ.

³² Yàng Jesu đơs mơ bol khai lah: “Añ neh ràng tơlik bol mê in oă broă niam bơh di Bèp; behơ̆, bơh broă lơi ală bol mê cơm lŭ di Añ taih?”

³³ Ală cau Juda ho lah: “Bol hi ò cơm lŭ di ồng tài bơh broă niam, mơya bơh jơnau đơs tràl sơrbil; ồng la kòn mơnus mơ bơtào is să he la Yàng Tom Trồ.”

³⁴ Yàng Jesu ho lah: “Ò di tòm bơta boh lam bol mê dê gơs cih lah: ‘Añ neh đơs: Ală bol mê la yàng,’ ò ơ?

³⁵ Dilah bơta boh lam sơnđan ală cau dòp geh jơnau Yàng Tom Trồ dê la yàng, (mơ jơnau Sră Goh ò rgơi sang lòi ò),

³⁶ gen Añ do, la Bơtau Bèp neh ơn is sàng goh mơ sồr lòt tus tòm dunnia, ñchi bơh tài bol mê đơs Añ đơs tràl sơrbil tòm tŭ Añ đơs lah: ‘Añ la Kòn Yàng Tom Trồ,’ dê taih?

³⁷ Dilah Añ ò lơh ală broă Bèp Añ jê, gen bol mê bañ dòn Añ;

³⁸ Ai dilah Añ lơh ală broă hơ̆, gen bulah bol mê ò dòn Añ, dòn tĕ ală broă Añ jê, nàng bol mê in rgơi git mơ wă lah Bèp ơm tòm Añ mơ Añ ơm tòm Bèp.”

Yàng Jesu tiă đah ne hiòng Jordan

³⁹ Bol khai jòi tai bơta nàng kup Kơnràñ, mơya Kơnràñ pleh klàs bơh di tê bol khai.

⁴⁰ Yàng Jesu tiă wơl đah mattơngai lik hiòng Jordan, tus di tiah Jang neh lơh ƀaptem dơ̆ sơnròp, mơ ơm wơl tềng hơ̆.

⁴¹ Gơs oă cau lòt tus hơ Kơnràñ mơ đơs lah: “Jang ò lơh dô nơm tềl krơi lơi ò, mơya ală bơta Jang neh đơs bơh cau do la song ngan.”

⁴² Mơ tềng hơ̆ gơs oă cau dòn Kơnràñ.