Jakơ 3 - Sră Goh 2018

Kơrmap gàr lơmpiat

¹ Ơ oh mi añ jê, tòm oh mi bañ gơs oă cau lơh gơs cau bơto, bơh git lah bol he la cau bơto gen rơp kong cahrña dô bă kràñ cê rlau tai.

² Jơh tơl nă bol he gơtup tìs tòm oă bơta. Dilah gơs cau lơi ò gơtup tìs tòm jơnau đơs he dê, hơ̆ la cau wil tơl, kung rgơi at bồ jơh să jan he sơl.

³ Dilah bol he ơn che kèp di bơr ơseh tồ gơ in dòn bơr bol he, gen bol he rgơi at bồ jơh să jan gơ sơl.

⁴ Sền tĕ di ală ơhò dờng, bulah gơ dờng kàr lơi mơ kòl càl dờng khồm pơrdô, mơya dô nơm tiang tơrwơl dềt ngan kung rgơi lam gơ jat nùs kòñ cau at bồ ơhò dê.

⁵ Kung behơ̆ sơl, lơmpiat la dô pơnah dềt tòm să jan, mơya gơ jòng să bơh ală broă dờng. Dô êt ồs rgơi sa jơh dô nơm brê dờng ơnàng ò git nđò.

⁶ Lơmpiat kung be ồs. Lơmpiat la be dô nơm dunnia tồi glài iơh bơsak ơm digùl ală pơnah tòm să jan he, lơh ƀơ̆ ƀơl jơh să jan, chu pơrguc jơh rài kis cau, ai gơ gen neh kong ồs brah tìng chu pơrguc sơl.

⁷ Jơh ală jơi phan poan jơng, jơi sềm, jơi wìn nsròng, jơi kis tòm dàlềng rgơi at bồ lơm, mơ neh kong kòn mơnus at bồ rau;

⁸ mơya ò gơs cau lơi rgơi at bồ lơmpiat, hơ̆ la dô nơm phan iơh sùm ò dơh, bềng lìu phan bih khih tơnchơt cau.

⁹ Bơh lơmpiat bol he jòng ro Yàng la Bèp, mơ kung bơh gơ bol he srat rma kòn mơnus la jơi neh geh crơng gơs bơsùt be rùp să Yàng Tom Trồ dê.

¹⁰ Bơh dô nơm bơr mơ gơlik bơta jòng ro bal mơ bơta srat rma sơl? Ơ oh mi añ jê, bañ lơh behơ̆!

¹¹ Dô nơm croh dà rgơi gơhòr lik dà lơngồt bal mơ dà bơtang sơl?

¹² Ơ oh mi añ jê, tòm chi ƀal rgơi gơlik plai Ôlibe, hala tòm ño rgơi gơlik plai chi ƀal sơl ơ? Hiòng dà ƀă kung ò rgơi gơlik dà lơngồt sơl.

Bàr bơta jak chài

¹³ Tòm oh mi, ñcau la cau jak chài, git wă? Nggui tĕ bơta lơh lòt niam he dê nàng yal tơlik broă he lơh bơh nùs niam lơnhơn mơ bơta jak chài.

¹⁴ Mơya dilah tòm nùs oh mi gơs bơta ƀoah gơjrañ, sràt bơtang mơ lơh kơnềs, gen bañ jòng să mơ đơs blac tòmdră mơ jơnau song.

¹⁵ Bơta jak chài hơ̆ ò di bơh đang jòng; mơya bal mơ dunnia, òs kòn mơnus dê, cà ràk dê.

¹⁶ Bơh tiah lơi gơs bơta ƀoah gơjrañ mơ lơh kơnềs, gen tềng hơ̆ gơs bơta sơlồng sơlàng mơ tơl jơh ală bơta iơh rmơh.

¹⁷ Mơya bơta jak chài bơh đang jòng gen lài ngan la sàng goh, tơnơ̆ tai la lơbơn niam, gơtòmsòr bal, ơt ơl, bềng lìu nùs kòñ nđàc mơ plai niam. Ò sền òsơp cau lơi hala ma blac.

¹⁸ Ală cau sih bơta ring lơngai la ală cau bơt bơtào bơta ring lơngai, gen bol khai toès bơta song ring.