Jakơ 2 - Sră Goh 2018

Bañ cah is cau lơi

¹ Ơ oh mi añ jê, oh mi neh dòn Yàng Jesu Krist la Yàng gơklŏ bol he dê, gen bañ cah is cau lơi.

² Dilah gơs dô nă cau dò sơmbiat màh, soh ào hàng mơnĕ, mut tòm hìu jum oh mi dê, mơ kung gơs cau rƀah, soh ào sut sèt, mut bal sơl;

³ dilah oh mi sền di cau soh ào hàng mơnĕ mơ đơs lah: “Jà nggui di tiah niam do,” mơ đơs mơ cau rƀah lah: “Ntào tĕ tềng hơ̆,” hala “Nggui di jơng añ,”

⁴ behơ̆ ò di la oh mi gơs bơta cah is, ai nùs iơh mơ cahrña ò ơ?

⁵ Ơ oh mi kòñ gơboh añ jê, iat tĕ do: Yàng Tom Trồ ò di neh sac cau rƀah tòm rài do nàng dòp geh bơta pas sơm tòm bơta dòn, mơ pơrdòn lơgar Kơnràñ neh ho pơgon mơ cau kòñ gơboh di Kơnràñ ò ơ?

⁶ Mơya oh mi lơh cau rƀah in ƀàssìl. Hơ̆ ò di la cau pas gơs rồn bơklơn oh mi, mơ hwài oh mi lòt tus di tiah cahrña ò ơ?

⁷ Hơ̆ ò di la bol khai đơs tràl sơrbil di sơnđan dờng màng mơ oh mi neh hòi dan ò ơ?

⁸ Dilah oh mi lơh jat wil tơl bơta boh lam dờng màng, jat be jơnau Sră Goh cih lah: “Mê kòñ gơboh tĕ di cau gơp ƀòn he be he,” gen oh mi lơh di ngan.

⁹ Mơya dilah oh mi sền òsơp di cau lơi, gen tìs glài; kòl bơta boh lam lơh nền glài oh mi la cau tìs glài.

¹⁰ Bơh cau lơi prap gàr jơh bơta boh lam mơ tìs dô bơta, gen kung gơs glài be neh tìs jơh ală bơta.

¹¹ Mơ tai, Bơtau neh đơs lah: “Bañ tìs glài rềs àr bơrnàn,” kung neh đơs lah: “Bañ tơnchơt cau.” Behơ̆ dilah mê ò tìs glài rềs àr bơrnàn mơya mê tơnchơt cau, gen mê la cau tìs mơ bơta boh lam.

¹² Behơ̆ oh mi đơs tĕ mơ lơh tĕ kung be cau rơp kong cahrña jat bơta boh lam bơta khat gơboh dê.

¹³ Bơh bơta cahrña ò kòñ nđàc di cau ò gơs bơta kòñ nđàc, mơya bơta kòñ nđàc pha rlau mơ bơta cahrña.

Bơta dòn mơ broă lơh

¹⁴ Ơ oh mi añ jê, dilah cau lơi đơs lah he gơs bơta dòn, mơya ò gơs broă lơh, gen ñchi kwơ taih? Bơta dòn hơ̆ rgơi dong klàs cau hơ̆ sơl?

¹⁵ Dilah gơs oh mi hala ruh lŏ lơi ò gơs ồi ào soh, siơ̆u phan sa kòp ngai,

¹⁶ mơ gơs dô nă cau tòm oh mi đơs mơ bol khai lah: “Lòt tĕ lơngap lơngai, ñjơr tĕ tồ ram mơ sa tĕ tồ hòm;” mơya ò pà bol khai in phan ngui sa đah poac să, gen ñchi kwơ taih?

¹⁷ Bơta dòn kung behơ̆ sơl: Dilah bơta dòn ò gơs broă lơh gen gơ chơt is gơ dê.

¹⁸ Mơya cau ƀà rơp đơs: “Mê gơs bơta dòn, ai añ gơs broă lơh.” Sơnio tĕ añ in bơta dòn ò gơs broă lơh mê dê, gen añ rơp sơnio mê in bơta dòn bơh broă lơh añ jê.

¹⁹ Mê dòn lah Yàng Tom Trồ mìng dô nă lơm, mê dòn behơ̆ la di; bơh cà ràk kung dòn behơ̆ mơ rơm să.

²⁰ Ơ cau tùl gơla ne, mê kòñ git lah bơta dòn ò gơs broă lơh la ò kwơ sơl?

²¹ Abraham, ồng pàng bol he dê, tòm tŭ ơn kòn khai dê la Isak hơđang cơnòng duh khoai, khai ò di neh kơnòm di broă lơh mơ geh kòp la song ring ò ơ?

²² Behơ̆ gen, mê gŏ bơta dòn lòt bal mơ broă lơh khai dê, mơ kơnòm di broă lơh gen sồng bơta dòn geh wil tơl.

²³ Behơ̆ gơlik di ngan be jơnau Sră Goh cih lah: “Abraham dòn Yàng Tom Trồ mơ bơta hơ̆ geh kòp la song ring khai in,” mơ khai geh sơnđan la bơyô Yàng Tom Trồ dê.

²⁴ Behơ̆ oh mi gŏ lah cau geh kòp la song ring kơnòm di broă lơh, ò di mìng kơnòm di bơta dòn lơm.

²⁵ Kung behơ̆ sơl, cau ùr dri Rahap wă rò ală cau kong sồr lòt mơ sồr bol khai jat gùng ndai mơ lòt, khai ò di geh kòp la song ring kơnòm di broă lơh ò ơ?

²⁶ Poac să ò gơs nhơm tă gen chơt, bơta dòn ò gơs broă lơh kung chơt behơ̆ sơl.