I Samuel 5 - Sră Goh 2018

Đài Bơta Ho Bal ơm tòm Asdôt mơ Ekrôn

¹ Tòm tŭ làng bol Philistin neh tòmpìt geh Đài Yàng Tom Trồ dê, bol khai cèng gơ bơh Ebenejer tus hơ Asdot.

² Gen cau Philistin cèng Đài Yàng Jehôwa dê mơ ơn gơtòm hìu bơmồng Dagôn mơ ơn gơ di gah Dagôn.

³ Tòm tŭ làng bol Asdot guh gòñ àng drim ngai tơnơ̆, rùp yàng Dagôn neh gơpừ blup mat tòm ù di đap Đài Yàng Jehôwa dê! Behơ̆ bol khai yò rùp yàng Dagôn mơ ơn wơl di tiah gơ dê.

⁴ Mơya tòm tŭ bol khai guh gòñ àng drim ngai tơnơ̆ tai, bol khai gŏ rùp yàng Dagôn neh gơpừ blup mat tòm ù di đap Đài Yàng Jehôwa dê! Bồ mơ bàr nơm tê gơ neh pă ơm di bơr mpồng, gam mìng dô nơm să lơm.

⁵ Tài bơh hơ̆ tàng ală cau kơiang bơmồng yàng Dagôn dê mơ jơh ală cau lơi mut tòm bơmồng Dagôn ò geh cơnđòa hơđang ròc bơr mpồng bơmồng yàng Dagôn dê tòm Asdot jơl tus di ngai do.

⁶ Tê Yàng Jehôwa dê klơn kơnjơ̆ hơđang làng bol Asdot mơ Kơnràñ cèng tus bơta rngòt rngơt mơ bơta pluh plàng kòp as hơđang làng bol tòm Asdot bal mơ tòm kơnhwàl ù tiah gơ dê.

⁷ Tòm tŭ làng bol ơm tòm Asdot gŏ bơta neh gơlik gơs gen bol khai đơs lah: “Đài Yàng Tom Trồ Israel dê ò di ơm mơ bol he; bơh tê Kơnràñ klơn kơnjơ̆ hơđang bol he mơ hơđang Dagôn la yàng bol he dê.”

⁸ Behơ̆ bol khai hòi pơjum jơh ală cau kwang at bồ làng bol Philistin dê mơ lùp bol khai lah: “Ñchi bol he rơp lơh mơ Đài Yàng Tom Trồ Israel dê taih?” Làng bol Gat ho lah: “Pal cèng Đài Yàng Tom Trồ Israel dê tus hơ bol hi.” Behơ̆ bol khai cèng Đài Yàng Tom Trồ Israel dê tus hơ ƀòn cau Gat dê.

⁹ Mơya tòm tŭ bol khai neh cèng gơ rau, gen tê Yàng Jehôwa dê tòmdră mơ ƀòn dờng hơ̆; Kơnràñ lơh gơlik bơta rngòt rngơt mơ dơrcul dờng ngan, Kơnràñ lơh jơh tơl nă cau kơnòm mơ cau kra, behơ̆ kòp pluh gơlik as iơh mơ as bòm.

¹⁰ Behơ̆ bol khai sồr cèng Đài Yàng Tom Trồ dê tus hơ Ekrôn. Tòm tŭ Đài Yàng Tom Trồ dê tus hơ Ekrôn, gen làng bol Ekrôn driau dờng lah: “Ñchi bơh tài cèng Đài Yàng Tom Trồ Israel dê tus mơ bol hi nàng tơnchơt bol hi mơ làng bol hi dê taih?”

¹¹ Behơ̆ bol khai hòi pơjum jơh kwang at bồ làng bol Philistin dê mơ đơs lah: “Cèng tĕ Đài Yàng Tom Trồ Israel dê lik ngài bơh di bol hi, mơ ơn tĕ gơrê wơl hơ tiah tòm gơ dê, nàng gơ rơp ò tơnchơt bol hi mơ làng bol bol hi dê!” Bơh bơta chơt neh cèng bơta rngòt rngơt làm jơh tòm ƀòn dờng hơ̆; tê Yàng Tom Trồ dê klơn kơnjơ̆ ngan hơđang tềng hơ̆.

¹² Cau lơi ò chơt gen kong jê sồt bơh kòp pluh as, mơ jơnau driau dờng tòm ƀòn neh guh tus hơ trồ.