I Samuel 4 - Sră Goh 2018

¹ Mơ jơnau đơs Samuel dê tus mơ jơh Israel. Tòm ală ngai hơ̆ cau Philistin pơjum nàng tòmlơh tòmdră mơ làng bol Israel, mơ làng bol Israel lik lòt nàng tòmdră mơ bol khai. Cau Israel lơh sàl tòm Ebenejer, mơ cau Philistin lơh sàl tòm Ephek.

Làng bol Philistin tòmpìt cèng Đài Bơta Ho Bal

² Mpồl ling Philistin rơndap brồ lơh cau Israel; mơ tòm tŭ bơta tòmlơh bal bàr đah, gen cau Philistin lơh cau Israel kong alah, mơ cau Philistin neh tơnchơt pơgap poan rbô nă cau tòm tiah tòmlơh.

³ Tòm tŭ cau ling tòmlơh rê wơl hơ sàl, gen ală cau kwang kra Israel dê lùp lah: “Ñchi bơh tài Yàng Jehôwa neh lòi bol he kong alah tòm ngai do di đap cau Philistin taih? Bol he lòt lă cèng Đài Bơta Ho Bal Yàng Jehôwa dê bơh Silô, tồ Kơnràñ lòt bal mơ bol he mơ dong klàs bol he bơh bơta pràn ală cau sò tơm bol he dê.”

⁴ Behơ̆ làng bol sồr cau lòt tus hơ Silô mơ cèng bơh hơ̆ Đài Bơta Ho Bal Yàng Jehôwa Gơnap Gơnoar Dờng Làm Jơh dê la Bơtau nggui tòm sơbàn hơđang ceruƀim. Bàr nă kòn klau Heli dê la Hôpni mơ Phineas ơm tềng hơ̆, bal mơ Đài Bơta Ho Bal Yàng Tom Trồ dê.

⁵ Tòm tŭ Đài Bơta Ho Bal Yàng Tom Trồ dê neh tus di tiah bơtào sàl, gen jơh Israel driau dờng ngan tian gơs ù gơlơnggơr.

⁶ Tòm tŭ cau Philistin kơno jơnau driau dờng hơ̆, gen bol khai lùp lah: “Ñchi gơtha bơh sap driau dờng hơ̆ tòm sàl cau Hebrơ dê taih?” Tòm tŭ cau yal bol khai in git la Đài Bơta Ho Bal Yàng Jehôwa dê neh tus tòm sàl,

⁷ gen cau Philistin rngòt mơ đơs lah: “Yàng Tom Trồ neh tus tòm sàl.” Bol khai kung đơs lah: “Bơh òhềt gơs bơta lơi neh gơlik gơs be do bơh lài.”

⁸ Bòl glar ngan bol he in! Ñcau rơp dong tă bol he bơh di gơnoar ală yàng gơs gơnoar pràn be do taih? Hơ̆ la ală yàng neh lơh cau Ejiptơ bơh ală bơta rung rài tòm ƀlàng ngềt ngơt.

⁹ Ơ cau Philistin, lơh khin cha tĕ, nàng bol mê ò gơlik gơs dĭ cau Hebrơ kung be bol khai neh lơh dĭ bol mê in! Lơh tĕ be cau dờng mơ tòmlơh tĕ!

¹⁰ Behơ̆ cau Philistin tòmlơh, mơ cau Israel kong alah, mơ bol khai dô rê tòm sàl kòp nă bol khai dê. Gơs bơta tơnchơt la dờng ngan, tềng hơ̆ cau Israel gơpừ chơt pe jơt rbô nă cau ling.

¹¹ Đài Bơta Ho Bal Yàng Tom Trồ dê gơkòl kup cèng, mơ bàr nă kòn klau Heli dê la Hôpni mơ Phineas kong tơnchơt.

Bơta chơt Heli dê

¹² Kung tòm ngai hơ̆, gơs dô nă cau Benjamin ntoat bơh tiah tòmlơh tus hơ Silô, ồi ào khai dê neh gơcrè mơ thul hơđang bồ.

¹³ Tòm tŭ khai tus Heli ơm nggui hơđang cơnòng khai dê di gah gùng kơp gơn, bơh nùs khai rngòt rơm să bơh Đài Yàng Tom Trồ dê. Tòm tŭ cau klau hơ̆ mut tòm ƀòn dờng mơ yal jơnau neh gơlik gơs gen jơh dô ƀòn nggà driau dờng.

¹⁴ Heli kơno jơnau nggà driau hơ̆ gen lùp lah: “Bơta nggồr nggàc do la ñchi taih?” Gen cau hơ̆ sơrbac sơrbang tus mơ yal Heli in.

¹⁵ Tŭ hơ̆ Heli neh gơs sin jơt phàm nam, mơ mat khai neh jơngo, behơ̆ tàng khai ò rgơi gŏ.

¹⁶ Cau hơ̆ đơs mơ Heli lah: “Añ pa tus bơh di tiah tòmlơh; ngai do añ neh dô bơh di tiah tòmlơh.” Heli lùp lah: “Ơ kòn, neh gơlik gơs mbe lơi taih?”

¹⁷ Cau cèng jơnau hơ̆ ho lah: “Israel neh dô bơh di đap cau Philistin, neh gơs bơta tơnchơt dờng ngan digùl mpồl ling; bàr nă kòn ồng dê la Hôpni mơ Phineas kung neh chơt sơl, mơ Đài Bơta Ho Bal Yàng Tom Trồ dê neh gơkòl cau kup cèng.”

¹⁸ Tòm tŭ khai yal bơh Đài Bơta Ho Bal Yàng Tom Trồ dê, gen Heli gơpừ sơrplàng bơh di cơnòng khai dê di gah mpồng mut tòm ƀòn. Khai pă ngko mơ chơt, bơh khai neh kra mơ lơmă. Khai neh tề làm Israel tòm poan jơt nam.

¹⁹ Ƀan khai dê la bau ùr Phineas bun mòr deh. Tòm tŭ khai kơno la Đài Yàng Tom Trồ dê neh cau kup cèng, po bèp khai mơ bau klau khai neh chơt jơh gen nisơna khai jê deh mơ deh kòn.

²⁰ Tòm tŭ khai mòr chơt, ală cau ùr ơm dong khai tềng hơ̆ đơs lah: “Bañ kơlôi rngòt, bơh ai neh deh dô nă kòn klau.” Mơya khai ò ho wơl hala ơn nùs di jơnau hơ̆.

²¹ Khai tơmoh sơnđan kòn hơ̆ la Ikabôt gơs gơtha lah: “Bơta gơklŏ neh cah ngài bơh Israel,” tài bơh Đài Yàng Tom Trồ dê neh gơkòl kup cèng mơ bơta chơt po bèp khai mơ bau klau khai dê.

²² Khai neh đơs lah: “Bơta gơklŏ neh cah ngài bơh Israel, bơh Đài Yàng Tom Trồ dê neh gơkòl kup cèng.”