I Samuel 31 - Sră Goh 2018

Bơta chơt Sol mơ kòn klau khai dê

¹ Tŭ hơ̆ cau Philistin tòmlơh mơ cau Israel. Cau Israel dô bơh di đap cau Philistin, mơ gơs oă cau gơplơ̆ chơt hơđang mơnơm Gilbôa.

² Cau Philistin ting jat tơnơ̆ Sol mơ ală kòn klau khai dê, cau Philistin tơnchơt Jônathan, Abinadap mơ Malkisua la ală kòn klau Sol dê.

³ Bơta kơlìn gơrềt pràn ngan gùt dar Sol; ală cau ling pañ àtak gŏ khai, mơ bol khai pañ di di Sol lơh khai in sồt kơnjơ̆ ngan.

⁴ Sol đơs mơ cau àñ phan tòmlơh khai dê lah: “Tă tĕ đào mê mơ srơp añ, rngòt ală cau ò siat gơltau ne rơp tus srơp añ mơ lơh ƀàssìl di añ mòn!” Mơya cau àñ phan tòmlơh khai dê rngòt ngan mơ ò bài lơh behơ̆; behơ̆ Sol ai đào khai dê mơ tòmpừ is să khai di cồng gơ.

⁵ Tòm tŭ cau àñ phan tòmlơh khai dê gŏ Sol neh chơt gen khai kung tòmpừ is să khai di cồng đào khai dê mơ chơt bal mơ Sol.

⁶ Behơ̆ Sol, pe nă kòn klau khai dê, cau àñ phan tòmlơh khai dê, mơ jơh ală cau khai dê chơt bal tòm dô ngai hơ̆.

⁷ Tòm tŭ cau Israel ơm rò gah thòng mơ ală cau ơm đah ne hiòng Jordan gŏ mpồl ling Israel neh dô mơ gŏ Sol mơ ală kòn klau khai dê neh chơt, gen bol khai sang ală ƀòn dờng bol khai dê mơ dô. Gen cau Philistin tus ơm tòm ală ƀòn hơ̆.

⁸ Ngai hìng, tòm tŭ cau Philistin tus nàng tă ai phan cau neh chơt, gen bol khai gŏ ƀồc Sol mơ ƀồc pe nă kòn klau khai dê hơđang mơnơm Gilbôa.

⁹ Bol khai koh bồ khai dê mơ tă ai ală phan tòmlơh khai dê, mơ sồr ală cau kong sồr lòt làm tiah cau Philistin nàng yal jơnau chò hòp tòm hìu duh khoai ală yàng rùp ràk bol khai dê, mơ digùl làng bol bol khai dê.

¹⁰ Bol khai ơn ală phan tòmlơh Sol dê tòm hìu duh khoai Astarte dê, mơ yồng ƀồc khai di dơrñang Betsan dê.

¹¹ Tòm tŭ làng bol Jabes Galaat kơno bơta cau Philistin neh lơh di Sol,

¹² gen jơh ală cau khin cha bol khai dê ñă lòt mang àng tus hơ Betsan. Bol khai tơmù ƀồc Sol mơ ƀồc ală kòn klau khai dê bơh di dơrñang Betsan; gen bol khai rê hơ Jabes mơ chu ală ƀồc hơ̆ tềng hơ̆.

¹³ Gen bol khai ai ală ntìng ƀồc bol khai dê mơ tơp di tòm chi nho rề tòm Jabes, mơ bol khai ơt sa tòm poh ngai.