I Samuel 3 - Sră Goh 2018

Yàng Jehôwa hòi sac Samuel

¹ Tŭ hơ̆, kơnòm klau Samuel duh broă Yàng Jehôwa hơđơm gơnoar Heli dê. Jơnau Yàng Jehôwa dê ò hwan gơs tòm pah tơngai hơ̆, bơta gơtơnggŏ ò òs gơlik gơs.

² Tŭ hơ̆ mat Heli sơntòm jơngo gen tàng khai ò rgơi sền gŏ, Heli ơm bic tòm ơdŭ khai dê;

³ Đèng Yàng Tom Trồ dê òhềt chơt, mơ Samuel neh ơm bic tòm hìu duh khoai Yàng Jehôwa dê, la tiah gơs Đài Bơta Ho Bal Yàng Tom Trồ dê.

⁴ Gen Yàng Jehôwa hòi: “Ơ Samuel! Samuel!” Khai ho lah: “Do añ.”

⁵ Mơ khai ntoat tus hơ Heli mơ đơs lah: “Do añ, ồng neh hòi añ.” Mơya Heli đơs lah: “Añ ò hòi mê; bic wơl tĕ.” Behơ̆ khai lòt mơ bic wơl.

⁶ Dô dơ̆ tai Yàng Jehôwa hòi: “Ơ Samuel, Samuel!” Gen Samuel guh, lòt tus hơ Heli mơ đơs lah: “Do añ, ồng neh hòi añ.” Mơya Heli đơs lah: “Ơ kòn klau añ jê, añ neh ò hòi mê; rê bic wơl tĕ.”

⁷ Tŭ hơ̆ Samuel òhềt git Yàng Jehôwa, mơ jơnau Yàng Jehôwa dê òhềt geh yal tơlik mơ khai.

⁸ Yàng Jehôwa hòi Samuel dơ̆ pe, mơ Samuel guh lòt tus hơ Heli mơ đơs lah: “Do añ, ồng neh hòi añ.” Gen Heli đal git hơ̆ la Yàng Jehôwa neh hòi cau kơnòm klau do.

⁹ Behơ̆ Heli sồr Samuel lah: “Rê bic tĕ, mơ dilah Kơnràñ hòi mê, gen mê pal đơs tĕ lah: ‘Ơ Yàng Jehôwa, dan đơs tĕ bơh cau duh broă Kơnràñ dê ơm iat.’” Behơ̆ Samuel rê mơ bic wơl di tiah khai dê.

¹⁰ Yàng Jehôwa tus ntào tềng hơ̆, hòi kung be ală dơ̆ lài: “Ơ Samuel! Samuel!” Gen Samuel đơs lah: “Dan đơs tĕ bơh cau duh broă Kơnràñ dê ơm iat.”

¹¹ Mơ Yàng Jehôwa đơs mơ Samuel lah: “Sền Añ mòr lơh dô êt bơta tòm Israel, mơ rơp lơh nggồr jơh bàr đah tồr cau lơi kơno bơta hơ̆.

¹² Tòm ngai hơ̆ Añ rơp lơh gơlik wil tơl bơta tòmdră mơ Heli, jơh ală bơta Añ neh đơs bơh hìu khai dê, bơh sơnròp tus di lồi dut.

¹³ Bơh Añ neh đơs mơ khai lah Añ rơp lơh glài hìu nhă khai dê sùm sùm, tài bơh tồi glài mơ khai neh git; tài bơh ală kòn klau khai dê neh lơh ală bơta tràl sơrbil di Yàng Tom Trồ, mơ khai ò kơryan bol khai.

¹⁴ Gen tàng Añ srat să mơ hìu Heli la tồi glài hìu Heli dê rơp ò gơs tŭ lơi geh tơwài wơl sùm sùm kơnòm di phan ơn duh khoai hala phan ơn.”

¹⁵ Samuel ơm bic jơl tus diàng drim, gen khai pò ală mpồng hìu duh khoai Yàng Jehôwa dê. Khai rngòt ò khin yal Heli in bơh bơta gơtơnggŏ.

¹⁶ Mơya Heli hòi Samuel mơ đơs lah: “Ơ Samuel, kòn klau añ jê.” Samuel ho lah: “Do añ.”

¹⁷ Heli lùp lah: “Ñchi bơta Kơnràñ neh đơs mơ mê taih? Bañ pồn bơh di añ. Dan Yàng Tom Trồ lơh mê in kung behơ̆ mơ kơnjơ̆ rlau ngan, dilah mê pồn mơ añ jơnau lơi Kơnràñ neh đơs mơ mê.”

¹⁸ Behơ̆ Samuel yal khai in jơh ală bơta, ò pồn bơta lơi mơ khai. Gen Heli đơs lah: “Hơ̆ la Yàng Jehôwa, dan Kơnràñ lơh tĕ bơta lơi gơlơh niam Kơnràñ in.”

¹⁹ Samuel sơlo dờng, Yàng Jehôwa ơm bal mơ khai, mơ Kơnràñ ò lòi dô jơnau đơs lơi Kơnràñ dê gơlik ò kwơ.

²⁰ Mơ jơh Israel bơh Dan tus Beerseba git Samuel geh bơtào gơlik gơs dô nă cau gơnoar hwơr dờng màng Yàng Jehôwa dê.

²¹ Yàng Jehôwa kư̆ tơlik mat tòm Silô, mơ Kơnràñ neh yal tơlik să tòm Kơnràñ dê mơ Samuel tòm Silô bơh jơnau đơs Kơnràñ dê.