I Samuel 26 - Sră Goh 2018

Dô dơ̆ tai Dabit ò tơnchơt Sol

¹ Then cau Jip lòt tus hơ Sol tòm Gibea mơ đơs lah: “Dabit ơm pồn să hơđang dòr Hakila, tòm toh mat mơ Jesimôn.”

² Behơ̆ Sol mù hơ ƀlàng ngềt ngơt Jip bal mơ pe rbô nă cau klau geh sac rwah Israel dê nàng jòi Dabit tềng hơ̆.

³ Sol bơtào sàl hơđang dòr Hakila, tòm toh mat mơ Jesimôn di gah gùng; mơya Dabit ơm tòm ƀlàng ngềt ngơt. Tòm tŭ khai neh git Sol ting jat khai mut tòm ƀlàng ngơt,

⁴ gen khai sồr cau lòt sền òm mơ git ngan la Sol neh tus.

⁵ Gen Dabit lik lòt tus hơ tiah Sol neh bơtào sàl; mơ Dabit neh gŏ tiah Sol ơm bic bal mơ Apner kòn klau Ner, cau at bồ mpồl ling. Sol ơm bic tòm dơlam sàl, tòm tŭ mpồl ling sơntơp sàl gùt dar khai.

⁶ Gen Dabit đơs mơ Ahimelek cau Hetit, mơ Abisai, kòn klau Jeruyah, oh Jôap dê lah: “Ñcau rơp lòt bal mơ añ tus hơ sàl Sol dê taih?” Abisai ho lah: “Añ rơp lòt bal mơ ồng.”

⁷ Behơ̆ Dabit mơ Abisai lòt tus hơ mpồl ling tòm trồ mang; tềng hơ̆ Sol ơm bic lơhă tòm dơlam sàl, mơ tà khai dê sơntơp di ù rềp di bồ khai.

⁸ Abisai đơs mơ Dabit lah: “Yàng Tom Trồ neh jào cau sò tơm ồng dê tòm tê ồng ngai do, gen tàng tŭ do lòi añ pơng khai tòm ù dô tê lơm mơ đào; añ ò càng srơp tai dơ̆ bàr.”

⁹ Mơya Dabit đơs mơ Abisai lah: “Bañ tơnroh khai! Bơh cau lơi rgơi pò tê tòmdră di cau Yàng Jehôwa neh bong mơñà mơ ò gơkòl tìs glài sơl ơ?”

¹⁰ Dabit đơs tai lah: “Di ngan kung be Yàng Jehôwa kis sùm, să tòm Yàng Jehôwa rơp lơh khai, digơlan ngai chơt khai dê rơp tus, hala khai rơp lòt tòmlơh gen khai rơp kong chơt.

¹¹ Mơya dan Yàng Jehôwa kơryan añ ơn tê di cau Yàng Jehôwa neh bong mơñà. Mơya tŭ do, ai tĕ tà mơ nhồng dà ơn rềp di bồ khai, mơ bol he lòt lă.”

¹² Behơ̆ Dabit tă ai tà bal mơ nhồng dà ơn rềp di bồ Sol, mơ bol khai lik rê. Ò gơs cau lơi gŏ hala git bơh bơta hơ̆, kung ò gơs cau lơi kah rngal; bơh tơl nă bol khai bic lơhă ngan, tài bơh Yàng Jehôwa neh lơh bol khai in bic lơhă ngan.

¹³ Gen Dabit lòt tus hơ đah ne mơ ntào hơđang bồ dô nơm dòr ngài digùl bol khai.

¹⁴ Dabit hòi mpồl ling mơ hòi Apner kòn klau Ner dê mơ đơs lah: “Ơ Apner, mê rơp ò ho ơ?” Apner ho lah: “Mê la ñcau mơ hòi di cau bơtau taih?”

¹⁵ Dabit đơs mơ Apner lah: “Mê ò di la dô nă cau klau ơ? Tòm Israel ñcau ndròm mơ mê taih? Ñchi bơh tài mê ò sền gàr cau bơtau, la cau tòm mê dê taih? Bơh gơs cau tòm làng bol neh tus nàng tơnchơt cau tòm mê dê la bơtau.

¹⁶ Bơta mê neh lơh hơ̆ la ò niam. Di ngan kung be Yàng Jehôwa kis sùm, mê pal chơt tài bơh mê ò sền gàr cau tòm mê dê la cau geh Yàng Jehôwa bong mơñà. Sền tĕ ntềng đah tà bơtau dê, mơ ntềng đah nhồng dà ơn rềp di bồ bơtau dê taih?”

¹⁷ Sol đal git sap đơs Dabit dê, gen đơs lah: “Ơ Dabit kòn añ, hơ̆ la sap đơs mê dê sơl ơ?” Dabit ho lah: “Ơ bơtau, cau tòm añ jê, hơ̆ la sap đơs añ jê.”

¹⁸ Mơ khai đơs tai lah: “Ñchi bơh tài cau tòm añ jê ting jat cau duh broă bơtau dê taih? Ñchi bơta añ neh lơh taih? Añ neh lơh tìs tòm bơta lơi taih?

¹⁹ Tŭ do, dan cau tòm añ jê la bơtau ơm iat ală jơnau cau duh broă bơtau dê. Dilah Yàng Jehôwa neh chồl bơtrut bơtau tòmdră mơ añ, gen dan Kơnràñ dòp dô nơm phan ơn. Mơya dilah hơ̆ la kòn mơnus neh lơh bơta hơ̆, dan bol khai kòl srat rma di đap Yàng Jehôwa! Bơh bol khai neh bơtrơh tơlik añ ngai do bơh di pơnah añ jê tòm sre brê Yàng Jehôwa dê. Bol khai đơs lah: ‘Lòt tĕ, duh broă ală yàng ndai.’

²⁰ Tŭ do dan bañ lòi mhàm añ gơhòr tòm ù ngài bơh di đap mat Yàng Jehôwa. Bơh cau bơtau Israel dê neh lik lòt nàng jòi dô nơm sai so kung be cau lòt mòc dô nơm sềm hơđang ală mơnơm.”

²¹ Gen Sol đơs lah: “Añ neh lơh tìs. Ơ Dabit kòn añ, rê wơl tĕ. Añ rơp ò lơh iơh di mê tai, tài bơh bơta kis añ jê geh sền dờng màng di đap mê tòm ngai do; añ neh lơh dô bơta bơrngơl gơla, mơ añ neh lơh dô bơta tìs dờng ngan.”

²² Dabit ho lah: “Ơ bơtau, do la tà bơtau dê, sồr tĕ dô nă cau pơnu lòt tus hơ do nàng ai gơ.

²³ Yàng Jehôwa rơp ai phan ƀàn kòp nă cau in jat bơta song ring mơ bơta dòn song khai dê. Bơh Yàng Jehôwa neh jào bơtau tòm tê añ ngai do, mơya añ ò bài ơn tê di cau mơ Yàng Jehôwa neh bong mơñà.

²⁴ Kung be bơta kis bơtau dê geh sền dờng màng di đap añ tòm ngai do, behơ̆ dan bơta kis añ jê geh sền dờng màng di đap Yàng Jehôwa mơ dan Kơnràñ dong tă añ bơh di jơh ală bơta bòl glar.”

²⁵ Gen Sol đơs mơ Dabit lah: “Ơ Dabit kòn añ, dan mê in geh lơngai, mê rơp lơh ală broă mơ rơp geh cồng nha.” Behơ̆ Dabit lòt gùng khai dê, ai Sol rê wơl tòm hìu.