I Samuel 24 - Sră Goh 2018

Dabit ò tơnchơt Sol

¹ Tơnơ̆ mơ tŭ Sol rê wơl bơh ting jat cau Philistin, gen gơs cau yal khai in lah: “Dabit ơm tòm ƀlàng ngềt ngơt Engedi.”

² Gen Sol lam pe rbô nă cau geh sac rwah bơh digùl jơh làng bol Israel mơ lik lòt jòi Dabit mơ ală cau khai dê rềp di ală Lŭ Be Brê dê.

³ Khai tus hơ ală wàng belàt ơm di gah gùng. Tềng hơ̆ gơs dô nơm rgồng lŭ mơ Sol mut tòm hơ̆ nàng jă brê. Dabit mơ ală cau jat khai ơm tòm tiah lồi dut rgồng lŭ hơ̆ dê.

⁴ Ală cau jat Dabit đơs mơ khai lah: “Do la ngai bơh bơta hơ̆ mơ Yàng Jehôwa neh đơs mơ ồng lah: ‘Añ rơp jào phi cau sò tơm mê dê tòm tê mê nàng mê lơh di khai bơta lơi gơlơh niam mê in.’” Gen Dabit lòt òm tus mơ kơñau koh mum tiang ào jrùh Sol dê.

⁵ Tơnơ̆ mơ hơ̆ tòm nùs nhơm Dabit dê gơkòl lah pơrhơng, tài bơh khai neh koh mum tiang ào jrùh Sol dê.

⁶ Khai đơs mơ ală cau jat khai lah: “Dan Yàng Jehôwa bơkơ̆u añ lơh bơta do di cau tòm añ jê, la cau Yàng Jehôwa bong mơñà, hala pò tê tòmdră mơ khai, bơh khai la cau neh geh Yàng Jehôwa bong mơñà.”

⁷ Behơ̆ Dabit lah pơrhơng ală cau khai dê dô bă kràñ cê, mơ ò ai gơnoar bol khai brồ lơh Sol. Gen Sol ñă lik bơh rgồng lŭ mơ lòt gùng khai dê.

⁸ Tơnơ̆ hơ̆, Dabit lik bơh di rgồng lŭ, hòi Sol mơ đơs lah: “Ơ bơtau la cau tòm añ jê!” Tòm tŭ Sol wơlke sền đah ngkòi khai dê gen Dabit tơmbic să blup mat di ù mơ khoai.

⁹ Dabit đơs mơ Sol lah: “Ñchi bơh tài bơtau iat jơnau cau đơs lah: ‘Dabit jòi bơta nàng lơh iơh di bơtau taih’?

¹⁰ Ngai do bơtau neh gŏ mơ mat tòm he dê mbe Yàng Jehôwa neh jào bơtau tòm tê añ tòm rgồng lŭ, mơ gơs cau chồl añ tơnchơt bơtau mơya añ neh lòi bơtau in kis, mơ đơs lah: ‘Añ ò pò tê tòmdră mơ cau tòm añ jê tài bơh bơtau la cau neh geh Yàng Jehôwa bong mơñà.’

¹¹ Do, ơ bèp, sền tĕ dô pet ào jrùh bèp dê tòm tê añ! Bơh ngan lah añ neh koh dô pet di mum tiang ào jrùh bèp dê, mơ añ ò tơnchơt bèp, tŭ do bèp pal git loh añ ò tìs hala ò gơs glài tòmdră. Añ ò tìs glài tòmdră mơ bèp, bulah bèp neh jòi mòc añ mơ kòñ tơnroh bơta kis añ.

¹² Dan Yàng Jehôwa cahrña digùl bèp mơ añ mơ dan Yàng Jehôwa sal tê añ in bơh bơta tìs mơ bèp neh lơh di añ, mơya tê añ rơp ò tòmdră mơ bèp.

¹³ Kung be dô jơnau pơnđik cau yau dê đơs lah: ‘Ală broă lơh iơh bơsak gơlik bơh ală cau iơh bơsak,’ mơya tê añ rơp ò tòmdră mơ bèp.

¹⁴ Bơtau Israel neh lik nàng tòmdră mơ ñcau taih? Bèp ting jat ñcau taih? Ting jat dô nơm so chơt ơ? Ting jat dô nơm sai so ơ?

¹⁵ Gen tàng dan Yàng Jehôwa cahrña mơ lơh nền digùl bol he. Dan Kơnràñ sền gŏ bơta hơ̆ mơ dong tò broă añ jê; dan Kơnràñ ơm đah mơ añ tòmdră mơ bèp.”

¹⁶ Tòm tŭ Dabit neh sir đơs ală jơnau hơ̆ mơ Sol; gen Sol lùp lah: “Ơ Dabit kòn añ, hơ̆ ngan sơl la sap đơs kòn dê?” Gen Sol ñìm dờng ngan.

¹⁷ Lồc behơ̆ khai đơs mơ Dabit lah: “Mê la song ring rlau mơ añ; mê neh lơh niam gơwèt mơ añ, mơya añ neh lơh iơh gơwèt mơ mê.

¹⁸ Ngai do mê neh yal tơlik añ in bơta niam mê neh lơh gơwèt mơ añ; hơ̆ la mê neh ò tơnchơt añ tòm tŭ Yàng Jehôwa neh jào añ tòm tê mê.

¹⁹ Bơh cau lơi neh bàn cau sò tơm khai dê mơ sồr cau sò tơm hơ̆ in lòt lơngap lơngai sơl ơ? Dan Yàng Jehôwa ai bơta niam mê in bơh mê neh lơh niam gơwèt mơ añ tòm ngai do.

²⁰ Tŭ do añ git nền ngan la mê rơp gơs bơtau at bồ, mơ lơgar Israel rơp geh bơtào kơ̆ tòm tê mê.

²¹ Tŭ do ai tĕ sơnđan Yàng Jehôwa mơ srat să tòmho mơ añ lah mê rơp ò tơnroh kòn sau jơi bơtiàn añ jê, mơ mê rơp ò tơnroh sơnđan añ bơh di hìu bèp añ jê.”

²² Dabit srat să tòmho bơta hơ̆ mơ Sol. Gen Sol rê hìu, mơya Dabit mơ ală cau khai dê guh rê hơ theng kơ̆ cê khai dê.