I Samuel 10 - Sră Goh 2018

¹ Gen Samuel ai dô nơm gri mơñà mơ tuh hơđang bồ Sol, cum khai mơ đơs lah: “Yàng Jehôwa neh bong mơñà pồ bơtào mê lơh gơs cau at bồ làng bol Israel Kơnràñ dê! Mê rơp at bồ hơđang làng bol Yàng Jehôwa mơ mê rơp dong tă bol khai klàs bơh tê ală cau sò tơm gùt dar. Do la tềl sơnio mê in la Yàng Jehôwa neh bong mơñà mê in lơh gơs cau at bồ hơđang sre brê Kơnràñ dê.

² Ngai do tòm tŭ mê neh tơngac añ mơ lòt gùng gen mê rơp tìp bàr nă cau klau ơm di gah bơtô ƀồc Racel dê tòm Jelja, di nhàr ù tiah Benjamin dê. Bol khai rơp đơs mơ mê lah: ‘Ală alàng mê lòt jòi neh bàn rau, tŭ do bèp mê ò kơlôi rcang bơh alàng hơ̆ tai, mơya kơlôi rcang bơh mê. Khai neh lùp lah: “Ñchi añ pal lơh mơ kòn klau añ jê taih?”’

³ Gen mê rơp lòt bơh tềng hơ̆ mơ tus hơ tòm cha tòm Thabôr. Tềng hơ̆ mê rơp tìp pe nă cau klau lòt gùng guh hơ Yàng Tom Trồ tòm Betel, dô nă cèng pe nơm be kòn, dô nă cèng pe nơm piang lă, mơ dô nă tai cèng dô nơm nhồng gơltau tơrnòm.

⁴ Bol khai rơp lùp còp mê mơ ai mê in bàr nơm piang lă, mơ mê rơp dòp bơh di bol khai.

⁵ Tơnơ̆ mơ hơ̆ mê rơp tus hơ Gibea Yàng Tom Trồ dê, tềng hơ̆ gơs dô nơm tiah kơp gàr cau Philistin dê. Tòm tŭ mê tus rềp ƀòn dờng gen mê rơp tìp dô mpồl cau gơnoar hwơr mù bơh di tiah jơnhoa, hơđap bol khai gơs ală cau pĕ kơñi, jan sơnggơr dềt, uh rkèl mơ rơs kơñi, mơ bol khai rơp đơs hwơr.

⁶ Gen Hwềng Yàng Jehôwa dê rơp mù hơđang mê, mơ mê rơp đơs hwơr bal mơ bol khai; mơ mê rơp geh tòmgơl gơlik gơs dô nă cau ndai.

⁷ Tòm tŭ ală tềl do gơlik gơs di ngan gen lơh jat tĕ bơta lơi mê pal lơh, bơh Yàng Tom Trồ ơm bal mơ mê.

⁸ Mơ mê mù tĕ hơ Gilgal lài mơ añ; gen añ rơp mù tus mơ mê nàng ơn ală phan ơn chu pơrguc bal mơ ală phan ơn duh khoai ring lơngai, mơya mê pal gơn tòm poh ngai, jơl tus di tŭ añ tus hơ mê mơ sơnio mê in bơta mê pal lơh.”

Sol đơs hwơr

⁹ Tòm tŭ Sol wơlke nàng lòt bơh di Samuel, gen Yàng Tom Trồ ai Sol in nùs ndai; mơ jơh ală tềl hơ̆ neh gơlik gơs di ngan tòm ngai hơ̆.

¹⁰ Tòm tŭ bol khai tus hơ Gibea, dô mpồl cau gơnoar hwơr tìp khai; Hwềng Yàng Tom Trồ dê mù hơđang khai, mơ khai mut bal tòm mpồl hơ̆ đơs hwơr mơ bol khai.

¹¹ Tòm tŭ jơh ală cau git khai bơh lài gŏ khai đơs hwơr bal mơ ală cau gơnoar hwơr gen bol khai đơs bal mơ gơp lah: “Ñchi bơta neh gơlik gơs di kòn klau Kis taih? Sol kung gơs bal tòm sèng ală cau gơnoar hwơr ơ?”

¹² Gơs dô nă cau ơm tòm ƀòn hơ̆ ho lah: “Mơ bèp bol khai dê la ñcau taih?” Behơ̆ gơs dô sèng đơs pơnđik lah: “Sol kung gơs tòm mpồl ală cau gơnoar hwơr ơ?”

¹³ Tòm tŭ Sol neh ò đơs hwơr tai, gen khai rê hìu.

¹⁴ Gen wa Sol dê lùp khai mơ cau duh broă khai dê lah: “Ntềng đah bol mê neh lòt taih?” Khai ho lah: “Lòt jòi alàng, mơya tòm tŭ bol hi jòi bol gơ ò bàn gen bol hi lòt tus hơ Samuel.”

¹⁵ Wa Sol dê đơs lah: “Yal tĕ añ in git ñchi jơnau Samuel neh đơs mơ mê.”

¹⁶ Sol ho lah: “Khai neh yal bol hi in lah ală alàng neh bàn rau.” Mơya bơh ală jơnau Samuel neh đơs bơh bơta lơh bơtau gen khai ò yal bơta lơi khai in.

Sol geh yal tơnggit gơs bơtau

¹⁷ Samuel hòi làng bol Israel tus hơ Yàng Jehôwa tòm Mispa,

¹⁸ mơ đơs mơ bol khai lah: “Jehôwa Yàng Tom Trồ Israel dê đơs be do: ‘Añ neh cèng Israel lik bơh di Ejiptơ, Añ neh dong tă bol mê klàs bơh gơnoar at bồ Ejiptơ dê, mơ klàs bơh di jơh ală lơgar neh rồn bơklơn bol mê.’

¹⁹ Mơya tŭ do bol mê neh pơndang sang Yàng Tom Trồ bol mê dê la Bơtau neh dong tă bol mê bơh di jơh ală bơta rung rài mơ bòl glar. Mơ bol mê neh đơs lah: ‘Ò, dan bơtào dô nă bơtau hơđang bol hi.’ Behơ̆ tŭ do tơlik tĕ mat di đap Yàng Jehôwa jat ală jơi bơtiàn bol mê dê mơ jat mpồl hìu nhă bol mê dê.”

²⁰ Tòm tŭ Samuel neh cèng jơh ală jơi bơtiàn Israel tus rềp, gen jơi bơtiàn Benjamin geh sac rwah.

²¹ Lồc behơ̆, khai cèng jơi bơtiàn Benjamin tus rềp jat mpồl hìu nhă, gen mpồl hìu nhă Matri geh sac rwah. Lồi tơnơ̆, gen Sol kòn klau Kis geh sac rwah. Mơya tòm tŭ bol khai jòi Sol gen jòi khai ò bàn.

²² Behơ̆ bol khai lùp tai Yàng Jehôwa lah: “Ơ Yàng, cau hơ̆ neh tus tềng do sơl?” Yàng Jehôwa ho lah: “Sền ne khai ơm pồn să he digùl ală phan mơna.”

²³ Gen bol khai ntoat tus mơ cèng tơlik khai bơh tềng hơ̆, mơ tòm tŭ khai ntào digùl làng bol gen bồ mơ pơnì khai jơnhoa rlau mơ jơh ală cau ndai.

²⁴ Gen Samuel đơs mơ jơh làng bol lah: “Bol mê gŏ cau mơ Yàng Jehôwa neh sac rwah sơl? Ò gơs cau lơi ndròm be khai digùl jơh ală làng bol.” Gen làng bol driau dờng lah: “Dan cau bơtau kis jŏ!”

²⁵ Samuel yal loh làng bol in git ală bơta sồr lam bơh gơnoar at bồ cau bơtau dê. Khai cih ală bơta hơ̆ tòm dô pồt sră mơ ơn gơ di đap Yàng Jehôwa. Gen Samuel sồr jơh làng bol rê hơ hìu bol khai dê.

²⁶ Sol kung rê hơ hìu tòm khai dê tòm Gibea, gơs ală cau khin cha Yàng Tom Trồ neh lơh rngoh rngac tòm nùs lòt jat bal mơ khai.

²⁷ Mơya gơs dô êt nă cau gơlềng gơlàng đơs lah: “Mbe rgơi klau do dong tă he taih?” Bol hơ̆ sền òsơp di khai mơ ò cèng phan pà khai in. Mơya Sol kư̆ ơm ring lơngai.