I Samuel 1 - Sră Goh 2018

I. Heli mơ Samuel ( 1:1 – 7:17 ) Deh Samuel

¹ Gơs dô nă cau tòm Ramathaim Juphit, bơh di kơnhwàl kơh mơnơm Epraim, gơs dô nă cau sơnđan la Elkana, kòn klau Jerôham, sau Helihu, se Tôhu, set Jup cau Epraim.

² Khai gơs bàr nă bau ùr; dô nă sơnđan la Anne, mơ dô nă tai sơnđan la Phenina. Phenina gơs kòn, mơya Anne ò gơs kòn.

³ Kòp nam khai òs guh bơh di ƀòn khai dê nàng duh khoai mơ ơn phan duh khoai Yàng Jehôwa Gơnap Gơnoar Dờng Làm Jơh in tòm Silô, tềng hơ̆ gơs bàr nă kòn klau Heli dê la Hôpni mơ Phineas, la ală cau gơnoar ơn phan duh khoai Yàng Jehôwa dê.

⁴ Tus di ngai Elkana ơn phan duh khoai gen khai ai ală pơnah bau ùr khai in la Phenina bal mơ jơh ală kòn ùr, kòn klau khai dê sơl.

⁵ Mơya gơwèt mơ Anne khai ai dô pơnah bàr dơ̆ oă rlau tài bơh khai kòñ gơboh di khai, bơh Yàng Jehôwa neh til hìu kòn khai dê.

⁶ Cau ƀoah gơjrañ kư̆ bơrcek oă ngan lơh khai in dơrcul, tài bơh Yàng Jehôwa neh lơh khai in kơnền.

⁷ Bơta hơ̆ gơlik gơs bơh nam do tus hơ nam ne. Tŭ lơi Anne guh tus hơ hìu Yàng Jehôwa dê, Phenina kư̆ bơrcek khai, tian gơs khai ñìm mơ ò bài sa.

⁸ Gen Elkana bau klau khai dê đơs mơ khai lah: “Ơ Anne, ñchi bơh tài ai ñìm taih? Ñchi bơh tài ai ò sa taih? Ñchi bơh tài nùs ai moat jrùng taih? Añ ò di rlau mơ jơt nă kòn klau ai in ò ơ?”

⁹ Tơnơ̆ mơ tŭ bol khai neh sir ñô sa tòm Silô rau, gen Anne ñă ntào mơ tơlik mat di đap Yàng Jehôwa. Tŭ hơ̆, Heli la cau gơnoar ơn phan duh khoai ơm nggui di tiah nggui di gah jrong mpồng hìu duh khoai Yàng Jehôwa dê.

¹⁰ Anne jê sồt bòl glar khai ñìm sràt bơtang oă ngan mơ hòi dan mơ Yàng Jehôwa.

¹¹ Khai ho pơgon lah: “Ơ Yàng Jehôwa Gơnap Gơnoar Dờng Làm Jơh, dilah Kơnràñ rơp wèt sền di bơta bòl glar moat jrùng cau dĭ ùr Kơnràñ dê mơ kah wơl añ, ò hŭi cau dĭ ùr Kơnràñ dê, mơya rơp ai khai in dô nă kòn klau, gen añ rơp ơn khai be dô nă cau Najire di đap Kơnràñ, jơl jơh rài kis khai dê. Khai rơp ò ñô tơrnòm alak mơ ală phan lơh bơñul, mơ pềs koah rơp ò geh tup di bồ khai.”

¹² Tòm tŭ khai ơm hòi dan mơ Yàng Jehôwa, Heli sền sơwì bơr khai dê.

¹³ Anne ơm hòi dan òm tòm nùs, sơndồi khai dê gơ ơwañ, mơya ò kơno sap đơs khai dê; gen tàng Heli kơlôi khai bơñul ñô.

¹⁴ Gen Heli đơs mơ khai lah: “Nđò jŏ ai rơp ơm bơñul ñô behơ̆ taih? Lơh rài tĕ tơrnòm bơh di ai.”

¹⁵ Anne ho lah: “Ò di behơ̆, ơ yàng! Añ la dô nă cau ùr gơs oă ngan bơta bòl glar mơ moat jrùng; añ ò ñô tơrnòm hala alak; mơya añ ơm tuh hwềng soàn añ di đap Yàng Jehôwa.

¹⁶ Bañ sền di cau dĭ ùr ồng dê be dô nă cau ùr ơlă ơlai; bơh añ pal yal tơlik bơta dơrcul mơ moat jrùng dờng ngan añ jê tòm tŭ do.”

¹⁷ Heli ho lah: “Lòt tĕ lơngap lơngai, dan Yàng Tom Trồ Israel dê ai ai in bơta ai neh dan mơ Kơnràñ.”

¹⁸ Anne đơs lah: “Dan cau dĭ ùr ồng dê geh bơta nđàc di đap mat ồng.” Gen khai lik lòt mơ sa hùc bal mơ bau klau khai dê, muh mat khai ò gam moat jrùng tai.

¹⁹ Àng drim hìng, bol khai guh gòñ mơ duh khoai di đap Yàng Jehôwa, gen bol khai rê wơl hơ hìu bol khai dê tòm Ramathaim. Elkana ơm bal mơ bau khai la Anne, mơ Yàng Jehôwa kah wơl Anne.

²⁰ Tòm ală ngai tơnơ̆ hơ̆, Anne bun mơ deh dô nă kòn klau. Khai tơmoh sơnđan kòn hơ̆ la Samuel, mơ đơs lah: “Añ neh dan khai mơ Yàng Jehôwa.”

Anne ơn Samuel Yàng in

²¹ Elkana guh bal mơ jơh hìu nhă khai dê nàng ơn phan duh khoai kòp nam Yàng Jehôwa in, mơ nàng tơm wơl bơta khai neh ho pơgon,

²² mơya Anne ò guh bal, bơh khai đơs mơ bau klau khai lah: “Tŭ lơi kòn dềt sang pô, añ rơp cèng khai mơ tơlik mat di đap Yàng Jehôwa, mơ khai rơp ơm tềng hơ̆ sùm sùm, añ rơp ơn khai be dô nă cau Najire jơh rài.”

²³ Elkana bau klau khai đơs mơ khai lah: “Lơh tĕ bơta lơi ai kơlôi la niam rlau jơh ai in, tus di tŭ ai lòi pô khai; mìng dan Yàng Jehôwa lơh gơlik di ngan jơnau đơs Kơnràñ dê.” Behơ̆ cau ùr ơm wơl tòm hìu mơ ròng kòn klau jơl tus di tŭ khai sang pô.

²⁴ Tòm tŭ khai neh sang pô rau, gen Anne cèng kòn klau hơ̆ guh bal mơ khai tus hơ hìu Yàng Jehôwa dê tòm Silô. Khai cèng bal dô nơm kơnrồ dam pe nam, dô thùng kơmbuh phe, mơ dô nhồng gơltau tơrnòm. Khai lam kòn dềt hơ̆ tus hơ hìu Yàng Jehôwa, mơ kòn hơ̆ gam dềt ngan.

²⁵ Gen bol khai tơnchơt kơnrồ dam, mơ bol khai lam kòn dềt hơ̆ tus hơ Heli.

²⁶ Mơ Anne đơs mơ Heli lah: “Ơ yàng añ jê, di ngan kung be ồng kis, yàng añ jê, añ la cau ùr neh ơm ntào tềng do di đap ồng mơ hòi dan mơ Yàng Jehôwa.

²⁷ Bơh kòn dềt do añ neh hòi dan; mơ Yàng Jehôwa neh ai añ in bơta añ hòi dan mơ Kơnràñ.

²⁸ Gen tàng añ dan ơn khai Yàng Jehôwa in; jơh rài kis khai rơp geh ơn jơh Yàng Jehôwa in.” Mơ khai lòi kòn dềt tềng hơ̆ Yàng Jehôwa in.