I Jang 4 - Sră Goh 2018

Pal lòng sơwì ală hwềng

¹ Ơ ală cau kòñ gơboh, bañ dòn di jơh ală hwềng, mơya lòng sơwì tĕ tồ git dilah ngan ală hwềng la tus bơh Yàng Tom Trồ hala ò; tài bơh gơs oă cau gơnoar hwơr ma blac neh lòt tus tòm dunnia.

² Bơh bơta do oh mi rgơi đal git Hwềng Goh Yàng Tom Trồ dê: Hwềng lơi yal tơlik Yàng Jesu Krist ai poac mhàm mơ lik lìng hwềng hơ̆ la bơh Yàng Tom Trồ;

³ ai hwềng lơi ò yal tơlik behơ̆ bơh Yàng Jesu gen hwềng hơ̆ ò di la bơh Yàng Tom Trồ. Hơ̆ la hwềng cau sòdră di Bơtau Krist; ală oh mi neh kơno gơ rơp tus, mơ tòm tŭ do gơ neh ơm tòm dunnia rau.

⁴ Ơ ală kòn añ jê, ală bol mê la bal mơ Yàng Tom Trồ mơ neh geh pha lin mơ bol khai rau, tài bơh Bơtau ơm tòm bol mê la dờng rlau mơ bơtau ơm tòm cau dunnia.

⁵ Bol khai la bal mơ dunnia, gen tàng đơs jat be dunnia, mơ cau dunnia iat bol khai.

⁶ Bol he la bal mơ Yàng Tom Trồ. Cau lơi dòp git Yàng Tom Trồ gen iat bol he, ai cau lơi ò bal mơ Yàng Tom Trồ gen ò iat bol he. Bơh bơta do bol he git hwềng jơnau song mơ hwềng jơnau tìs.

Yàng Tom Trồ kòñ gơboh

⁷ Ơ ală cau kòñ gơboh, bol he kòñ gơboh tĕ bal mơ gơp; bơh bơta kòñ gơboh tus bơh di Yàng Tom Trồ, cau lơi kòñ gơboh gen tơnggơs bơh Yàng Tom Trồ mơ dòp git Yàng Tom Trồ.

⁸ Cau lơi ò kòñ gơboh gen ò dòp git Yàng Tom Trồ; bơh Yàng Tom Trồ la bơta kòñ gơboh.

⁹ Bơta kòñ gơboh Yàng Tom Trồ dê neh geh ràng tơlik bol he in tòm bơta do: Yàng Tom Trồ neh sồr Kòn Dùl Kơnràñ dê lòt tus tòm dunnia, nàng bol he in kơnòm di Kơnràñ mơ geh kis.

¹⁰ Bơta kòñ gơboh hơ̆ la be do: Ò di la bol he neh kòñ gơboh di Yàng Tom Trồ, mơya Kơnràñ neh kòñ gơboh di bol he, mơ sồr Kòn Kơnràñ dê lòt tus nàng lơh gơs phan ơn tơwài glài tài bơh tồi glài bol he dê.

¹¹ Ơ ală cau kòñ gơboh, dilah Yàng Tom Trồ neh kòñ gơboh di bol he oă behơ̆, gen bol he kung pal kòñ gơboh bal mơ gơp.

¹² Ò gơs tŭ lơi gơs cau gŏ Yàng Tom Trồ; dilah bol he kòñ gơboh bal mơ gơp, gen Yàng Tom Trồ ơm sùm tòm bol he, mơ bơta kòñ gơboh Kơnràñ dê geh wil tơl tòm bol he.

¹³ Bơh bơta do bol he git he ơm sùm tòm Kơnràñ mơ Kơnràñ ơm sùm tòm bol he, hơ̆ la Kơnràñ neh ai Yàng Hwềng Kơnràñ dê bol he in.

¹⁴ Bol he neh gŏ mơ lơh cơng lah Yàng Bèp neh sồr Yàng Kòn lòt tus nàng lơh gơs Yàng Dong Klàs dunnia dê.

¹⁵ Dilah cau lơi yal tơlik Yàng Jesu la Kòn Yàng Tom Trồ dê, gen Yàng Tom Trồ ơm sùm tòm khai, mơ khai ơm sùm tòm Yàng Tom Trồ.

¹⁶ Bol he git mơ dòn Yàng Tom Trồ gơs bơta kòñ gơboh gơwèt mơ bol he. Yàng Tom Trồ la bơta kòñ gơboh, cau lơi ơm sùm tòm bơta kòñ gơboh la ơm sùm tòm Yàng Tom Trồ, mơ Yàng Tom Trồ ơm sùm tòm cau hơ̆.

¹⁷ Bơh hơ̆ bơta kòñ gơboh geh wil tơl tòm bol he, tồ bol he in gơs nùs khin cha tòm ngai cahrña, tài bơh Kơnràñ la be lơi gen bol he kung behơ̆ sơl tòm dunnia do.

¹⁸ Ò gơs bơta rngòt tòm bơta kòñ gơboh, mơya bơta kòñ gơboh wil tơl gen gơtă sang bơta rngòt. Tòm bơta rngòt gơs bơta kơlôi bơh bơta lơh glài, mơ cau lơi rngòt gen ò geh wil tơl tòm bơta kòñ gơboh.

¹⁹ Bol he kòñ gơboh tài bơh Kơnràñ neh kòñ gơboh di bol he lài.

²⁰ Dilah cau lơi đơs lah: “Añ kòñ gơboh di Yàng Tom Trồ,” mơya gơjrañ kơuềng di oh mi he, gen khai la cau đơs blac; bơh cau lơi ò kòñ gơboh di oh mi he la cau he neh gŏ, gen ò rgơi kòñ gơboh di Yàng Tom Trồ la Bơtau he ò gŏ.

²¹ Bol he neh dòp bơh Kơnràñ bơta sồr lam do: Cau lơi kòñ gơboh di Yàng Tom Trồ gen kung pal kòñ gơboh di oh mi he sơl.