I Jang 3 - Sră Goh 2018

Kòn sau Yàng Tom Trồ dê

¹ Sền tĕ Yàng Bèp neh ai bol he in bơta kòñ gơboh ò git nđò, nàng bol he geh sơnđan la kòn Yàng Tom Trồ dê; mơ bol he ngan la behơ̆. Dunnia ò git đal bol he, tài bơh bol khai ò git Kơnràñ.

² Ơ ală cau kòñ gơboh, tòm tŭ do bol he la kòn Yàng Tom Trồ dê, ai bol he rơp gơlik gơs mbe lơi, gen bơta hơ̆ òhềt geh yal tơlik. Bol he git lah tòm tŭ Bơtau Krist tơlik să gen bol he rơp gơlik gơs tòm toh be Kơnràñ, bơh rơp gŏ Kơnràñ be Kơnràñ la Bơtau neh gơs mơ gam gơs sùm sùm.

³ Cau lơi gơs bơta gơn kơnòm hơ̆ tòm Kơnràñ, gen kơrmap gàr să he sàng goh, kung be Kơnràñ la sàng goh.

⁴ Cau lơi tìs glài, hơ̆ la tòmdră mơ bơta boh lam; mơ tồi glài la bơta tòmdră mơ bơta boh lam.

⁵ Mơya oh mi git lah Kơnràñ neh tơlik să nàng tă sang tồi glài; tòm Kơnràñ ò gơs tồi glài lơi.

⁶ Cau lơi ơm sùm tòm Kơnràñ gen ò tìs glài, ai cau lơi tìs glài gen ò tŭ lơi gŏ Kơnràñ mơ kung òhềt dòp git Kơnràñ sơl.

⁷ Ơ ală kòn sau añ jê, bañ lòi cau lơi pơrlồm bol mê: Cau lơi lơh bơta song ring la song ring be Yàng la song ring.

⁸ Cau lơi tìs glài la bal mơ cà ràk, bơh cà ràk tìs glài bơh sơnròp. Mơ tai, Kòn Yàng Tom Trồ neh tơlik mat nàng tơnroh ală broă cà ràk dê.

⁹ Cau lơi tơnggơs bơh Yàng Tom Trồ gen ò tìs glài, tài bơh gar sơntìl Yàng Tom Trồ dê ơm sùm tòm khai; mơ khai ò rgơi tìs glài, tài bơh neh tơnggơs bơh Yàng Tom Trồ.

¹⁰ Kơnòm dê bơta do rgơi cah is loh làng kòn Yàng Tom Trồ mơ kòn cà ràk dê. Cau lơi ò lơh bơta song ring gen ò bal mơ Yàng Tom Trồ, cau ò kòñ gơboh di oh mi he ò di la kòn Yàng Tom Trồ.

Kòñ gơboh bal mơ gơp

¹¹ Do la jơnau bơto yal mơ oh mi neh kơno bơh sơnròp: Hơ̆ la bol he pal kòñ gơboh bal mơ gơp.

¹² Bañ lơh be Kain, la cau bal mơ cà ràk mơ neh tơnchơt oh khai dê. Ñchi bơh tài khai tơnchơt oh khai taih? Tài bơh ală broă să tòm khai dê la iơh rmơh, ai ală broă oh khai dê la song ring.

¹³ Ơ oh mi, dilah dunnia gơjrañ kơuềng di oh mi, gen bañ ai lơh krơi.

¹⁴ Bol he git lah he neh tiă rlau di bơta chơt mơ lòt tus hơ bơta kis, tài bơh bol he kòñ gơboh di oh mi he. Ai cau lơi ò kòñ gơboh gen kư̆ ơm tòm bơta chơt.

¹⁵ Cau lơi gơjrañ kơuềng di oh mi he gen cau hơ̆ la cau tơnchơt cau; oh mi git lah ò gơs dô nă cau lơi tơnchơt cau geh bơta kis gam sùm sùm ơm tòm khai.

¹⁶ Bơh bơta do bol he đal git bơta kòñ gơboh hơ̆ la Bơtau Krist neh phi bơta kis Kơnràñ dê bơh bol he; bol he kung pal phi bơta kis bơh oh mi he behơ̆ sơl.

¹⁷ Dilah cau lơi gơs phan mơna dunnia dê, mơ gŏ oh mi he rƀah lơòi, mơ ò gơs nùs ơnàng, gen nùs kòñ gơboh Yàng Tom Trồ dê mbe rgơi ơm tòm cau hơ̆ taih?

¹⁸ Ơ ală kòn añ jê, bañ kòñ gơboh mìng bơh jơnau đơs mơ bơh lơmpiat lơm, mơya bơh broă lơh mơ jơnau song.

¹⁹ Bơh bơta do bol he git lah bol he la bal mơ jơnau song, mơ nùs bol he geh ring lơngai di đap Kơnràñ,

²⁰ dilah nùs bol he lơh nền glài he, gen Yàng Tom Trồ la dờng rlau mơ nùs he dê, mơ Kơnràñ git jơh ală bơta.

²¹ Ơ ală cau kòñ gơboh, dilah nùs bol he ò lơh nền glài he, gen bol he gơs kơ̆ nùs di đap Yàng Tom Trồ,

²² mơ bol he dan bơta lơi gen dòp geh bơta hơ̆ bơh di Kơnràñ, tài bơh bol he prap gàr ală bơta sồr lam Kơnràñ dê mơ lơh ală bơta niam nùs Kơnràñ.

²³ Mơ do la bơta sồr lam Kơnràñ dê: Bol he pal dòn di sơnđan Kòn Kơnràñ dê, la Yàng Jesu Krist, mơ kòñ gơboh bal mơ gơp, be Kơnràñ neh sồr bol he.

²⁴ Jơh ală cau lơi prap gàr ală bơta sồr lam Yàng Tom Trồ dê gen ơm sùm tòm Yàng Tom Trồ, mơ Yàng Tom Trồ ơm sùm tòm ală cau hơ̆. Bơh bơta do bol he git Yàng Tom Trồ ơm sùm tòm bol he, hơ̆ la kơnòm di Yàng Hwềng mơ Yàng Tom Trồ neh ai bol he in.