I Jang 2 - Sră Goh 2018

Yàng Jesu Krist Bơtau tơwài glài bol he

¹ Ơ ală kòn añ jê, añ cih ală kòn in ală bơta do tồ ală kòn ò tìs glài. Mơya dilah gơs cau lơi tìs glài, gen bol he gơs dô Bơtau hòi dan ala ơm mơ Yàng Bèp, la Yàng Jesu Krist, hơ̆ la Bơtau song ring.

² Să tòm Kơnràñ la phan ơn tơwài glài bol he dê, ò di mìng bơh tồi glài bol he dê lơm ò, mơya kung bơh tồi glài jơh dunnia tai sơl.

³ Dilah bol he prap gàr ală bơta sồr lam Kơnràñ dê, gen bơh hơ̆ bol he git nền lah bol he dòp git Kơnràñ.

⁴ Cau lơi đơs: “Añ dòp git Kơnràñ,” mơya ò lơh jat bơta sồr lam Kơnràñ dê, gen khai la cau đơs blac, jơnau song ò ơm tòm khai.

⁵ Mơya cau lơi prap gàr jơnau Yàng Jesu dê, gen ngan nùs kòñ gơboh Yàng Tom Trồ dê la wil tơl tòm cau hơ̆. Bơh bơta do bol he git nền lah he ơm tòm Kơnràñ:

⁶ Cau lơi đơs lah he ơm sùm tòm Yàng Jesu, gen cau hơ̆ kung pal lơh lòt be Kơnràñ neh lơh lòt sơl.

Bơta sồr lam pa

⁷ Ơ ală cau kòñ gơboh, hơ̆ ò di la bơta sồr lam pa mơ añ cih oh mi in, mơya bơta sồr lam yau oh mi neh gơs bơh sơnròp; bơta sồr lam yau la jơnau mơ oh mi neh kơno.

⁸ Bulah behơ̆ añ kung cih oh mi in dô bơta sồr lam pa, la bơta song ngan tòm Yàng Jesu Krist mơ tòm oh mi sơl, tài bơh bơta klam jơngo neh roh rau, mơ bơta àng ngan neh sòl pơnđàng.

⁹ Cau lơi đơs lah he ơm tòm bơta àng, mơ gơjrañ kơuềng di oh mi he, gen gam ơm tòm bơta klam jơngo.

¹⁰ Cau lơi kòñ gơboh di oh mi he, gen ơm sùm tòm bơta àng, tòm cau hơ̆ ò gơs bơta lơi lơh cau in gơtup tìs.

¹¹ Mơya cau lơi gơjrañ kơuềng di oh mi he, gen ơm tòm bơta klam jơngo, lơh lòt tòm bơta klam jơngo, mơ ò git ntềng đah he lòt tài bơh bơta klam jơngo neh lơh jơngo mat khai dê.

Bơto tơngkah pe sèng cau

¹² Ơ ală kòn añ jê, añ cih ală kòn in tài bơh tồi glài ală kòn dê neh geh toh kơnòm di sơnđan Yàng Jesu Krist.

¹³ Ơ ală cau la bèp, añ cih ală ồng in tài bơh ală ồng dòp git Bơtau neh gơs bơh sơnròp. Ơ ală cau pơnu, añ cih ală bol mê in tài bơh bol mê neh geh pha lin rlau mơ cau iơh. Ơ ală kòn dềt, añ neh cih ală kòn in tài bơh ală kòn dòp git Yàng Bèp.

¹⁴ Ơ ală cau la bèp, añ neh cih ală ồng in tài bơh ală ồng dòp git Bơtau neh gơs bơh sơnròp. Ơ ală cau pơnu, añ neh cih ală bol mê in tài bơh bol mê la pràn kơldang, jơnau Yàng Tom Trồ dê ơm sùm tòm bol mê, mơ bol mê neh geh pha lin rlau mơ cau iơh.

¹⁵ Bañ kòñ gơboh dunnia, kung bañ kòñ gơboh ală phan tòm dunnia sơl; dilah cau lơi kòñ gơboh dunnia, gen bơta kòñ gơboh di Yàng Bèp ò ơm tòm cau hơ̆.

¹⁶ Bơh jơh ală bơta tòm dunnia, be bơta hàm kòñ is poac să dê, bơta hàm kòñ is mat dê, mơ bơta pơnhừ să rài kis dê, ò di bơh Yàng Bèp mơ tus, mơya bơh dunnia mơ gơlik gơs.

¹⁷ Dunnia bal mơ bơta hàm kòñ is gơ dê gơ rơp roh, mơya cau lơi lơh jat nùs kòñ Yàng Tom Trồ dê gen gam gơs sùm sùm.

Cau sòdră di Bơtau Krist

¹⁸ Ơ ală kòn, do la tŭ lồi dut rau, ală bol mê neh kơno đơs lah cau sòdră di Bơtau Krist pal tus, mơ tòm tŭ do gơs oă cau sòdră di Bơtau Krist neh tus rau; bơh hơ̆ bol he git lah do la tŭ lồi dut.

¹⁹ Bol khai neh bơh digùl bol he mơ lik, mơya ò di bal mơ bol he; bơh dilah bol khai bal mơ bol he, gen neh kư̆ ơm bal mơ bol he; mơya bol khai neh lik lòt tồ yal tơlik lah jơh ală bol khai ò di bal mơ bol he.

²⁰ Mơya ală bol mê neh geh bong mơñà bơh Bơtau Sàng Goh, gen jơh ală bol mê neh git rau.

²¹ Añ neh cih ală bol mê in, ò di tài bơh bol mê ò git jơnau song, mơya tài bơh bol mê git jơnau song, mơ git lah ò gơs bơta blac chừt lơi gơlik bơh jơnau song.

²² Ñcau la cau đơs blac taih? Hơ̆ la cau ò dòp Yàng Jesu la Bơtau Krist. Cau ò dòp Yàng Bèp mơ Yàng Kòn, hơ̆ la cau sòdră di Bơtau Krist.

²³ Cau lơi ò dòp Yàng Kòn, gen kung ò gơs Yàng Bèp; cau lơi dòp Yàng Kòn gen kung gơs Yàng Bèp sơl.

²⁴ Bơta bol mê neh kơno bơh sơnròp gen pal prap sùm tòm nùs bol mê. Dilah bơta bol mê neh kơno bơh sơnròp ơm sùm tòm bol mê, gen bol mê kung rơp ơm sùm tòm Yàng Kòn mơ tòm Yàng Bèp sơl.

²⁵ Do la jơnau mơ Kơnràñ neh ho pơgon mơ bol he, hơ̆ la bơta kis gam sùm sùm.

²⁶ Añ cih bol mê in bơta do la sơnio bơh ală cau kòñ pơrlồm bol mê.

²⁷ Bơta bong mơñà mơ bol mê neh geh bơh Bơtau Krist gơ ơm sùm tòm bol mê, gen ò càng cau lơi bơto sồr bol mê; bơh bơta bong mơñà Kơnràñ dê bơto sồr bol mê tơl ală bơta, mơ bơta hơ̆ la ngan ò di la blac; jat be bơta oh mi neh geh bơto sồr gen ơm tĕ sùm tòm Kơnràñ.

²⁸ Behơ̆ tòm tŭ do, ơ ală kòn añ jê, ơm tĕ sùm tòm Kơnràñ, nàng tòm tŭ Kơnràñ tơlik mat, gen bol he gơs nùs khin cha, ò gơs ƀàssìl di đap Kơnràñ tòm tŭ Kơnràñ tus wơl.

²⁹ Dilah bol mê git Yàng Jesu Krist la song ring, gen bol mê git nền lah kòp nă cau lơi lơh jat bơta song ring, hơ̆ la kòn Yàng Tom Trồ.