II Samuel 3 - Sră Goh 2018

Apner rê wơl mơ Dabit

¹ Neh gơs bơta tòmlơh jŏ jòng digùl hìu Dabit mơ hìu Sol. Dabit sơlo ơm sơlo pràn, tòm tŭ hìu Sol sơlo ngai sơlo lơbơn òsô.

² Ală kòn klau Dabit neh tơnggơs tòm Hebrôn: Kòn tơnhoa la Amnôn, kòn klau Ahinôam bơh Jejreel;

³ kòn dơ̆ bàr la Kileap, kòn klau Abigail la ùr bơnrau Nabal dê bơh Karmel; kòn dơ̆ pe la Apsalôm, kòn klau Maakah la kòn ùr Talmai, bơtau Gesur dê;

⁴ kòn dơ̆ poan la Adônija, kòn klau Hagit; kòn dơ̆ pram la Sephtiah, kòn klau Abital;

⁵ mơ kòn dơ̆ prau la Ithream, kòn klau Ekla la bau ùr Dabit dê. Ală kòn klau do neh tơnggơs Dabit in tòm Hebrôn.

Apner rê mơ Dabit

⁶ Tòm tŭ neh gơs bơta tòmlơh digùl hìu Sol mơ hìu Dabit, gen Apner neh lơh să tòm khai dê pràn kơldang tòm hìu Sol.

⁷ Tŭ hơ̆, Sol neh gơs dô nă bau cồng sơnđan la Risba, kòn ùr Aijah dê. Mơ Isbôset đơs mơ Apner lah: “Ñchi bơh tài mê bic mơ bau cồng bèp añ jê taih?”

⁸ Apner gơhào nùs ngan bơh ală jơnau Isbôset neh đơs, mơ ho lah: “Añ la bồ so jat đah Juda ơ? Ngai do añ dòn song mơ hìu Sol, bèp mê dê, mơ hìu nhă mơ ală oh mi bơyô khai dê. Mơ añ neh ò jào mê tòm tê Dabit. Mơya tŭ do mê yă añ bơh dô bơta tìs mơ cau ùr do!

⁹ Behơ̆ dan Yàng Tom Trồ lơh di añ dô bă kơnjơ̆, dilah ò gơlik gơs ală bơta Yàng Jehôwa neh srat să ho bal mơ Dabit, mơ añ rơp bơtào kơ̆ khai in,

¹⁰ mơ cèng lơgar bơh hìu Sol, mơ bơtào sơbàn Dabit hơđang Israel mơ Juda, bơh Dan jơl tus Beerseba.”

¹¹ Isbôset ò khin đơs dô jơnau lơi mơ Apner tài bơh rngòt di khai.

¹² Apner sồr cau kong sồr lòt tus hơ Dabit tòm Hebrôn mơ đơs lah: “Lơgar rơp gơrê mơ ñcau taih? Lơh tĕ dô bơta ho bal ồng dê mơ añ, gen añ rơp dong cèng jơh Israel tus hơ ồng.”

¹³ Dabit ho lah: “Niam, añ rơp lơh dô bơta ho bal mơ mê. Mơya añ gơs dô bơta dan mơ mê: Mê rơp ò tơlik mat di đap añ, dilah mê ò cèng Mikal, kòn ùr Sol dê, tòm tŭ mê tus tìp añ.”

¹⁴ Gen Dabit sồr ală cau kong sồr lòt tus hơ Isbôset kòn klau Sol dê mơ đơs lah: “Ai tĕ añ in bau ùr añ la Mikal, la cau neh ho bau mơ añ mơ khà jền kơt bau la dô rhiang pet gơltau să cau klau Philistin”

¹⁵ Isbôset sồr cau kup Mikal bơh di bau klau khai la Paltiel, kòn klau Lais dê.

¹⁶ Behơ̆, bau klau khai lòt jun khai mơ ñìm bơh ngkòi tòm gùng tus di Bahurim. Gen Apner đơs mơ khai lah: “Rê wơl tĕ hơ hìu mê dê!” Behơ̆, Paltiel rê wơl.

¹⁷ Apner pơyoa jơnau tus hơ ală cau kwang kra Israel mơ đơs lah: “Neh jŏ rau, ală ồng kơp kòñ Dabit lơh gơs bơtau hơđang ală ồng.

¹⁸ Behơ̆ tŭ do lơh tĕ! Bơh Yàng Jehôwa neh ho mơ Dabit lah: ‘Bơh Dabit cau duh broă Añ jê mơ Añ rơp dong tă làng bol Israel Añ jê bơh tê cau Philistin mơ bơh jơh ală cau sò tơm bol khai dê.’”

¹⁹ Să tòm Apner kung đơs di đap cau Benjamin; gen Apner lòt yal mơ Dabit tòm Hebrôn, jơh ală bơta Israel bal mơ jơh hìu Benjamin neh rcang sir nàng lơh.

²⁰ Tòm tŭ Apner bal bàr jơt nă cau lòt tus hơ Dabit tòm Hebrôn, Dabit yò sào dờng Apner in bal mơ ală cau lòt bal mơ khai.

²¹ Apner đơs mơ Dabit lah: “Dan lòi añ in lòt mơ pơjum jơh Israel cau tòm añ in la bơtau nàng bol khai lơh dô bơta ho bal mơ bơtau, mơ bơtau rơp at bồ hơđang jơh be nùs bơtau kơp kòñ.” Behơ̆, Dabit ai Apner in lòt, mơ khai neh lòt lơngap lơngai.

Jôap tơnchơt Apner

²² Tòm tŭ ală cau duh broă Dabit dê bal mơ Jôap pa rê bơh dô bơta brồ lơh nisơna, mơ cèng brê oă phan phà kup geh. Apner ò gam ơm mơ Dabit tòm Hebrôn, bơh Dabit neh ai khai in lòt, mơ khai neh lòt lơngap lơngai.

²³ Tòm tŭ Jôap mơ jơh ală cau ling bal mơ khai tus, cau yal khai in git lah, “Apner kòn klau Ner neh tus hơ cau bơtau, mơ cau bơtau neh lòi khai lòt, mơ khai neh lòt lơngap lơngai.”

²⁴ Behơ̆ Jôap lòt tus hơ cau bơtau mơ lùp lah: “Ñchi bơta bơtau neh lơh taih? Sền ne, Apner neh tus hơ bơtau, ñchi bơh tài bơtau neh lòi khai in lòt taih? Tian gơs khai neh lòt rau!

²⁵ Bơtau git Apner kòn klau Ner, khai tus nàng pơrlồm bơtau, sền sơwì ală broă lơh bơtau dê, mơ git jơh ală bơta bơtau lơh.”

²⁶ Tòm tŭ Jôap lik bơh di đap Dabit, khai sồr ală cau kong sồr ting jat Apner, mơ bol khai cèng Apner rê wơl bơh di tơnau ơn dà tòm Sira; mơya Dabit ò git bơh bơta hơ̆.

²⁷ Tòm tŭ Apner neh rê wơl hơ Hebrôn, Jôap cèng khai is dô đah tòm mpồng ƀòn dờng dê, khai lơh be kòñ đơs is mơ khai. Mơ tềng hơ̆ Jôap srơp khai di kơndul mơ tơnchơt tơn, nàng sal tê bơh mhàm Asael, oh Jôap dê.

²⁸ Tơnơ̆ mơ hơ̆, tòm tŭ Dabit kơno bơh bơta hơ̆ gen đơs lah: “Añ mơ lơgar añ sùm sùm ò gơs glài di đap Yàng Jehôwa bơh mhàm Apner, kòn klau Ner dê.

²⁹ Dan mhàm hơ̆ tuh wơl hơđang bồ Jôap mơ hơđang jơh hìu bèp khai dê! Dan hìu Jôap dê ò tŭ lơi siơ̆u cau jê toh mồr gơrề hala cau kòp dun, cau đơng gai tàñ, cau gơpừ chơt bơh đào, cau ò gơs phan sa!”

³⁰ Jôap mơ Abisai oh khai dê neh tơnchơt Apner tài bơh Apner neh tơnchơt Asael oh bol khai dê tòm bơta tòmlơh tòm Gabaôn.

³¹ Gen Dabit đơs mơ Jôap bal mơ jơh ală cau gơs mat tềng hơ̆ lah: “Crè tĕ ồi ào bol mê dê mơ soh ƀào sơnò kiat, mơ ñìm rac di đap Apner.” Mơ bơtau Dabit lòt jat bơh tơnơ̆ bòng ƀồc.

³² Bol khai tơp Apner tòm Hebrôn mơ bơtau ñìm dờng jơnau di tiah bơtô ƀồc Apner; mơ jơh làng bol kung ñìm bal.

³³ Cau bơtau ñìm ƀồc Apner mơ đơs lah: “Apner pal chơt kung be cau bơrngơl chơt sơl ơ?

³⁴ Tê mê ò kòl kơt, jơng mê ò dò che sreng; Mê gơpừ chơt be dô nă cau gơpừ chơt di đap cau iơh bơsak.” Mơ jơh làng bol ñìm tai.

³⁵ Gen jơh làng bol tus rềp mơ dan Dabit sa dô êt phan sa tòm tŭ trồ gam ngai; mơya Dabit srat să lah: “Dan Yàng Jehôwa lơh añ dô bă kơnjơ̆ rlau jơh, dilah añ sa piang lă hala phan sa lơi ndai lài mơ tŭ mattơngai mut!”

³⁶ Jơh làng bol kah prap bơh jơnau hơ̆ mơ ai lơh niam nùs; ngan behơ̆, jơh ală bơta cau bơtau lơh la niam nùs bol khai lơm.

³⁷ Behơ̆, jơh làng bol mơ jơh Israel git wă lah bơtau ò gơs pơnah lơi tòm bơta tơnchơt Apner kòn klau Ner dê.

³⁸ Gen bơtau đơs mơ ală cau duh broă lah: “Bol mê ò git la dô nă cau kwang dờng, mơ dô nă cau dờng màng tòm Israel neh chơt tòm ngai do sơl?

³⁹ Mơ tòm ngai do añ ò tơl pràn, bulah añ neh geh bong mơñà nàng lơh gơs bơtau, mơ ală cau do la kòn klau Jeruyah bol khai jàñ bơsak ir añ in. Dan Yàng Jehôwa tơm wơl cau lơh bơta iơh in jat ală broă iơh khai dê!”