II Samuel 2 - Sră Goh 2018

Dabit geh bong mơñà gơs bơtau at bồ Juda

¹ Tơnơ̆ mơ hơ̆, Dabit hòi lùp Yàng Jehôwa lah: “Añ pal guh mut tòm dô nơm ƀòn dờng lơi tòm Juda sơl?” Yàng Jehôwa đơs lah: “Guh tĕ!” Dabit lùp tai: “Añ pal guh tus hơ tiah lơi taih?” Yàng Jehôwa ho lah: “Hơ Hebrôn.”

² Behơ̆ Dabit lòt tus tềng hơ̆ bal mơ bàr nă bau ùr khai dê la Ahinôam bơh Jejreel, mơ Abigail, ùr bơnrau Nabal dê bơh Karmel.

³ Dabit kung cèng bal mơ khai ală cau neh ơm mơ khai, kòp nă bal mơ hìu nhă he dê, mơ bol khai tus ơm tòm ală ƀòn dờng tòm Hebrôn.

⁴ Gen ală cau Juda lòt tus tòm Hebrôn, mơ tềng hơ̆ bol khai bong mơñà Dabit in lơh gơs bơtau at bồ hìu cau Juda. Tòm tŭ Dabit kơno yal lah ală cau tòm Jabes Galaat neh tơp ƀồc Sol,

⁵ gen khai sồr ală cau kong sồr lòt tus hơ ală cau tòm Jabes Galaat, mơ đơs mơ bol khai lah: “Dan Yàng Jehôwa ai lơngai lơngò bol mê in, bơh bol mê neh yal tơlik nùs dòn song gơwèt mơ Sol la cau tòm bol mê dê bơh bơta tơp ƀồc khai dê!

⁶ Tŭ do dan Yàng Jehôwa yal tơlik bol mê in bơta kòñ gơboh kơ̆ dơn mơ bơta dòn song Kơnràñ dê, mơ añ kung rơp ràng tơlik ală bơta niam gơwèt hơ bol mê tài bơh bol mê neh lơh bơta hơ̆.

⁷ Gen tàng lơh tĕ pràn kơldang tê bol mê dê mơ khin cha, bơh Sol cau tòm bol mê dê neh chơt, mơ hìu cau Juda neh bong mơñà añ in lơh gơs bơtau at bồ bol khai.”

Bơta tòmlơh digùl hìu Dabit mơ hìu Sol

⁸ Mơya Apner kòn klau Ner, cau kwang at bồ mpồl ling Sol dê, kup Isbôset kòn klau Sol dê mơ cèng khai tus hơ Mahanaim.

⁹ Apner bơtào khai lơh gơs bơtau at bồ Galaat, Asuri, mơ Jejreel, bal mơ Epraim, Benjamin mơ jơh Israel.

¹⁰ Tòm tŭ Isbôset kòn klau Sol dê gơs bơtau at bồ Israel gen khai neh poan jơt nam, mơ khai at bồ bàr nam. Bulah behơ̆ mìng gơs hìu cau Juda jat Dabit.

¹¹ Pah tŭ tơngai Dabit at bồ tòm Hebrôn hơđang hìu cau Juda la poh nam mơ prau kơnhai.

¹² Apner kòn klau Ner bal mơ ală cau duh broă Isbôset kòn klau Sol dê, lik lòt bơh Mahanaim mơ tus hơ Gabaôn.

¹³ Jôap kòn klau Jeruyah mơ ală cau Dabit dê lik lòt tòmtìp mơ bol khai di tơnau dà tòm Gabaôn. Dô mpồl nggui đah do tơnau mơ dô mpồl nggui di đah ne tơnau.

¹⁴ Gen Apner đơs mơ Jôap lah: “Lòi tĕ dô êt nă cau pơnu ñă ntào tòmlơh bal di đap bol he.” Jôap đơs lah: “Di sơl, lòi tĕ bol khai tòmlơh behơ̆.”

¹⁵ Behơ̆, bol khai ñă ntào mơ geh kòp khà, jơt bàr nă cau bơh Benjamin mơ Isbôset kòn klau Sol, mơ jơt bàr nă bơh Dabit.

¹⁶ Gen kòp nă at di bồ cau sò tơm he mơ srơp đào di wĕ cau sò tơm, mơ jơh ală bol khai gơpừ chơt bal mơ gơp. Behơ̆ tiah hơ̆ tòm Gabaôn geh sơnđan la Helkat Hajurim.

¹⁷ Tòm ngai hơ̆ gơs dô bơta tòmlơh dờng ngan, Apner mơ ală cau Israel kong lơh alah di đap ală cau Dabit dê.

¹⁸ Tềng hơ̆ gơs pe nă kòn klau Jeruyah dê la Jôap, Abisai mơ Asael. Mơ tai, Asael ntoat mhar ngan kung be dô nơm be brê.

¹⁹ Khai ting jat Apner, ò pơrlac ma kiau tòm tŭ ting jat.

²⁰ Apner wơlke sền di ngkòi mơ lùp lah: “Ngan sơl mê la Asael?” Khai ho lah: “Ngan, hơ̆ la añ.”

²¹ Gen Apner đơs mơ khai lah: “Wèt tĕ đah ma hala đah kiau, kup dô nă tòm ală cau pơnu mơ tă ai phan tòmlơh khai dê.” Mơya Asael ò bài lòi ting jat Apner.

²² Apner đơs pơhìn tai mơ Asael lah: “Ơm tĕ, bañ ting jat añ tai! Ñchi bơh tài añ pal tơnchơt mê taih? Dilah tơnchơt mê, mbe rgơi añ sền mat Jôap la bi mê dê taih?”

²³ Mơya Asael ò bài ơm wơl, mơ kư̆ ting jat Apner, gen Apner ai ngkơr đào khai dê srơp di kơndul Asael bluh tus di ngkòi. Asael gơpừ di tiah mơ chơt mo tềng hơ̆. Kòp nă cau ơm dơh wơl tòm tŭ tus di tiah Asael gơpừ chơt.

²⁴ Mơya Jôap mơ Abisai ting jat Apner, mơ tòm tŭ mattơngai mòr ñơp gen bol khai tus di dòr Amman rềp Gai, jat gùng lòt hơ ƀlàng ngềt ngơt Gabaôn.

²⁵ Cau Benjamin pơjum bal mơ Apner lơh gơs dô mpồl, mơ ntào kơ̆ hơđang bồ dô nơm dòr.

²⁶ Gen Apner hòi dờng mơ Jôap lah: “Mê lòi đào tơnroh ò lồi ơ? Mê ò đal git lah bơta do rơp lồi tòm bơta sràt bơtang ò ơ? Jơl tus di tŭ lơi sồng mê ai gơnoar sồr cau mê dê ơm, mơ ò ting jat oh mi he dê taih?”

²⁷ Jôap ho lah: “Di ngan kung be Yàng Tom Trồ kis, dilah mê ò đơs jơnau lơi gen ală cau kư̆ ting jat oh mi he tus diàng hìng.”

²⁸ Behơ̆ Jôap uh kơlwòk, mơ jơh ală cau ơm dơh wơl; bol khai ò ting jat cau Israel mơ kung ò tòmlơh tai.

²⁹ Apner mơ ală cau jat khai lòt mang àng gan Arabah. Bol khai tiă hiòng Jordan, pơnjat lòt gan Bisrôn mơ tus hơ Mahanaim.

³⁰ Gen Jôap rê wơl ò ting jat Apner tai, mơ khai pơjum wơl jơh ală cau bal mơ khai. Bol khai gŏ siơ̆u mat Asael bal mơ jơt sin nă cau Dabit dê.

³¹ Mơya ală cau Dabit dê neh tơnchơt pe rhiang prau jơt nă cau Benjamin gơrê bal mơ Apner.

³² Bol khai cèng ƀồc Asael mơ tơp tòm bơtô ƀồc bèp khai dê tòm Betlehem. Mơ Jôap mơ ală cau khai dê lòt mang àng tus tòm Hebrôn tòm tŭ rìng àng.