II Samuel 18 - Sră Goh 2018

Bơta chơt Apsalôm dê

¹ Gen Dabit pơjum wơl ală cau neh jat khai mơ bơtào hơđang bol khai ală kwang at bồ dô rbô ling mơ ală kwang at bồ dô rhiang nă.

² Khai cah mpồl ling tòm pe mpồl: dô pơnah pe hơđơm gơnoar Jôap dê, dô pơnah pe hơđơm gơnoar Abisai oh Jôap dê, kòn klau Jeruyah dê, mơ dô pơnah pe hơđơm gơnoar Ittai cau Gat. Cau bơtau đơs mơ bol khai lah: “Să tòm añ kung rơp lik lòt bal mơ bol mê sơl.”

³ Mơya bol khai đơs lah: “Bơtau ò pal lik lòt; bơh dilah bol hi ntoat dô, bol khai rơp ò kơlôi dờng màng di bol hi; dilah nggùl tòm mpồl bol hi kong tơnchơt, bol khai kung ò sền dờng màng di bol hi. Mơya bơtau la kas màng kung be jơt rbô nă tòm bol hi. Gen tàng niam rlau bơtau ơm tòm ƀòn dờng, rcang nàng dong kòl bol hi.”

⁴ Bơtau ho lah: “Añ rơp lơh bơta lơi bol mê sền la niam rlau jơh.” Behơ̆, bơtau ñă ntào di gah mpồng ƀòn dờng tòm tŭ mpồl ling lik lòt jat ală mpồl dô rhiang mơ ală mpồl dô rbô nă.

⁵ Bơtau ai jơnau sồr Jôap, Abisai, mơ Ittai in lah: “Tài bơh añ, dan bol mê gơwèt niam mơ cau pơnu Apsalôm.” Mơ jơh mpồl ling neh kơno lơm tòm tŭ bơtau ai jơnau sồr jơh ală cau kwang at bồ mpồl ling in gơwèt mơ Apsalôm.

⁶ Behơ̆ mpồl ling lik lòt tòm ƀlàng tòmlơh mơ Israel, mơ bơta tòmlơh neh gơlik gơs tòm brê Epraim dê.

⁷ Mpồl ling Israel kong alah di đap ală cau duh broă Dabit dê, tòm ngai hơ̆ gơs oă ngan cau kong tơnchơt, bàr jơt rbô nă.

⁸ Bơta tòmlơh lòt làm jơh hơđang ală ƀòn gùt dar, oă cau chơt tòm brê rlau mơ chơt bơh đào.

⁹ Nisơna Apsalôm tìp mơ ală cau duh broă Dabit dê, Apsalôm hào alàng khai dê, mơ tòm tŭ alàng ntoat hơđơm ală ntê tòm chi cha, bồ Apsalôm dê gơkwă di ntê chi, mơ khai gơyồng hơđang pah wah trồ mơ ù; tòm tŭ alàng hơđơm khai kư̆ ntoat.

¹⁰ Gơs dô nă cau neh gŏ bơta hơ̆ tus yal mơ Jôap lah: “Añ pa gŏ Apsalôm gơyồng hơđang dô đòm chi cha.”

¹¹ Jôap đơs mơ khai lah: “Ñchi bơh tài tàng mê neh gŏ khai taih? Ñchi bơh tài mê ò lơh khai dùh tòm ù tềng hơ̆ taih? Dilah mê neh tơnchơt khai gen añ neh chò hòp ai mê in jơt pet priă mơ dô nơm che kơt but.”

¹² Mơya cau hơ̆ ho lah: “Bulah añ gơs tòm tê añ dô rbô pet priă neh kơr, añ kung ò khin pò tê tòmdră kòn klau bơtau dê. Bơh tồr bol hi neh kơno bơtau ai jơnau sồr ồng, Abisai mơ Ittai lah: ‘Tài bơh añ; bol mê pal sền gàr tĕ cau pơnu Apsalôm.’

¹³ Mơ dô đah tai, dilah añ lơh ò song tòmdră mơ bơta kis khai, mơ ò gơs bơta lơi rgơi pồn ndơp bơh bơtau, gen să tòm ồng la cau rơp ntào yă añ.”

¹⁴ Jôap ho lah: “Añ rơp ò lơh roh tŭ mơ mê be do.” Behơ̆ khai at pe nơm tà tòm tê khai mơ tơng gơ di plai nùs Apsalôm tòm tŭ Apsalôm gam kis hơđang tòm cha.

¹⁵ Gen jơt nă cau àñ phan tòmlơh Jôap dê gơrwàng gùt dar Apsalôm, mơ pòng tơnchơt khai.

¹⁶ Gen Jôap uh kơlwòk, mơ mpồl ling rê wơl bơh ting jat Israel, tài bơh Jôap neh kơryan bol khai.

¹⁷ Bol khai tă ƀồc Apsalôm sơrbì tòm dô nơm trồm dờng tòm brê, mơ rơndap lŭ hơđang khai dô gơnru dờng ngan. Tòm tŭ jơh ală cau Israel dô rê hơ hìu bol khai dê.

¹⁸ Tòm rài kis Apsalôm dê, khai neh ai mơ bơt să tòm khai in dô nơm jrong tòm Thòng Bơtau, bơh khai đơs lah: “Añ ò gơs kòn klau nàng lòi kirsơnre sơnđan añ jê.” Khai tơmoh sơnđan jrong hơ̆ jat sơnđan să tòm khai dê, mơ gơ geh sơnđan la Jrong Kirsơnre Apsalôm jơl tus di ngai do.

Dabit kơno Apsalôm chơt

¹⁹ Gen Ahimas, kòn klau Jadôk đơs lah: “Lòi añ ntoat yal bơtau in jơnau yal niam bơh Yàng Jehôwa neh dong tă khai klàs bơh tê ală cau sò tơm khai dê.”

²⁰ Jôap ho khai lah: “Mê ò di la cau cèng jơnau yal niam tòm ngai do. Mê rgơi cèng jơnau yal niam tòm dô ngai ndai, mơya ngai do mê bañ lơh behơ̆ tài bơh kòn klau bơtau dê neh chơt.”

²¹ Gen Jôap đơs mơ dô nă cau Kus lah: “Lòt tĕ yal bơtau in bơta mê neh gŏ.” Cau Kus kun di đap Jôap mơ ntoat.

²² Ahimas, kòn klau Jadôk, đơs tai mơ Jôap lah: “Bulah mbe lơi, dan lòi añ in ntoat jat bơh tơnơ̆ cau Kus.” Jôap ho lah: “Ơ kòn añ jê, ñchi bơh tài mê kòñ ntoat taih? Sền do, mê ò gơs phan ƀàn lơi bơh yal jơnau niam hơ̆.”

²³ Khai ho lah: “Bulah mbe lơi, añ rơp ntoat jat khai.” Behơ̆, Jôap đơs lah: “Ntoat tĕ!” Gen Ahimas ntoat jat gùng tòm ƀlàng ring, mơ khai tus lài mơ cau Kus.

²⁴ Tŭ hơ̆ Dabit nggui digùl bàr nơm mpồng ƀòn dờng, cau ling kơp gàr guh hơđang rkàng mpồng ƀòn dờng bơh di dơrñang, mơ tòm tŭ khai tơnggòr sền, gŏ dô nă cau ntoat is.

²⁵ Cau ling kơp gàr hòi dờng mơ yal cau bơtau in. Bơtau đơs lah: “Dilah khai tus is mìng dô nă, khai la cau gơs jơnau niam tòm bơr khai dê.” Mơ cau hơ̆ sơlo tus rềp.

²⁶ Gen cau ling kơp gàr gŏ dô nă cau ndai ntoat tus, khai hòi cau kơp gàr mpồng mơ lah: “Sền ne, gơs dô nă cau ndai tai ntoat is.” Bơtau đơs lah: “Khai kung la cau cèng jơnau yal niam sơl.”

²⁷ Cau ling kơp gàr đơs tai lah: “Añ kơlôi cau ntoat lài gơlơh be Ahimas, kòn klau Jadôk dê.” Bơtau đơs lah: “Khai la dô nă cau niam, mơ tus cèng jơnau yal niam.”

²⁸ Gen Ahimas driau dờng mơ bơtau lah: “Jơh ală bơta niam lơm.” Khai tơmbic să blup mat tòm ù di đap bơtau, mơ đơs lah: “Jòng ro Jehôwa Yàng Tom Trồ bơtau dê! Kơnràñ neh jào cau neh pò tê tòmdră mơ cau tòm añ jê la bơtau.”

²⁹ Cau bơtau lùp lah: “Cau pơnu Apsalôm lơngap lơngai sơl?” Ahimas ho lah: “Tòm tŭ Jôap sồr cau duh broă bơtau dê, gen añ neh gŏ gơs bơta nggồr nggàc dờng ngan, mơya añ ò git hơ̆ la ñchi.”

³⁰ Bơtau đơs mơ khai lah: “Ntào tĕ di gah mơ gơn tềng do.” Behơ̆ khai cơnđòa di gah mơ ntào tềng hơ̆.

³¹ Gen cau Kus tus mơ yal lah: “Gơs jơnau yal niam tus mơ cau tòm añ jê la bơtau! Bơh Yàng Jehôwa neh dong tò bơtau ngai do, dong tă bơtau bơh gơnoar pràn jơh ală cau neh guh nàng tòmdră mơ bơtau.”

³² Bơtau lùp cau Kus lah: “Cau pơnu Apsalôm lơngap lơngai sơl?” Cau Kus ho lah: “Dan ală cau sò tơm di cau tòm añ jê la bơtau, mơ jơh ală cau bơtào tơngguh nàng lơh iơh di bơtau, gen kung be cau pơnu hơ̆.”

Dabit ñìm rac bơh Apsalôm

³³ Cau bơtau jê sồt moat jrùng ngan, khai guh hơ ơdŭ tap hơđang mpồng ƀòn dờng mơ ñìm. Khai lòt ndang ñìm ndang đơs lah: “Ơ Apsalôm kòn klau añ! Ơ kòn klau añ, kòn klau añ Apsalôm! Kơp kòñ añ chơt ala kòn! Ơ Apsalôm, kòn klau añ, kòn klau añ!”