II Samuel 16 - Sră Goh 2018

Dabit mơ Jiba

¹ Tòm tŭ Dabit neh lòt sơrlèt ngài dô êt đah ne mơnơm, gen Jiba cau duh broă Mephibôset dê, ơm gơn nàng tìp mat bơtau. Khai gơs bàr nơm alàng pơdiang bàr rhiang nơm piang lă, dô rhiang nơm piang lă dềt mơ plai ño, dô rhiang nơm piang lă dềt mơ plai ƀal, mơ dô nhồng gơltau tơrnòm ño.

² Bơtau lùp Jiba lah: “Ñchi bơh tài mê cèng ală phan do taih?” Jiba ho lah: “Ală alàng ngui nàng hìu nhă bơtau in hào; piang lă mơ plai chi nàng ală cau klau in sa, mơ tơrnòm nàng bơtơl pràn ală cau in bòl glar òsô tòm ƀlàng ngềt ngơt.”

³ Gen bơtau lùp lah: “Ntềng đah sau klau cau tòm mê dê taih?” Jiba đơs mơ bơtau lah: “Khai ơm wơl tòm Jerusalem bơh khai kơlôi lah: ‘Ngai do hìu Israel rơp jào wơl añ in lơgar ồng añ jê’.”

⁴ Bơtau đơs mơ Jiba lah: “Behơ̆ jơh ală phan gơrê bal mơ Mephibôset gen tŭ do gơlik gơs phan tòm mê dê rau.” Jiba đơs lah: “Añ cùn khoai bơtau, dan añ in geh bơta nđàc di đap mat cau tòm añ jê la bơtau.”

Simei srat rma Dabit

⁵ Tòm tŭ Dabit tus rềp di Bahurim, gơs dô nă cau bơh mpồl hìu nhă bal mơ Sol lik bơh hơ̆. Khai sơnđan la Simei kòn klau Gera, mơ khai lik mơ srat rma.

⁶ Khai cơm lŭ di Dabit mơ jơh ală cau kwang duh broă bơtau dê; tŭ hơ̆ jơh làng bol bal mơ ală cau ling jak tòmlơh lòt đah ma mơ đah kiau bơtau dê.

⁷ Simei driau dờng ndang srat rma Dabit ndang mơ đơs lah: “Ơ cau tơnchơt cau, ơ cau iơh bơsak, lik tĕ, lik tĕ!

⁸ Yàng Jehôwa neh sal wơl di mê bơh mhàm hìu nhă Sol dê, tòm tiah mơ mê neh at bồ; mơ Yàng Jehôwa neh jào lơgar tòm tê Apsalôm kòn klau mê dê. Sền tĕ bơta rung rài neh kup geh mê; tài bơh mê la dô nă cau neh lơh gơhòr mhàm.”

⁹ Gen Abisai kòn klau Jeruya đơs mơ bơtau lah: “Ñchi bơh tài dô nơm so chơt ne khin srat rma cau tòm añ jê la bơtau taih? Lòi añ lòt koh bồ khai dê.”

¹⁰ Mơya bơtau ho lah: “Ơ ală kòn klau Jeruya, ñchi bơta gơkoă digùl bol mê mơ añ taih? Dilah khai srat rma gen hơ̆ la Yàng Jehôwa neh đơs mơ khai lah: ‘Srat rma tĕ Dabit.’ Behơ̆ ñcau rgơi lùp lah: ‘Ñchi bơh tài mê lơh behơ̆ taih?’”

¹¹ Dabit đơs mơ Abisai mơ jơh ală cau dĭ gơna khai dê lah: “Kòn klau añ la poac mhàm tòm añ mơ kòñ tơnchơt añ, tơ ài lah cau Benjamin do! Lòi tĕ khai, mơ lòi khai srat rma; bơh Yàng Jehôwa neh sồr khai lơh behơ̆.

¹² Digơlan Yàng Jehôwa rơp wèt sền bơta rung rài añ jê mơ tơm wơl añ in bơta niam ala bơta srat rma mơ añ kong tòm ngai do.”

¹³ Behơ̆ Dabit mơ ală cau khai dê pơnjat lòt gùng tòm tŭ Simei kư̆ lòt jat rò gah kơh tòm toh mơ Dabit, lòt ndang srat rma ndang, cơm lŭ mơ rsìh thul di bơtau Dabit.

¹⁴ Bơtau bal mơ jơh làng bol jat bơtau lòt tus hơ Jordan, bol khai bòl glar ngan. Tềng hơ̆ bơtau rlô mơ geh pràn wơl.

Jơnau bơyai broă Husai mơ Ahitôphel dê

¹⁵ Tòm tŭ hơ̆, Apsalôm mơ jơh ală cau Israel neh mut tòm Jerusalem rau, mơ Ahitôphel jat khai.

¹⁶ Gen Husai cau Arkit, la cau bơyô Dabit dê, tus hơ Apsalôm mơ đơs lah: “Dan bơtau in kis jŏ! Dan bơtau in kis jŏ!”

¹⁷ Apsalôm đơs mơ Husai lah: “Hơ̆ la bơta kòñ gơboh mơ mê yal tơlik gơwèt mơ cau bơyô mê dê sơl ơ? Ñchi bơh tài mê ò lòt jat cau bơyô mê dê taih?”

¹⁸ Husai đơs mơ Apsalôm lah: “Ò, añ rơp gơs mat mơ ơm wơl mơ cau lơi la cau geh sac rwah bơh Yàng Jehôwa, bơh làng bol do, mơ bơh jơh cau Israel.

¹⁹ Rlau mơ hơ̆, cau lơi la cau mơ añ rơp duh broă taih? Añ ò di duh broă kòn klau bơtau dê ò ơ? Añ rơp duh broă ồng kung be neh duh broă bèp ồng sơl.”

²⁰ Gen Apsalôm neh đơs mơ Ahitôphel lah: “Yal tĕ bol hi in jơnau bơyai mê dê. Ñchi bol he pal lơh taih?”

²¹ Ahitôphel ho lah: “Bic tĕ mơ ală bau ùr cồng bèp ồng dê neh lòi wơl nàng sền gàr hìu gơlang. Gen jơh Israel rơp kơno lah ồng neh lơh să tòm ồng in gơlik ngkòr ngkàc gơwèt mơ bèp ồng dê, mơ tê ală cau bal mơ ồng rơp geh pràn kơldang.”

²² Behơ̆, cau bơtào Apsalôm in dô nơm sàl hơđang rkàng ring hìu gơlang dê, mơ khai bic mơ ală bau ùr cồng bèp khai di đap mat jơh Israel.

²³ Mơ tai, tòm ală ngai hơ̆, jơnau bơyai Ahitôphel dê la kung be jơnau đơs Yàng Tom Trồ dê. Behơ̆ jơh ală jơnau bơyai Ahitôphel la pal sền dờng màng, Dabit mơ Apsalôm kung sền gŏ behơ̆ sơl.