Hebrơ 4 - Sră Goh 2018

Jơnau ho bơh bơta rlô lơngai

¹ Tŭ do, Yàng Tom Trồ neh ai jơnau ho pơgon bơh bơta mut tòm bơta rlô lơngai Kơnràñ dê, gen bol he pal kơlôi rngòt, nàng ò gơs cau lơi tòm oh mi rơp gơkòl sang lòi.

² Bơh ngan jơnau niam neh geh bơto yal bol he in kung be bol khai in; mơya jơnau bol khai neh iat hơ̆ gơwèt mơ bol khai la ò kwơ, tài bơh bol khai ò ai bơta dòn nàng dòp geh.

³ Bơh bol he la cau neh dòn gen geh mut tòm bơta rlô lơngai, be Yàng Tom Trồ neh đơs: “Tòm tŭ Añ gơjrañ dờng Añ srat să lah: ‘Bol khai rơp ò tŭ lơi geh mut tòm bơta rlô lơngai Añ jê,’” Bulah ală broă Kơnràñ dê neh gơs sir rau bơh sơnròp crơng gơs trồ tiah.

⁴ Đơs bơh ngai poh gen gơs tiah Kơnràñ đơs be do: “Ngai poh Yàng Tom Trồ rlô jơh ală broă Kơnràñ dê.”

⁵ Bơh bơta do Kơnràñ đơs lah: “Bol khai rơp ò tŭ lơi geh mut tòm tiah rlô lơngai Añ jê.”

⁶ Ală cau sơnròp neh kơno Jơnau Niam hơ̆ ò geh mut tòm tiah rlô tài bơh bol khai ò dòn; bulah behơ̆, gam gơs cau ndai geh gơnoar mut tềng hơ̆.

⁷ Gen jŏ tơnơ̆, tòm sră Đơs Crih Dabit cih, Kơnràñ pơgon dô ngai tai sơnđan la “Ngai do,” be hơđang neh đơs lah: “Ngai do, dilah bol mê kơno jơnau đơs Kơnràñ dê, Gen bañ kơldang nùs.”

⁸ Bơh dilah Jôsue neh ai bol khai in rlô mơ Yàng Tom Trồ neh ho, gen ngan Yàng Tom Trồ ò gam đơs bơh dô ngai ndai tai.

⁹ Behơ̆, gam gơs dô bơta rlô lơngai be rlô ngai Saƀat làng bol Yàng Tom Trồ in.

¹⁰ Bơh cau lơi neh mut tòm bơta rlô Kơnràñ dê, gen rlô ală broă he dê, kung be Yàng Tom Trồ neh rlô ală broă Kơnràñ dê sơl.

¹¹ Behơ̆ gen, bol he pơnđơl tĕ jơh nùs nàng mut tòm bơta rlô lơngai hơ̆, tồ ò gơs dô nă cau lơi rơp gơpừ đòm krơh cau ò gơs bơta dòn ne.

¹² Bơh jơnau Yàng Tom Trồ dê la jơnau kis, ƀă tàm, sồt rlau mơ đào bàr đah mat, srơp bluh tian gơs cah is hwềng soàn, hwềng nùs, kồ mơ khu, sền sơwì bơta kơlôi sơnơng mơ bơta lơh nền tòm nùs.

¹³ Ò gơs phan lơi rgơi pồn ndơp di đap Yàng Tom Trồ, mơya jơh ală phan geh crơng gơs rơp ràng tơlik mơ gơ pò di đap mat Kơnràñ mơ bol he pal yal broă he dê.

Yàng Jesu cau gơnoar dờng lam bồ ơn phan duh khoai

¹⁴ Behơ̆ tàng, bơh bol he gơs cau gơnoar dờng lam bồ ơn phan duh khoai neh lòt gan ală tap trồ, hơ̆ la Yàng Jesu Kòn Yàng Tom Trồ dê, gen bol he pal prap kơ̆ jơnau bol he neh dòn dòp.

¹⁵ Bơh bol he ò gơs cau gơnoar dờng lam bồ ơn phan duh khoai ò rgơi git làm bơta lơbơn lơño bol he dê, mơya bol he gơs dô nă cau gơnoar dờng lam bồ ơn phan duh khoai neh kong ơniai tòm jơh ală bơta, kung be bol he mơya ò tìs glài.

¹⁶ Behơ̆ bol he kơ̆ tĕ nùs tus rềp di sơbàn Bơtau ai bơta nđàc dê, nàng dòp geh bơta nđàc sơngit mơ jòi geh bơta kòñ nđàc nàng dong kòl bol he tòm tŭ pal càng.