Hebrơ 2 - Sră Goh 2018

Bơta dong klàs dờng ơnàng

¹ Gen tàng, bol he sơlo pal ơn nùs kơlôi nền cê di ală bơta he neh kơno, rngòt bol he kòl pơrdô mòn.

² Bơh dilah jơnau cau gơnrơh neh yal la kơ̆ nền, mơ ală bơta tìs glài mơ ală bơta ò dòn bơr neh kong lơh glài dô bă di pal,

³ mơ dilah bol he sang lòi bơta dong klàs dờng behơ̆, gen mbe bol he geh klàs taih? Sơnròp ngan, să tòm Yàng neh bơto yal bơta dong klàs hơ̆, mơ ală cau neh kơno Kơnràñ neh lơh cơng bol he in bơta hơ̆ la ngan.

⁴ Yàng Tom Trồ kung lơh bơtơl ală tềl is, ală bơta krơi, mơ tơl ală broă gơnap gơnoar mơ ală bơta ai gòi Yàng Hwềng Goh dê jat nùs kòñ Kơnràñ, nàng lơh cơng bal mơ bol khai sơl.

Bơta dong klàs tòm Yàng Jesu Krist

⁵ Yàng Tom Trồ ò ơn ală cau gơnrơh in at bồ hơđang dunnia rơp tus, la dunnia mơ bol he đơs hơ̆.

⁶ Mơya gơs tiah tòm Sră Goh cih lah: “Jơi kòn mơnus la ñchi mơ Yàng kah taih? Kòn mơnus la ñcau mơ Yàng wèt sền taih?

⁷ Yàng neh lơh Kòn Mơnus gơhuc dô êt mơ cau gơnrơh, Tơndau sơgơn bơtau gơklŏ mơ ryŭ ryơm Khai in, Ơn Khai hơđang ală broă tê Yàng lơh,

⁸ Ơn jơh ală phan dòn duh hơđơm jơng Khai.” Kơnràñ neh ơn jơh ală phan dòn duh Khai, gen ò lòi dô nơm phan lơi ò dòn duh Khai. Mơya tòm tŭ do bol he òhềt gŏ jơh ală phan dòn duh Khai.

⁹ Mơya bol he gŏ Yàng Jesu, la Bơtau kong tơnliah hơđơm cau gơnrơh dô êt jŏ, bơh bơta nđàc Yàng Tom Trồ dê mơ Kơnràñ kong chơt tơl nă cau in. Tŭ do bol hi sền gŏ Kơnràñ geh tơndau sơgơn bơtau gơklŏ mơ ryŭ ryơm, tài bơh neh kong bòl glar bơh bơta chơt.

¹⁰ Di ngan mìng Yàng Tom Trồ la Bơtau crơng gơs mơ prap gàr jơh ală phan, rgơi lơh Yàng Jesu in geh wil tơl bơh bơta kong bòl glar, nàng cèng ală kòn gơs pơnah tòm bơta gơklŏ Kơnràñ dê. Bơh Yàng Jesu la Bơtau tề lam bol khai tus hơ bơta dong klàs.

¹¹ Bơh Bơtau lơh gơlik gơs sàng goh bal mơ ală cau gơlik gơs sàng goh, la bơh dô nă Bèp mơ gơlik gơs. Gen tàng Yàng Jesu ò ƀàssìl sơnđan bol khai la oh mi,

¹² mơ Kơnràñ đơs lah: “Añ rơp bơto yal sơnđan Yàng oh mi Añ in, Đơs chò jòng ro Yàng digùl mpồl jơnum.”

¹³ Mơ đơs tai lah: “Añ rơp kơnòm di Kơnràñ.” Kung đơs tai lah: “Do, Añ mơ ală kòn sau mơ Yàng Tom Trồ neh ai Añ in.”

¹⁴ Behơ̆ gen, tài bơh ală kòn sau neh gơs pơnah tòm poac mơ mhàm be lơi, gen tàng să tòm Kơnràñ kung gơs pơnah tòm poac să behơ̆ sơl, tồ kơnòm di bơta chơt mơ Kơnràñ rgơi tơnroh cau at bồ bơta chơt la cà ràk,

¹⁵ nàng hồ toh jơh ală cau kòl tòm yô dĭ gơna jơl jơh rài he dê bơh rngòt di bơta chơt.

¹⁶ Bơh ngan ò di la Kơnràñ neh kơlôi rcang ală cau gơnrơh in, mơya kơlôi rcang jơi bơtiàn Abraham in.

¹⁷ Gen tàng tòm jơh ală bơta Kơnràñ pal geh gơlik gơs ndròm bal be oh mi Kơnràñ dê, nàng gơwèt mơ Yàng Tom Trồ Kơnràñ gơlik gơs cau gơnoar dờng lam bồ ơn phan duh khoai geh bơta nđàc sơngit mơ dòn song, nàng lơh gơs phan ơn tơwài glài tài bơh tồi glài làng bol dê.

¹⁸ Bơh să tòm Kơnràñ neh kong bòl glar jê sồt tòm tŭ tìp bơta ơniai, gen tàng rgơi dong kòl ală cau tìp bơta ơniai sơl.