Este 8 - Sră Goh 2018

Bơta lơh nền bơtau dê bơh cau Juda

¹ Kung tòm ngai hơ̆, bơtau Ahasuerus ai bau ùr bơtau la Este in hìu Haman dê la cau sò tơm di làng bol Israel. Mơ Mordike tus tơlik mat di đap bơtau bơh Este neh yal tơlik khai la cau gơp bơtiàn mơ khai.

² Bơtau hồ sơmbiat ƀang kì mơ khai neh tă bơh di Haman mơ ai gơ Mordike in. Mơ Este bơtào Mordike at bồ hơđang hìu Haman dê.

³ Gen Este rac dan tai mơ cau bơtau, khai tơmbic să di jơng bơtau mơ ñìm. Khai rac dan bơtau tơnroh bơta rơndap broă iơh bơsak mơ Haman cau Agak neh tòmdră mơ làng bol Israel.

⁴ Bơtau yơr gai gơnoar màh Este in, gen Este guh mơ ntào di đap bơtau.

⁵ Este đơs lah: “Dilah niam nùs bơtau mơ dilah bơtau gơs nùs nđàc gơwèt mơ añ mơ kơlôi bơh bơta do la di pal lơh, mơ dilah bơtau niam nùs di añ gen dan bơtau cih tơlik dô jơnau gơnoar sồr nàng tă sang ală sră gơnoar sồr mơ Haman, kòn klau Hamedatha cau Agak neh bơtào gơs mơ neh cih nàng tơnroh ală làng bol Israel ơm tòm jơh ală kơnhwàl lơgar bơtau dê.

⁶ Bơh mbe añ rgơi kong jai tòm tŭ sền gŏ bơta rung rài gơtơntus hơđang làng bol añ jê taih? Mbe añ rgơi kong jai tòm tŭ sền gŏ bơta tơnroh hìu nhă añ jê taih?”

⁷ Bơtau Ahasuerus ho wơl bau ùr bơtau la Este mơ Mordike lah: “Tài bơh Haman neh brồ lơh làng bol Israel, añ neh ai hìu Haman dê Este in, mơ bol khai neh yồng khai di jrong yồng cau.

⁸ Tŭ do ai tĕ sơnđan bơtau mơ ala mat cau Juda, cih tĕ dô jơnau gơnoar sồr ndai mơ bol ai kơlôi la niam rlau jơh, lồc behơ̆ tap ƀang kì gơ mơ sơmbiat bơtau dê, bơh dô pang sră yal gơnoar sồr neh cih ai sơnđan bơtau mơ ƀang kì sơmbiat bơtau dê gen ò rgơi tơnroh ò.”

⁹ Ală cau gơnoar cih bơtau dê geh hòi tus tòm tŭ hơ̆, tòm ngai bàr jơt pe kơnhai pe la kơnhai Siban. Bol khai cih jơh ală jơnau gơnoar sồr Mordike dê pơyoa tus hơ ală làng bol Israel mơ ală cau kwang đơng lơgar, ală cau kwang at bồ kơnhwàl mơ ală cau ryŭ ryơm tòm dô rhiang bàr jơt poh kơnhwàl bơh Jôa tus Ethiôpi, mơ ală jơnau sồr do geh cih tòm jơnau cih kòp kơnhwàl mơ jat jơnau đơs kòp làng bol dê, mơ kung pơyoa ală làng bol Israel in tòm jơnau cih mơ jơnau đơs bol khai dê.

¹⁰ Mordike cih ai sơnđan bơtau Ahasuerus dê mơ tap ƀang kì tòm ală sră hơ̆ mơ sơmbiat ƀang kì bơtau dê, lồc behơ̆ sồr ală cau ling, hào ală ơseh jak la ơseh ròng is cau bơtau in ngui.

¹¹ Bơh ală sră pơyoa do bơtau ai gơnoar cau Juda ơm tòm kòp nơm ƀòn dờng pơjum bal mơ sền gàr bơta kis bol khai dê, geh gơnoar tơnroh, tơnchơt mơ lơh roh rui jơh ală gơnoar pràn gơrê mơ làng bol lơi hala kơnhwàl lơi at phan brồ lơh bol khai bal mơ bau kòn bol khai dê, mơ kung geh gơnoar tòmpìt ai phan mơna bol khai sơl.

¹² Mìng tòm dô ngai làm jơh tòm kơnhwàl lơgar bơtau Ahasuerus dê, tòm ngai jơt pe kơnhai jơt bàr, hơ̆ la kơnhai Adar.

¹³ Dô pang sră cih wơl tòm toh be sră bơh sơnròp neh cih jơnau gơnoar sồr bơtau dê geh ngui lơh gơs be bơta boh lam tòm kòp kơnhwàl lơgar, mơ yal loh làng bol in, mơ cau Juda neh rcang sir tòm ngai hơ̆ nàng sal tê di ală cau sò tơm bol khai dê.

¹⁴ Behơ̆ ală cau cèng sră, hào ơseh cau bơtau dê lik lòt sơrbac sơrbang, ntoat mhar bơh jơnau gơnoar sồr cau bơtau dê. Mơ jơnau gơnoar sồr cau bơtau dê neh tus tòm ƀòn dờng kơ̆ cê la Susa.

¹⁵ Gen Mordike lik lòt bơh di đap cau bơtau, soh ồi ào bơtau dê dà tơlir trồ mơ dà bò, ndau dô nơm sơgơn bơtau dờng mơ màh, mơ soh dô nơm ào jrùh mơ bài che dơmài lơbơn dà gur. Mơ ƀòn dờng Susa ai jơnau driau dờng mơ hòn chò.

¹⁶ Gơwèt mơ cau Juda gen gơs bơta àng mơ chò hòp, hừh hơh mơ geh dờng màng.

¹⁷ Tòm kòp kơnhwàl lơgar mơ tòm kòp ƀòn dờng, tiah lơi neh tus jơnau gơnoar sồr cau bơtau dê gen gơs bơta hòn chò hừh hơh digùl cau Juda, bal mơ bơta ñô sa dờng mơ ngai ơm rlô pơjum chò hòp. Mơ gơs oă cau tòm ală làng bol ndai neh gơlik gơs làng bol Israel tài bơh bol khai rngòt rngơt ngan di làng bol Israel.