Este 5 - Sră Goh 2018

Jơnau Este dan mơ cau bơtau

¹ Tòm ngai pe Este soh ào jrùh bau ùr bơtau dê mơ ntào tòm ƀlàng hìu dơlam gơlang bơtau dê, di đap ơdŭ pơjum bơyai broă bơtau dê. Cau bơtau ơm nggui hơđang sơbàn khai dê tòm ơdŭ bơyai broă, wèt mat hơ mpồng mut tòm ơdŭ.

² Tòm tŭ cau bơtau gŏ Este ơm ntào tòm ƀlàng dơlam gơlang, khai niam nùs di Este mơ yơr Este in gai gơnoar màh khai at tòm tê. Behơ̆ Este tus rềp mơ ƀư di bồ gai gơnoar at bồ.

³ Gen cau bơtau đơs mơ Este lah: “Ơ Este bau ùr bơtau ñchi ai kòñ taih? Ñchi ai kòñ dan taih? Bulah tus di nggùl lơgar kung rơp ai ai in.”

⁴ Este ho lah: “Dilah bơta do niam nùs bơtau, añ dan jà bơtau bal mơ Haman tòm ngai do lòt tus ñô sa tòm dô bơta yò sa mơ añ neh rcang bơtau in.”

⁵ Cau bơtau đơs lah: “Cèng tĕ Haman tus mo nàng bol he rgơi lơh jat be bơta Este neh dan.” Behơ̆ bơtau mơ Haman lòt tus hơ bơta yò sa mơ Este neh rcang sir.

⁶ Tòm tŭ gam ñô tơrnòm bơtau lùp mò Este lah: Ñchi bơta ai kòñ dan? Ngan rơp geh lơm! Ai dan tòm broă lơi? Bulah tus di nggùl lơgar kung rơp geh.

⁷ Este ho lah: “Bơta añ kòñ mơ bơta añ dan la bơta do:

⁸ Dilah añ geh bơta nđàc di đap bơtau, mơ dilah gơ niam nùs bơtau nàng ai bơta añ kòñ mơ lơh gơlik gơs bơta añ dan gen dan jà bơtau mơ Haman ngai hìng lòt tus hơ bơta ñô sa mơ añ rơp yò bơtau mơ Haman in, gen añ rơp ho wơl jơnau lùp bơtau dê.”

Haman gơhào gơjrañ di Mordike

⁹ Tòm ngai hơ̆ Haman lik lòt tòm bơta chò hòp mơ tòm hwềng nùs hừh hơh. Mơya tòm tŭ Haman gŏ Mordike ơm di mpồng gơlang bơtau dê mơ sền gŏ khai ò ñă ntào hala ơrơm să di đap khai, gen khai gơhào gơjrañ oă ngan di Mordike.

¹⁰ Bulah behơ̆, Haman ơt ơl să khai mơ rê hìu. Gen khai sồr hòi pơjum ală oh mi bơyô khai dê mơ Jeres bau ùr khai dê.

¹¹ Haman jòng să khai dê mơ bol hơ̆ bơh bơta pas sơm ngan khai dê, bơh ală kòn klau khai dê, mơ bơh jơh ală bơta mơ cau bơtau neh lơh nàng bơtào khai in geh jòng màng, mơ mbe cau bơtau neh tơngguh khai hơđang ală cau kwang dờng ryŭ ndai mơ ală cau kwang duh broă bơtau dê.

¹² Haman kung đơs bơtơl tai lah: “Tian gơs Este bau ùr bơtau dê ò lòi dô nă cau lơi in, mơya mìng dô nă añ geh lòt jat cau bơtau tus hơ bơta ñô sa dờng mơ khai neh yò. Ngai hìng añ kung geh khai jà lòt bal mơ cau bơtau sơl.

¹³ Mơya jơh ală bơta hơ̆ ò lơh niam nùs añ, tòm tŭ añ gam gŏ Mordike cau Juda ơm nggui di mpồng gơlang bơtau dê.”

¹⁴ Jeres bau khai dê mơ jơh ală oh mi bơyô khai dê đơs mơ khai lah: “Sồr bơtào tĕ dô nơm jrong yồng cau, jơnhoa pram jơt tal, mơ dan cau bơtau àng drim hìng yồng Mordike hơđang hơ̆; gen lòt tĕ sa bal mơ cau bơtau dô bă chò hòp tòm hwềng nùs.” Jơnau bơyai hơ̆ niam nùs Haman, gen khai sồr cau bơtào dô nơm jrong yồng cau.