Este 2 - Sră Goh 2018

Este gơlik gơs bau ùr bơtau dê

¹ Tơnơ̆ mơ hơ̆, tòm tŭ neh rài bơta gơjrañ bơtau Ahasuerus dê, gen khai kah wơl Basthi bơh bơta khai neh lơh, mơ bơta lơh nền bơtau neh tòmdră di khai.

² Gen ală cau duh broă ơm rềp mơ bơtau đơs lah: “Jòi tĕ ală cau ơruh dềt hàng mơnĕ cau bơtau in.

³ Dan bơtau pồ bơtào ală cau kwang tòm jơh ală kơnhwàl tòm lơgar bơtau dê nàng bol khai hòi pơjum jơh ală cau ơruh hàng mơnĕ hơ̆ tus hơ gơlang bau ùr bơtau dê tòm ƀòn dờng Susa, mơ jào Hegai in sền gàr; la kwang kriau duh broă bơtau dê, cau gơs gơnoar sền gàr ală cau ùr, mơ ai tĕ bol khai in ală phan ngui nàng bơka să.

⁴ Mơ lòi tĕ cau ơruh lơi geh niam nùs bơtau gơlik gơs bau ùr bơtau ala Basthi.” Jơnau hơ̆ niam nùs bơtau gen khai lơh behơ̆.

⁵ Mơ tai, gơs dô nă cau Juda tòm Susa sơnđan la Mordike kòn klau Jair sau Simei dê, se Kis la dô nă cau Benjamin dê,

⁶ la cau neh kòl Nebukatnessar bơtau Babilôn kup cèng pơrdô bơh di Jerusalem bal mơ ală cau kòl kup cèng mơ Jehôyakin bơtau Juda dê.

⁷ Mordike neh cèng bal dô nă cau jơi bơtiàn sơnđan la Hadassa hơ̆ la Ester; bơh khai ò gam gơs mè bèp tai, cau ơruh hơ̆ hàng mơnĕ ngan mơ Mordike neh ròng siam khai bơh dềt kung be kòn ùr tòm khai dê.

⁸ Behơ̆ tòm tŭ jơnau gơnoar sồr mơ bơta lơh nền bơtau dê neh geh yal tơlik, gơs oă cau ơruh pơjum bal tòm ƀòn dờng Susa, tòm bơta sền gàr Hegai dê. Este kung geh cèng tus tòm gơlang bơtau mơ neh jào Hegai in la cau at bồ gơlang bau ùr bơtau dê.

⁹ Cau ơruh hơ̆ niam nùs khai mơ geh bơta nđàc di đap khai. Tŭ hơ̆ mo, khai rcang ai Este in jơh ală phan ngui nàng bơka să lơh hàng mơnĕ mơ ală phan sa bơkah, bal mơ poh nă cau ùr duh broă bơh di gơlang bơtau, mơ ơn is khai mơ ală cau duh broă khai dê tòm ơdŭ niam rlau jơh tòm gơlang bau ùr bơtau dê.

¹⁰ Este ò gŏ yal tơlik làng bol tòm mơ hìu nhă khai dê, tài bơh Mordike neh bơkơ̆u khai yal bơta hơ̆.

¹¹ Kòp ngai Mordike lòt rê di đap ƀlàng jơng gơlang bau ùr bơtau dê nàng sền mbe gơlơh Este ơm mơ ñchi bơta gơlik tus di khai.

¹² Lài mơ tŭ tus di bơta neh rơndap dô nă cau ơruh in nàng lòt tus hơ cau bơtau Ahasuerus, gen cau ơruh hơ̆ pal geh rcang lơh hàng mơnĕ tòm jơt bàr kơnhai jat bơta neh lơh nền ală cau ùr in, prau kơnhai ngui mơñà cài trŭ, prau kơnhai ngui mơñà ƀô bơlhu mơ ală phan ngui lơh hàng mơnĕ.

¹³ Tòm tŭ cau ơruh mut tus hơ bơtau, khai neh geh ai ală bơta lơi khai dan bơh di gơlang bau ùr bơtau dê.

¹⁴ Tòm trồ mho khai lòt tus tềng hơ̆ mơ tòm àng drim hìng khai rê wơl hơ dô nơm ơdŭ ndai tòm gơlang bau ùr bơtau dê hơđơm bơta sền gàr Saasgas la cau kwang kriau bơtau dê, cau sền gàr ală bau ùr cồng. Khai ò gŏ rê wơl hơ cau bơtau tai, mìng dilah cau bơtau niam nùs di khai mơ hòi sơnđan khai.

¹⁵ Tòm tŭ tus di wềr Este (cau ơruh mơ Mordike neh dòp gơs kòn ròng, la kòn ùr Abihail kồñ khai dê) lòt tus hơ cau bơtau, khai ò dan phan lơi rlau mơ phan mơ Hegai cau kwang kriau bơtau dê cau sền gàr hìu gơlang bau ùr bơtau dê neh lơh nền. Este dòp geh bơta sền dờng màng di đap jơh ală cau neh gŏ khai.

¹⁶ Tòm tŭ Ester geh cèng tus hơ bơtau Ahasuerus tòm hìu gơlang bơtau dê tòm kơnhai jơt, hơ̆ la kơnhai Tebet, tòm nam dơ̆ poh rài at bồ khai dê.

¹⁷ Cau bơtau kòñ gơboh di Este rlau mơ jơh ală cau ùr ndai, mơ Este geh bơta nđàc di đap khai mơ geh dòp rò rlau mơ jơh ală cau ơruh ndai. Behơ̆ bơtau tơndau dô nơm sơgơn bơtau hơđang bồ Este, mơ bơtào khai gơs bau ùr bơtau ala Basthi.

¹⁸ Mơ cau bơtau yò dô bơta ñô sa dờng ală cau màng ryŭ mơ ală cau kwang at bồ mơ ală cau duh broă bơtau in. “Bơta yò sa dờng Este.” Bơtau kung ai dô ngai ơm rlô tòm kơnhwàl lơgar mơ ai phan pà jat bơta pas sơm dờng ơnàng bơtau dê.

Mordike jòi bàn dô bơta pơrlơ̆ dră

¹⁹ Tòm tŭ ală cau ơruh pơjum bal dô bă bal gen Mordike ơm nggui di mpồng gơlang cau bơtau dê.

²⁰ Tŭ hơ̆ Este ò yal tơlik jơi bơtiàn mơ làng bol khai dê, jat be jơnau Mordike neh sồr khai, bơh Este lơh jat jơnau bơto sồr Mordike dê kung be khai neh lơh tòm tŭ Mordike ròng siam khai bơh dềt jơl dờng.

²¹ Tòm ală ngai hơ̆ tòm tŭ Mordike ơm nggui di mpồng gơlang bơtau dê, gen gơs bàr nă cau kwang duh broă bơtau dê gơs broă tòm kơp gàr gùng mpồng bơtau la Bikthan mơ Teres bàr nă kwang kriau kơp gàr mpồng neh gơhào gơjrañ di cau bơtau mơ bơtào kai gơrmơ̆i nàng tơnchơt òm bơtau Ahasuerus.

²² Mơya ală bơta gơlik gơs hơ̆ neh kơno git tus di Mordike, gen khai yal bau ùr bơtau la Este in git; gen Este yal wơl cau bơtau in, mơ Este yal bơtau in ai sơnđan Mordike neh jòi git bơta hơ̆.

²³ Tòm tŭ cau sền sơwì bơh bơta hơ̆ mơ git bơta hơ̆ la ngan, gen bàr nă cau kwang hơ̆ kòl yồng ngko di chi yồng cau glài. Jơh ală bơta hơ̆ geh cih tòm sră yal yau kòp nam di đap mat cau bơtau dê.