Ephesô 4 - Sră Goh 2018

II. Broă tòm cau dòn jat Yàng gơwèt mơ Hìu Jum Goh, ƀòn lơgar mơ hìu nhă ( 4:1 – 6:24 ) Dô bă bal tòm să jan Bơtau Krist

¹ Behơ̆, añ la cau ơm jàm tài bơh Yàng, rac dan oh mi pal kis dô bă di pal mơ bơta hòi sac mơ Yàng neh hòi sac oh mi.

² Tòm ală bơta pal pơndêt să, niam lơnhơn, ơt ơl, ai nùs kòñ gơboh mơ kong ơt bal mơ gơp.

³ Jơh nùs tĕ ai bơta ring lơngai be dô nơm che kơt oh mi dô bă bal tòm Yàng Hwềng.

⁴ Gơs mìng dô nơm să jan, dô nă Yàng Hwềng, kung be oh mi neh geh hòi sac tus tòm dô bơta gơn kơnòm gơrê bal mơ bơta hòi sac oh mi dê.

⁵ Gơs mìng dô nă Yàng, dô bơta dòn, dô bơta ƀaptem,

⁶ dô nă Yàng Tom Trồ la Bèp jơh ală cau, Kơnràñ ơm hơđang jơh tơl nă, ơm digùl jơh tơl nă, mơ ơm tòm jơh tơl nă cau.

⁷ Mơya neh ai bơta nđàc kòp nă cau in tòm bol he jat be rnoas bơta ai gòi Bơtau Krist dê.

⁸ Be Sră Goh neh đơs lah: “Tòm tŭ Kơnràñ guh hơđang jòng, gen tề lam ală cau kòl jàm, Mơ ai bơta ai gòi kòn mơnus in.”

⁹ Mơ tai, neh đơs lah: “Kơnràñ guh,” hơ̆ ò di gơs jơnau gơtha la Kơnràñ neh mù tòm ală tiah liah hơđơm ù ò ơ?

¹⁰ Bơtau neh mù la să tòm Bơtau neh guh hơđang jơh ală tap trồ nàng lơh bềng lìu jơh ală bơta.

¹¹ Kơnràñ ai cau do in gơs cau gơnoar bơto dờng, cau ne gơs cau gơnoar hwơr, cau ƀà gơs cau bơto yal Jơnau Niam, cau ƀà tai gơs cau gơnoar bơto mơ cau bơto,

¹² tồ lơh cau sàng goh in gơlik gơs wil tơl tòm ală bơta duh broă Yàng Tom Trồ, mơ tòm bơta bơt bơtào să jan Bơtau Krist dê,

¹³ jơl tus di tŭ jơh tơl nă bol he tus dê bơta dô bă bal bơta dòn dê, mơ bơta git jak bơh Kòn Yàng Tom Trồ, mơ gơlik gơs cau dờng, geh sơnoa be rùp să jat bơta bềng tơl Bơtau Krist dê,

¹⁴ tồ bol he ò di gam be cau kơnòm tai, gơkòl pơrlồm bơh ală jơnau krơi, bơta pơlìn mơ kai lac lèo kòn mơnus dê, jat kai gơrmơ̆i tìs nrah bol khai dê, kung be càl bơtồ pơrdô ma kiau behơ̆ sơl.

¹⁵ Mơya pal ai hwềng nùs kòñ gơboh mơ đơs jơnau song, nàng tòm jơh ală bơta bol he geh dờng tòm Bơtau lam bồ, hơ̆ la Bơtau Krist;

¹⁶ kơnòm dê Kơnràñ mơ jơh să jan geh crap mơ gơtòmklĕ bal bơh bơta dong kòl ală tiah tơrbŏ dê, jat be pràn kòp pơnah dê, lơh să jan gơlik dờng mơ bơtào is tòm bơta kòñ gơboh.

Rài kis pa tòm Bơtau Krist

¹⁷ Behơ̆, do la bơta añ đơs mơ lơh cơng tòm Yàng lah oh mi bañ lơh lòt be làng bol bơdìh tai, jat bơta roh lơm nùs kơlôi bol khai dê;

¹⁸ nùs bol khai klam jơngo, ơm ngài mơ bơta kis Yàng Tom Trồ dê, tài bơh bơta bơrngơl gơla tòm bol khai gơlik bơh nùs kră kơldang bol khai dê.

¹⁹ Bol khai neh roh jơh bơta git wă, sang is să he tòm bơta bung jang, hàm kòñ lơh jơh ală bơta ngkòr ngkàc.

²⁰ Mơya oh mi neh bơtê jat Bơtau Krist gen ò di behơ̆,

²¹ ngan oh mi neh kơno bơh Kơnràñ mơ geh bơto tòm Kơnràñ, jat be jơnau song tòm Yàng Jesu.

²² Behơ̆ oh mi pal klò sang cau yau bơh bơta lơh lòt lài òr, la cau sơlo ngai sơlo ồm lề bơh bơta hàm kòñ is blac pơrlồm;

²³ kơnòm di Yàng Hwềng tòmgơl pa tòm dơngoh kơlôi mơ hwềng nùs oh mi dê,

²⁴ mơ dòp soh cau pa, la cau neh geh crơng gơs jat be Yàng Tom Trồ tòm bơta song ring mơ bơta sàng goh jơnau song dê.

²⁵ Gen tàng, oh mi pal sang bơta ma blac, kòp nă pal đơs song mơ cau gơp ƀòn he, tài bơh bol he la pơnah să jan bal.

²⁶ Dilah gơs bơta gơjrañ gen bañ tìs glài, bañ prap bơta gơjrañ jơl tus di tŭ mattơngai mut,

²⁷ kung bañ lòi cà ràk in gơs tŭ lơmpah nàng ơniai.

²⁸ Cau òs ntung kơñau bañ ntung kơñau tai, mơya chan kong bòl glar lơh broă, ai tê he lơh broă niam, tồ gơs phan nàng dong cau siơ̆u siar la niam rlau.

²⁹ Bañ gơs jơnau iơh lơi lik bơh di bơr oh mi, mơya tòm tŭ pal đơs gen đơs tĕ jơnau niam nàng gơs bơt bơtào, tồ cèng bơta niam ală cau kơno in.

³⁰ Bañ lơh moat jrùng Yàng Hwềng Goh Yàng Tom Trồ dê, bơh tòm Kơnràñ oh mi geh tap ƀang kì tus di ngai dong tơwài.

³¹ Sang tĕ bơh di oh mi jơh ală bơta sràt bơtang, gơjrañ mañ, gơhào nùs, nggồr nggàc, bơrsèl tơnhial, bal mơ jơh ală bơta bih khih.

³² Ai tĕ bơta kơ̆ dơn, nùs nđàc sơngit ơm gơròm bal, toh glài bal, kung be Yàng Tom Trồ neh toh glài oh mi tòm Bơtau Krist behơ̆ sơl.