Ephesô 3 - Sră Goh 2018

Gơnoar broă Pol dê làng bol bơdìh in

¹ Tài bơh hơ̆, añ la Pol, lơh gơs cau ơm jàm Yàng Jesu Krist dê tài bơh oh mi la cau làng bol bơdìh,

² ngan oh mi neh kơno bơh gơnoar broă bơta nđàc Yàng Tom Trồ dê neh jào añ in nàng duh broă oh mi,

³ mbe lơi Yàng neh yal tơlik añ in git bơta ndơp “be añ neh cih dô êt jơnau lài òr.

⁴ Oh mi sền sră hơ̆ gen rgơi git loh bơta git wă añ jê bơh bơta ndơp ndơr Bơtau Krist dê,”

⁵ tòm ală rài yau òhềt geh yal tơlik jơi kòn mơnus in git ală bơta ndơp ndơr, mơya tŭ do Yàng Tom Trồ neh kơnòm dê Yàng Hwềng yal tơlik ală cau gơnoar bơto dờng mơ ală cau gơnoar hwơr sàng goh Kơnràñ in.

⁶ Bơta ndơp ndơr hơ̆ la làng bol bơdìh kơnòm di Jơnau Niam geh pơnah bal mơ cau Juda tòm bơta lơngai Yàng Tom Trồ dê; bol khai la ală cau tòm dô nơm să jan bal mơ pơrdòn bơta ho bal Yàng Tom Trồ neh lơh gơs tòm Yàng Krist Jesu.

⁷ Ai añ neh geh lơh gơs cau gơnoar duh broă Jơnau Niam hơ̆ dê, jat be bơta nđàc ai gòi Yàng Tom Trồ dê, mơ Kơnràñ neh ai añ in jat bơta lơh broă gơnap gơnoar Kơnràñ dê.

⁸ Añ la cau dềt rlau jơh tòm ală cau sàng goh; bulah behơ̆ Kơnràñ neh ai añ in bơta nđàc hơ̆, nàng añ bơto yal làng bol bơdìh in bơta pas gơs ò git lơh Bơtau Krist dê,

⁹ mơ lơh jơh tơl nă cau in git loh bơh bơta rơndap broă ndơp ndơr dê, neh pồn ndơp bơh ală rài yau tòm Yàng Tom Trồ la Bơtau crơng gơs jơh ală phan.

¹⁰ Behơ̆ gen, gan di Hìu Jum Goh nàng yal tơlik ală gơnoar at bồ mơ ală gơnoar hơđang trồ in git bơta jak chài ò git lơh Yàng Tom Trồ dê.

¹¹ Do la bơta lơh nền gam sùm sùm mơ Kơnràñ neh lơh sir tòm Yàng Krist Jesu la Yàng bol he dê.

¹² Tòm Bơtau Krist, kơnòm di bơta dòn tòm Kơnràñ, bol he gơs nùs khin cha mơ dòn nền nàng tus rềp di đap Yàng Tom Trồ.

¹³ Gen tàng, añ dan oh mi bañ gơplơ̆ nùs tài bơh ală bơta jê sồt bòl glar añ kong bơh oh mi, bơh hơ̆ la bơta gơklŏ oh mi dê.

Bơta kòñ gơboh Bơtau Krist dê

¹⁴ Tài bơh bơta hơ̆ añ cùn gơltang di đap Yàng Bèp,

¹⁵ bơh Kơnràñ mơ jơh ală jơi bơtiàn hơđang trồ mơ tòm ù geh tơmoh sơnđan.

¹⁶ Añ dan Kơnràñ jat be bơta gơklŏ crih crài Kơnràñ dê, kơnòm di Yàng Hwềng Kơnràñ dê bơh gơnap gơnoar mơ ai gòi oh mi in gơs pràn kơldang tòm cau đah dơlam,

¹⁷ tồ Bơtau Krist in bơh bơta dòn mơ ơm tòm nùs ală oh mi, nàng tơnơ̆ mơ tŭ oh mi ơm kơ̆ be chi sro ryas mơ bơtào kơ̆ tòm bơta kòñ gơboh.

¹⁸ Añ dan oh mi bal mơ jơh ală cau sàng goh rgơi git wă bơta ơnàng, bơta jòng, bơta jơnhoa, bơta jrô bơta kòñ gơboh Bơtau Krist dê la mbe lơi,

¹⁹ mơ geh git bơta kòñ gơboh Bơtau Krist dê la rlau mơ bơta git wă, tồ oh mi in geh bềng lìu bơta bềng tơl Yàng Tom Trồ dê.

²⁰ Tŭ do gơwèt hơ Kơnràñ la Bơtau bơh gơnap gơnoar lơh broă tòm bol he, rgơi lơh tơngkah tơngkañ oă rlau mơ ală bơta bol he hòi dan mơ kơlôi sơnơng,

²¹ dan Kơnràñ in geh gơklŏ tòm Hìu Jum Goh mơ tòm Yàng Krist Jesu, tòm jơh ală rài gam sùm sùm ò lồi. Amen.